Ezequiel 44

Templupa wichqaraq punkun

1Tsaypitanam pushamaq runa yapay pushamarqan templupa jatun patiunman yaykuna juk punkuman. Tsay punkuqa rupay yarqamunan kaqlächömi wichqaraykarqan.

2Tsaychömi Dios Yaya nimarqan: <<Kay punkum imaypis wichqaranqa. Israel runakunata kuyaq Dios Yaya kar kay punkupa yaykushqa kaptïmi pipis yaykunanpaq kichanqatsu. Tsaymi imaypis wichqaräkunqalla. 3Peru mandakuq autoridämi sïqa kay punkuchö kaykaq ruri cuartullaman yaykunqa puntächö mikunanpaq. Tsay cuartuman yaykur y yarqurpis patiuparaqmi päsanqa>>.

Templuman pï yaykunanpaq ninqan

4Tsaypitam norti kaqlä yaykuna punkupa päsatsimar templupa ruri kaq patiunman pushamar templu punkuyaq chätsimarqan. Tsaypita rikaskinäpaqmi Dios Yayapa chipakyaynin templuchö junta kaykänaq. Tsaymi patsaman sas pelatakuykurqä. 5Tsaychömi Dios Yaya nimarqan: <<Runapa tsurin, shumaq wiyamay. Templüchö imanö kayänanpaq kaqta ninqaqkunata shumaq tantiyay. Tsaynölla templuman pï yaykunanpaq y pï mana yaykunanpaq kaqtapis musyay.

6<<Mana cäsukuq Israel runakunata niy: <Dios Yayam nin: Israel runakuna, melananqäkunata ama rurayaynatsu. 7Señalanni#Gén. 17.10; Deut. 10.16; Rom. 2.25-29. mana cäsumaq juklä runakunata amana templüman yaykatsiyaynatsu. Paykunata yaykatsirqa tsaki mikuy ofrendakunata, wätakunapa wiranta y yawarninta altarnïman churarpis templütam impüruyaykätsiyanki. Tsaynö rurarmi pactu ruranqantsikta manakaqman churaykäyanki.

8<< <Ninqänö rurayanqaykipa rantinmi juklä runakunata templüchö serviyämänanpaq churayashkanki. 9Israel markakunachö täkurpis señalanni mana cäsumaq juklä runakunaqa ama ni mayqanpis templüman yaykuyanqatsu>. Dios Yayam tsaynö nin.

Levitakuna templuchö imata rurayänanpaq kaqta ninqan

10<< <Israel runakuna mana cäsuyämar ïdulukunata adorayanqannöllam levitakunapis ïdulukunata adorayashqa. Tsaymi levitakunaqa 11templu punku täpaqllana kayanqa. Tsaynöllam runakuna apayämunqan wätakunata waykana sacrificiupaq y wakin kaq sacrificiukunapaq wätakuna pishtaqllana kayanqa. Runakunata templuchö yanapayänanllapaqmi listu kayanqa. 12Tsaynö kayanqa ïdulukunata adorar Israel runakunata jutsata ruratsiyanqanpitam>. Dios Yayam tsaynö nin.

13<< <Levitakunaqa mananam sacerdöti kayanqanatsu ni puntämanpis witiyämunqanatsu.#44.13 Puntämanpis witiyämunqanatsu ninqanqa sacrificiuta waykananpaq altarnïman witiyanqanatsu ninanmi. Sagrädu ofrendakunata ni templuchö wakin kaq sagrädu kaqkunatapis manam yatayllapis yatayanqanatsu. Mana allikunata rurayanqanpitam alläpa penqakuyanqa. 14Paykunatam churashaq templuta täpayänanpaq y tsaychö ruraypaq kaqkunata rurayänallanpaq.

Sacerdötikuna imanö kayänanpaq y imata rurayänanpaq kanqanta ninqan

15<< <Israel runakuna mana cäsuyämar ïdulukunata adorayaptinpis Sadocpita#2Sam. 15.24-29; 1Rey. 1.5-8, 32-45; 2.27, 35. miraq sacerdötikunam sïqa ninqäkunata cäsur templuchö serviyämashqa. Tsaymi paykunaqa puntächö serviyämar wirata y yawartapis altarnïman churayämunqa>. Dios Yayam tsaynö nin. 16<Paykunallam templüman yaykur altarnïchö serviyämanqa. Paykunam llapan ninqäkunata cäsuyämanqa.

17<< <Ruri kaq patiuman yaykurmi lïnupita rurashqa llatapata shukukuyanqa.#Éxo. 28.39-43; Lev. 16.4. Manam millwapita awashqa llatapankuna shukushqaqa patiuchö ni templu rurinchöpis serviyämanqatsu. 18Umankunatam lïnupita awashqa päñuwan watäkuyanqa. Lïnupita awashqa calzoncïllutam shukuräyanqa. Jumpitsikuq kaqtaqa manam ni imatapis shukukuyanqatsu. 19Jatun patiuman manaraq yarqur y runakunawan manaraq tinkurmi shukuräyanqan lïnu llatapankunata cambiakuyanqa. Cambiakuyanqan llatapankunatam templuchö cuartukunaman churayanqa.#Lev. 16.23. Tsaynöpam jatun patiuchö kaykaq runakunata ni ima desgraciapis päsanqatsu.

20<< <Sacerdötikunaqa aqtsankunata manam qara putuypatsu rututsikuyanqa#Lev. 21.5. ni alläpapis wiñätsiyanqatsu. Tsaymi shumaq kananllapaq rututsikuyanqa. 21Altar kanqan patiuman yaykuyänan kaptinqa manam vïnuta upyayanqatsu.#Lev. 10.9. 22Viüdawan ni ollqun dëjashqa warmiwanpis manam churakäyanqatsu. Tsaypa rantinmi Israel casta doncëlla jipashllawan o sacerdötipa viüdanllawan churakäyanqa.#Lev. 21.7, 13-14.

23<< <Qamkunatam sacerdötikuna tantiyatsiyäshunki ima sagrädu o mana sagrädu kanqanta, imapis püru kanqanta y imapis impüru kanqanta.#Lev. 10.10. 24Demandanakuychöpis leynïkuna ninqannöllam juzgayäshunki. Fiestakunachö imata rurayänanpaq ninqänöllam cumplitsiyäshunki. Jamay junaqkunatapis paykunam respitatsiyanqa.

25<< <Impüru mana tikrayänanpaq ayatapis manam yatayanqatsu.#Lev. 21.1-4. Maman, taytan, ollqu tsurin, warmi tsurin, wawqin o doncëlla panin wañuptinmi sïqa yatayanman. 26Ayata yatayanqanpita armakuskirmi qanchis junaqtaraq shuyäyanqa purificäkuyänanpaq. 27Tsaypitaraqmi altar kanqan kaq patiuman kutiskir yapay serviyämänanpaq purificätsina sacrificiuta apayämunqa>. Dios Yayam tsaynö nin.

28<< <Sacerdötikunapaqa manam chakrankunapis kanqatsu. Chakrankunapa rantinmi noqa herenciankuna kashaq. Israelchö herenciankuna ni chakrankuna mana kaptinpis noqam paykunata wätashaq.#Núm. 18.20. 29Apayämunqayki tsaki mikuy ofrendakunata, purificätsina sacrificiukunata y consagratsina sacrificiukunatam paykuna mikuyanqa. Noqapaq apayämunqaykikunam paykunapaq llapan kanqa. 30Punta wayuqkunapita primiciata apayämunqaykitawan llapan ofrendaykikunatam sacerdötikuna chaskiyanqa. Tsaynöllam tantata masarar jornupita puntata jipiyanqaykitapis paykunata qarayanki. Tsaynö rurayaptikim qamkunaman bendicionnïta churamushaq.#Núm. 18.8-19.

31<< <Kikillan wañushqa o chucaru wäta wañutsishqa aytsata sacerdötikuna manam mikuyanqatsu. Wäta o pishqu aytsa kaptinpis manam mikuyanqatsu.#Lev. 7.24; 22.8.

Currently Selected:

Ezequiel 44: qxn

Highlight

Copy

Compare