Hechos 18

Corintuchö Pablo willakunqan

1Tsaypitanam Atenaspita Pablo aywakur Corinto markaman charqan. 2Tsaychömi Aquila shutiyuq Israel runawan tinkurqan. Aquilam Ponto provinciachö yuriq karqan. Warminpa shutinmi karqan Priscila. Paykunam tsayraq Italiapita Corintuman chashqa kayarqan. Corintumanmi aywakuyarqan Claudio César llapan Israel runakunata Romapita qarquptin. Reqinakuskirmi 3paykunawan carpata rurar Pablo täkurqan. Pablunömi Priscilawan Aquilapis carpa rurayta yachayarqan.

4Cada jamay junaq sinagögaman Pablo aywarmi Israel runakunata y mana Israel runakunatapis Jesucristupaq yachatsikurqan. 5Macedonia provinciapita Silaswan Timoteo chaykuyaptinmi aruyninkunata Pablo dëjaskir waran waran Dios Yayapa willakuyninta willakurqan. Willakurmi Israel majinkunata tantiyatsirqan Jesúsqa salvamaqnintsik Cristo kanqanta. 6Peru Israel runakunaqa Pablupa contran shärirmi imaykata ashayarqan. Tsaymi llatapanta tapsikuskir Pablo nirqan: <<Dios Yaya castigayäshunaykipaq kikikikunam jutsayuq kayanki. Noqaqa Dios Yayapa willakuyninta willayashkaqnam. Kananpitaqa mana Israel runakunatanam willashaq>>.

7Tsaynö nirmi tsay sinagögachö yachatsikunqanpa rantin Ticio Justupa wajinchöna yachatsikurqan. Justuqa mana Israel runa kaykarpis Dios Yayata cäsuqmi karqan. Paypa wajinqa sinagöga lädunchömi karqan. 8Tsaychö yachatsikuptinmi sinagögachö mandakuq runa y tsay runapa wajinchö täkuqkunapis Señor Jesucristuman creyikuyarqan. Tsay runapa shutinmi Crispo karqan. Tsaynöllam Corintuchö täkuq wakin runakunapis Pablo willakunqanta wiyar Jesúsman creyikur bautizakuyarqan.

9Juk paqasnam revelacionchö Pabluta yuripuskir Jesucristo nirqan: <<Mana mantsakur y mana upällakur willakuynïta willakuy. 10Kay markachömi salvanäpaq kaq runakuna atskaq kayan. Tsaymi willakuptiki pipis mana yatashunaykipaq qamwan kaykäshaq>>.

11Tsaymi Dios Yayapa willakuyninta yachatsikur juk wata soqta killa Corinto markachö Pablo quëdarqan.

12Galión shutiyuq runa Acaya provinciapa#18.12 Acaya provinciachömi Corinto marka karqan. mandakuqnin kanqan witsaymi Israel runakuna Pablupa contran shäriyarqan. Tsaymi Pabluta Galiónpa despächunman apaykur 13niyarqan: <<Kay runam Dios Yayapa leyninkunata mana cäsur mana allikunata yachatsikun>>.

14Pablo parlananpaq kaykaptinmi Galión nirqan: <<Israel runakuna, kay runa suwakushqa o pitapis wañutsishqa kaptinqa atiendiyaqmanmi. 15Peru leynikikunapaq piñanakuyanqaykitaqa manam musyaytapis munätsu. Tsaytaqa kikikikuna imanöpis arreglakuyay>>.

16Tsaynö nirmi despächunpita qarquskirqan. 17Tsaypitanam sinagögachö mandakuq Sóstenesta despächu punkuchö achkuskir alli cösa maqayarqan. Tsaychö maqayaptinpis Galióntaqa manam ni ima importakurqantsu.

Antioquíaman Pablo kutinqan

18Tsaypita atska killaraqmi Corinto markachö Pablo täkurqan. Tsaypitanam wawqikunapita y panikunapita despidikuskir Cencrea markaman aywarqan. Tsaychömi Dios Yayata prometinqanta cumplir aqtsanta rutukurqan.#Núm. 6.18. Tsaypitanam Siria provinciaman Priscilawan y Aquilawan büquiman lätarkur aywakuyarqan.

19Éfeso markaman chaykurmi Priscilawan Aquila quëdayarqan. Pablunam Éfesupita manaraq päsar sinagögaman yaykuykur Israel runakunata Jesúspaq willarqan. 20Sinagögachö runakuna paykunawan quëdananpaq rugayaptinpis Pablo manam munarqantsu. 21Tsaypa rantinmi paykunapita despidikuskir nirqan: <<[Pascuapaqmi Jerusalénman imaykanöpis chayta munä.] Dios Yaya munaptinqa yapaymi kutimushaq>>.

Tsaynö nirmi büquiman lätarkur Éfesupita aywakurqan.

22Cesarea markaman chaykurnam büquipita yarquskir Jerusalénman aywarqan wawqikunata y panikunata watukaq. Tsaypitanam Antioquíaman kutirqan. 23Tsaychö täkuskirmi Galacia y Frigia provinciakunapa yapay kutir markan markan aywar discïpulukunata#18.23 Discïpulukunapaq parlarqa Jesucristuman creyikuqkunapaqmi parlan. animatsirqan.

Éfesuchö Apolos willakunqan

24Tsay witsaymi shumaq parlayta yachaq Apolos shutiyuq Israel runa Éfeso markaman charqan. Paymi Alejandría markapita karqan. Tsaynöllam Dios Yayapa palabranta allish yacharqan. 25Dios Yayapa willakuyninta allish yacharpis bautismupaqqa Juan yachatsikunqallantam yacharqan. Tsaynö karpis Señor Jesucristupaqmi llapan shonqunwan kushishqa yachatsikurqan. 26Sinagögachö pipitapis mana mantsakuypa willakuqta wiyaykurmi Priscilawan Aquila jukläman pushaykur Dios Yayapa willakuyninta masta tantiyatsiyarqan.

27Acaya provinciaman Apolos aywayta munaptinmi wawqikuna y panikuna animatsiyarqan. Tsaymi Acayachö wawqikunaman y panikunaman cartakuyarqan chaptin payta chaskiyänanpaq. Tsay creyikuqkuna creyikuyänanpaqmi Dios Yaya llakipar tantiyatsirqan. Acayaman Apolos chanqanmi Jesucristuman creyikuqkunapaq alli karqan. 28Paymi Israel runakunata Dios Yayapa palabranta shumaq yachatsir Jesús salvamaqnintsik Cristo kanqanta tantiyatsirqan.

Currently Selected:

Hechos 18: qxn

Highlight

Compare

Copy