1 Tesalonicenses 2

Tesalónica markachö Pablo willakunqan

1Wawqikuna y panikuna, willakuyanqäta chaskiyaptiki manam manakaqllapaqtsu qamkunaman shamur yachatsiyashkaq. 2Musyayanqaykinömi qamkuna kaqman manaraq chäyämuptï Filipos#Hech. 16.19-24. markachö ashayämar alläpa sufritsiyämashqa. Tsaynöllam qamkuna kaqchöpis sufritsiyämashqa. Peru tsaynö sufritsiyämaptinpis Diosnintsikmi yanapayämashqa alli willakuyninta mana mantsakur willakuyänäpaq.#Hech. 17.2-4.

3Noqakuna manam ni pitapis mana allita yachatsiyashkätsu ni engañanashkätsu ni mana allita creyitsirtsu willakuyä. 4Masbienmi alli willakuyninta willakuyänäpaq Dios Yaya mandayämashqa kaptin willakuykäyä. Manam runakuna munayanqantatsu willakuyä, sinöqa Dios Yaya munanqantam.#Gál. 1.10. Paymi shonquntsik imata yarpanqantapis musyan.

5Musyayanqaykinöpis chaskiyämänayki rayku manam imaypis qamkunata aläbayashkaqtsu. Dios Yaya musyanmi pitapis qellaynin rayku mana engañayanqäta. 6Tsaynöllam aläbashqa kayta munartsu qamkuna kaqchö willakuyashkä.

7Jesucristupa apostolnin kaykarqa gastükunapaq qamkunatam mañakuyaqman karqan. Mañakuyanqaqpa rantinmi wawanta maman kuyanqannö qamkunata llakipäyashkaq. 8Alläpa kuyayarnikim Dios Yayapa willakuyninta chaskiyänayki rayku wañuyänäpaqpis listu kayashkä.

9Wawqikuna y panikuna, ¿manaku yarpäyanki Dios Yayapa willakuyninta qamkuna kaqchö willakuyänäpaq kikïkuna aruyanqäta? Gastükunapaq mana yarpachakuyänaykita munarmi paqasta junaqtapis alläpa pishipäyanqäyaq aruyarqä.#Hech. 18.3; 2Tes. 3.8. 10Qamkunapis y Dios Yayapis musyanmi qamkuna kaqchö kar pay munanqannö allillata rurar santu kawakuyanqäta. 11Tsaynöllam musyayanki tsurinkunata taytan kuyanqannö qamkunata kuyayanqaqta. 12Tsaymi rugayarqaq, animatsiyarqaq y tantiyatsiyarqaq Dios Yaya munanqannö kawakuyänaykipaq. Paymi qayayäshushkanki mandakuyninchö imayyaqpis paywan kawayänaykipaq.

13Dios Yayapa alli willakuyninta willayaptiq manam runakunapa yarpaynin kanqantatsu yarpäyashkanki, sinöqa Dios Yayapa willakuynin kanqantam. Tsaynö tantiyarmi llapan shonquykikunawan chaskiyashkanki. Willakuyninta wiyarmi pay munanqannö kawakuyänaykipaq tantiyayashkanki. Tsaymi imaypis Dios Yayata agradëcikuyä.

14Wawqikuna y panikuna, marka majikikuna sufritsiyäshunqaykinöllam Judeachö wawqikunata y panikunatapis Israel runakuna sufriykätsiyan. 15Tsay runakunam Señor Jesucristuta wañutsiyarqan. Tsaynöllam Dios Yayapa profëtankunatapis unay ayllunkuna wañutsiyarqan. Tsaynö mana alli runakunam noqakunatapis Judeapita qarqayämashqa.#Hech. 9.23, 29; 13.45, 50; 14.2, 5, 19; 17.5, 13; 18.12. Paykunaqa manam Dios Yaya munanqannötsu kawayan. Manam munayantsu Dios Yayapa alli willakuyninta runakuna chaskiyänanta. 16Tsaymi mana Israel kaqkunata willakuyaptï tsapata churayan mana salvakäyänanpaq. Tsaynöpam alläpa jutsayuq kaykäyan. Peru tsaynö kayanqanpitam día del juiciuchö paykunata Dios Yaya mana llakipar castiganqa.

Tesalónicaman Timoteuta Pablo kachanqan

17Wawqikuna y panikuna, qamkuna kaqpita aywakuyanqä junaqpitam rikänakushkantsiknatsu. Tsaymi qamkunapaq llakikur imaykanöpapis watukaqnikikuna kutimuyta munaykäyä. 18Noqa Pablum atska kuti kutimuyta munashkä. Peru Satanásmi mana shayämunäpaq tsapata churapayämashqa. 19Tsapata churapayämaptinpis qamkunam premiuta chaskinqä corönä kaykäyanki. Tsaymi Señornintsik Jesucristo kutimuptin paypa puntanchö qamkunapaq alläpa kushikuyäshaq. 20Qamkunapaq Dios Yayata rasunpa alabarmi kushikuyäshaq.

Currently Selected:

1 Tesalonicenses 2: qxn

Highlight

Copy

Compare