2 Corintios 9

1Jerusalénchö wawqikunapaq y panikunapaq ofrendata qoriyänaykipaqqa masta tantiyatsiyänaq manam wanakannatsu. 2Musyämi ofrenda qoriyta munayanqaykita. Tsaymi Macedonia provinciachö wawqikunata y panikunata willarqä qanyan watapita ofrenda qoriyta qallayanqaykita. Tsaynö willaptïmi paykunapis qoriykäyan.

3Tsaynöllam kaychö wawqikunata y panikunata willarqä qamkuna kaqman shamuptï ofrendata listullatana shuyätsiyämänaykipaq kanqanta. Qamkunapaq tsaynö parlanqä manakaqllapaq kananta mana munarmi tsay kimsa wawqikunata qamkunaman kachamü. 4Macedoniapita wawqikunawan shamur cuidädutaq tsayraq qoriykaqta tariyaqman. Qoriyanqaykita willakuykaptïpis manaraq qoriyaptikiqa noqapaq y qamkunapaqpis penqakuypaqmi kanqa. 5Tsaymi qorir yanapayäshunaykipaq kimsaq puntayämunqa. Tsaynöpam qoriyänaykipaq niyanqaykinölla ofrendaykikuna listuna kanqa noqa chämur apanäpaq. Chämuptïraq qoriyaptikiqa runakunam yarpäyanqa mana munaykar qoriykäyanqaykita.

Yanapakuqkunata Dios Yaya yanapanqan

6Musyanqantsiknömi ichikllata muruq kaqqa ichikllata qorin. Atskata muruq kaqmi atskata qorin. 7Tsaynölla qamkunapis ayka ofrendata apayänaykipaqpis shumaq yarpachakuskir kushishqa churayanki. Llakipaykarqa ama churayankitsu. Ofrendata kushishqa churaq kaqtam Dios Yaya kuyan. 8Kuyayäshurnikim alli kaqkunata imaypis rurayänaykipaq poderösu kayninwan llapan imaykachöpis yanapayäshunki. 9Dios Yayapa palabranmi nin:

<<Waktsakunatam imaypis qaran.

Allillatam imaypis ruran.

Paytam pïmaypis respitan>>.#Sal. 112.9.

10Murumanpis mikuymanpis qaramaqnintsik Dios Yaya bendicionninta churaykallämutsun wakintapis kushishqa yanapayänaykipaq. 11Tsaynöpam wakinta yanapayänaykipaq imapis faltäyäshunkitsu. Qaraynikikunata chätsiyaptïmi Dios Yayata kushishqa agradëcikuyanqa.

12Tsaynöllam ofrendata qoriyanqaykita chätsiptï Jerusalénchö wawqikunapis y panikunapis mana faltäpukurna Dios Yayata kushishqa agradëcikuyanqa. 13Tsaynöllam Jesucristupa alli willakuyninta cäsuyanqaykita tantiyar Dios Yayata alabayanqa paykunata y wakin kaqkunatapis yanapayanqaykipita. 14Tsaynöllam llakipäkuq kayninta qamkunaman churamunqanpita Dios Yaya imaypis yanapayäshunaykipaq llapan shonqunkunawan mañakuyanqa.

15¡Dios Yayata agradëcikushun llakipäkuq kanqanpita! Tsaytaqa manam imanöpapis agradëcikuyta puëdintsiktsu.

Currently Selected:

2 Corintios 9: qxn

Highlight

Copy

Compare