Ezequiel 45

Templuta shäritsinanpaq chakrata rakiyanqan

Ezequiel 48.9-20

1<< <Sortiyarnin runakunata posesionnin rakipur noqapaqpis juk partita rakiyanki. Tsaypa largun kanqa chunka ishkay pullan kilömetru y anchunna chunka kilömetru. Noqapaq rakiyanqayki partiqa sagrädum kanqa. 2Tsay partichömi templupaq rakiyanki chuskun lädunpa ishkay pachak pitsqa chunka (250) metruta. Entëru kuchunpam libri kanqa ishkay chunka pitsqa (25) metru anchu.

3<< <Noqapaq rakiyanqayki partita ishkayman rakiskir juk partita mïdiyanki chunka ishkay pullan kilömetru larguta y pitsqa kilömetru anchuta. Tsaychömi templu y Lugar Santïsimu kanqa. 4Tsaynöllam tsay rakiyanqayki parti kanqa templuchö servimaqnï sacerdötikuna wajinkuna shäritsiyänanpaq. Tsaychömi templupis kanqa. 5Jukaq partitapis mïdiyanki chunka ishkay pullan kilömetru larguta y pitsqa kilömetru anchuta. Tsay partim kanqa templuchö aruq levitakunapaq. Tsaychömi paykunapis markankuna rurakuyanqa.

6<< <Tsay noqapaq rakiyanqayki partipa lädunchö markata shäritsiyänaykipaq mïdiyanki chunka ishkay kilömetru pullan larguta y ishkay kilömetru pullan anchuta. Tsaynöpam noqapaq rakiyanqayki parti lädunkunachö wajikikuna shäritsiyanki.

Mandakuq autoridäpa posesionnin rakiyanqan

Ezequiel 48.21-22

7<< <Tsaynölla mandakuq autoridäpaqpis posesionninkuna rakiyanki. Tsay posesionmi ishkay partiman rakishqa kanqa. Juk partim kanqa rupay yarqamunan kaqlächö y jukaq partinam kanqa rupay jeqanan kaqlächö. Noqapaq y markapaq rakiyanqayki partim chawpichö kanqa. Rupay yarqamunan kaqläpa largunmi Israel nacionpa mujunninyaq chanqa. Tsaynöllam rupay jeqanan kaqläpapis largun Israel nacionpa jukaq mujunninyaq chanqa. Tsaymi juk kuchupita jukaq kuchuyaq largun kanqa lädun kaq trïbukuna chaskiyanqan posesionpa largun kanqannölla. 8Tsay posesionmi kanqa mandakuq autoridäpa chakran. Tsaymi churanqä mandakuq autoridäkuna chakraykikunata qechuyäshunkinatsu. Tsaynöpam Israel nacionchö cada trïbupa chakrankuna kanqa.

Mandakuq autoridä imanö rurananpaq ninqan

9<< <Dios Yayam nin: Israel runakunapa mandaqninkuna, amana mana allikunata rurayaynatsu ni pitapis sufritsiyaynatsu. Llapan imaykatapis munanqänö alli kaqllata rurayay. Kuyanqä runakunapa chakrankunata ama qechuyaynatsu>. Dios Yayam tsaynö nin.

10<< <Balanzaykipis tupuykipis cabal katsun.#Lev. 19.36. 11Efa tupupis bato tupupis tsay tamäñullam kanqa. Chunka batukunaqa juk homermanmi yaykunqa. Tsaynöllam chunka efakunapis juk homerman yaykunqa.#45.11 Bato niyanqan tupumanmi ishkay chunka ishkay (22) litru yaku yaykun. Efa niyanqan tupumannam ishkay chunka ishkay (22) litru tsaki mikuy yaykun. Tsaymi trïgu kaptin juk efa kaykan chunka qanchis kïlunö.

12<< <Pësayänaykipaqmi siclo niyanqan pësu kanqa.#45.12 Juk sicluqa chunka juk grämum pësarqan. Juk sicluqa ishkay chunka (20) geram pësan. Soqta chunka (60) siclum juk mina kanqa.

13<< <Israel runakuna, trïguta y cebädata cosechaskir soqta chunka (60) partiman rakiyanki. Tsaypita juk parti kaqta mandakuq autoridäman apayanki. 14Aceitita aparqa cada pachak (100) bato tupupita jukta apayanki. 15Üshata aparqa cada ishkay pachakpita (200) juk alli weran kaqta apayanki. Trïguta, cebädata, aceitita y üshata apayanqaykipitam mandakuq autoridä churanqa tsaki mikuy ofrendapaq, waykana sacrificiupaq y alli päsakuy sacrificiupaqpis. Tsayraqmi jutsaykikunapita perdonayäshayki>. Dios Yayam tsaynö nin.

16<< <Maytsay Israel nacionchö täkurpis tsay ofrendakunata apar Israelchö mandakuq autoridäta entregayanki. 17Wata wata rurayanqayki fiestakunachö, llullu killa fiestakunachö, jamay junaqkunachö y llapan fiestachöpis mandakuq autoridänam kikinpa chakrankunapita sacrificiukunapaq apamunqa. Tsaynöpam kanqa waykana sacrificiupaq, tsaki mikuy ofrendapaq, vïnu ofrendapaq, purificätsina sacrificiupaq y alli päsakuy sacrificiupaqpis. Tsaynöpam jutsaykikunapita perdonayäshayki.

18<< <Dios Yayam nin: Wata qallaq killachö punta kaq junaqchömi sänu mallwa töruta pishtaskir templuta sacerdöti purificanqa. 19Tsay pishtanqan mallwa törum purificätsina sacrificiu kanqa. Sacerdötim templupa paradorninkunata, altarpa chuskun esquïnanchö patakninkunata y templupa ruri kaq patiunman yaykuna punkuta pishtanqan mallwa törupa yawarninwan tsaqtsunqa. 20Pipis mana yarpachakur o mana tantiyakur jutsa ruranqanpita perdonanäpaqmi wata qallaq killa qanchis kaq junaqchöpis tsaynölla sacerdöti tsaqtsunqa. Tsaynöpam templuta purificanqa.

21<< <Tsay qallanan killallachö chunka chusku junaqchömi Pascua fiestata rurar qallayanki. Tsay fiestata qanchis junaqyaq rurayanki. Tsay junaqkunam levadürannaq tantata mikuyanki.#Éxo. 12.1-20; Núm. 28.16-25. 22Fiesta qallanan junaqmi mandakuq autoridä kikinpa jutsanpita y qamkunapa jutsaykikunapita juk mallwa töruta churamunqa sacerdötikuna pishtar altarchö waykayänanpaq.

23<< <Qanchis junaq fiesta kanqanyaqmi cada junaq waykana sacrificiupaq churamunqa qanchis sänu mallwa törukunata y qanchis sänu carnërukunata. Purificätsina sacrificiupaqnam juk chïvuta cada junaq churamunqa. 24Cada mallwa töruta y cada carnëruta churamurmi ishkay chunka (20) kïlu tsaki mikuy ofrendata y kimsa litru pullan aceititapis churamunqa altarman wiñäyänanpaq.

25<< <Qanchis kaq killa chunka pitsqa junaqchö fiestata rurarmi#Lev. 23.33-36; Núm. 29.12-38. wakin kaq fiestakunachö churamunqannölla mandakuq autoridä churamunqa. Tsaynölla churamunqa purificätsina sacrificiupaq, waykana sacrificiupaq, tsaki mikuy ofrendapaq y aceitita altarman wiñäyänanpaq.

Currently Selected:

Ezequiel 45: qxn

Highlight

Copy

Compare