Hechos 6

Mikuyta aypuyäkunanpaq akrayanqan

1Tsay witsaymi discïpulukuna atskaqna kayarqan. Paykunachö waktsa viüdakuna kayaptinmi waran waran mikuyta aypuyaq. Hebreo parlaq viüdakunata mas yanapayaptinmi griego parlaqkuna quëjakur niyarqan: <<Griego parlaq viüdakunata mana cäsurmi hebreo parlaqkunaqa kikinkunapuralla mikuyta aypunakuyan>>.

2Tsaynö niyaptinmi llapan discïpulukunata qorikaskatsir chunka ishkay apostolkuna niyarqan: <<Wawqikuna, manam allitsu kanman Diospa willakuyninta dëjaskir viüdakunata servirnin kayaptï. 3Tsaymi mikuyta aypuyänanpaq qamkunapita qanchis wawqikunata akrayämunayki. Paykuna kayätsun alli rikashqa runakuna, Espíritu Santupa poderninchö kawaqkuna y alli yarpayyuq runakuna. 4Tsaynöpam tiempükuna kanqa Dios Yayata mañakuyänäpaq y alli willakuyninta willakuyänäpaq>>.

5Tsaynö willanakuskirmi akrayarqan Estebanta, Felipita, Prócoruta, Nicanorta, Timónta, Parmenasta y Antioquía markapita Nicolásta. Estebanmi Dios Yayaman alli creyikuq y Espíritu Santupa poderninchö kawakuq karqan. Nicolásmi Israel runa kananpaq unayna cuerpunchö señalakushqa karqan. 6Tsaymi tsay akrayanqan wawqikunapa umankunaman makinkunata churar apostolkuna Dios Yayata mañakuyarqan.

7Tsaymi Dios Yayapa willakuyninta willakuyaptin Jerusalénchö discïpulukuna mas atskaqna kayarqan. Tsaynöllam tsay willakuyman atskaq sacerdötikunapis creyikuyarqan.

Estebanta prësu apayanqan

8Runakunapa rikänanchö milagrukunata y señalkunata#6.8 Señalqa runakuna tantiyayänanpaq milagrum kaykan. Señalkunawanmi Dios Yaya tantiyatsikun willakuynin rasunpa kanqanta. rurananpaqmi Estebanta Dios Yaya yanaparqan. 9Paywanmi Librina niyanqan sinagögachö qorikashqa wakin Israel runakuna piñanakur qallaykuyarqan. Tsay runakunam kayarqan Cirene nacionpita, Alejandría markapita, Cilicia provinciapita y Asia provinciapita. 10Espíritu Santupa poderninwan shumaq tantiyakur parlaptinmi Estebanta upällatsiyta puëdiyarqantsu.

11Tsaymi pakayllapa runakunata pägayarqan Estebanpa contran parlayänanpaq. Paykunam niyarqan: <<Moiséspa y Dios Yayapa contran Esteban parlaykaqtam wiyayashkä>>.

12Tsaynö niyaptinmi Israel mayor runakuna, ley yachatsikuqkuna y wakin runakunapis alläpa piñakuyarqan. Tsaymi Estebanta prësu achkuskir Sanedrín juezkuna qorikäyanqanman apayarqan. 13Tsaychömi manakaqta parlar Estebanpa contran niyarqan: <<Kay runam sagrädu templuntsikpa y leynintsikpa contran imaypis parlan. 14Tsaynöllam nin Nazaretpita Jesús templuntsikta juchutsinanpaq kanqanta y Moisés yachatsikunqan costumbrintsikkunata mana cäsunapaq kanqanta>>.

15Tsaychö jamaykaq juezkunam Estebanpa qaqllanta angelpa qaqllantanöraq rikaykuyarqan.

Currently Selected:

Hechos 6: qxn

Highlight

Compare

Copy