Joroma 6

To ki Dub kede Yaruno kede Kirisito

1Nan do owac benyo? Mam omeedenu kede dub tetekeny kisa ka Rubanga meede nyai ne wa? 2Likame kamano. Wan jo kame otiekunu to ki dub okarununu bobo meede bedo kede dub i kuo wa benyo benyo? 3Mam ingeunu be wan dedede jo kame kotieko batiso wa i Kirisito Yesu, kobatiso wa da i to mere? 4#Jokolosai 2.12Pi mano, di bin kobatiso wa, koyiko wa karacel kede Kirisito i to, tetekeny bala kame Papa oyaruno en kede kikom jo oto pi twer me deyo mere, wek wada obedunu kede kuo anyen.

5Pien ka wan oriberenu kede en i to kame cal bala mere, ateteni obinunu ribere kede en da i yaruno kame cal bala mere. 6Wan ongeunu be, bin koguro kuo wa acon i kom musalaba karacel kede Kirisito, tetekeny kuo me dub jiki, di okounu jiko bedo ipasoi me dub. 7Pien ngat kotieko to udo etieko gonyere ki dub. 8Do ka wan otounu kede Kirisito, oyei da be obinunu bedo kuo karacel kede en. 9Pien wan ongeunu be, bala kame kotieko yaruno kede Kirisito kikom jo oto, likame ebino bobo to; likame bobo to tie kede loc i kome. 10I to mere, en eto ki dub tien acel atwal; do kuo kame nan en etie kede, ekuo pir Rubanga. 11Aso wuda miero iterunu be, itiekunu do to ki dub, nan do i kuounu pir Rubanga i Kirisito Yesu.

12Pi mano, kur dub bobo bed kede loc i komu kame to, pi mino wu lubo mit me komu. 13Kur imiunu adul moro me komu i dub, pi bedo gi me timo raco, do jalerenu but Rubanga bala jo kame kokwanyo ki to di oko kelo gi i kuo, doko da miunu adulion dedede me komu but Rubanga pi bedo gi me timo gikame opoore. 14Pien dub miero kur bed kede loc i wi wu, bala kame nan likame itienu kede i twer me Iswil, do itienu i twer me kisa ka Rubanga.

Ipasoi me Tim Kopoore

15Nan do benyo? Mam odonyunu dub be pien likame otienu i twer me iswil, do pien otienu i twer me kisa ka Rubanga? Likame kamano. 16Mam ingeunu be ka ijalerenu but ngatamoro bala ipasoi kame mie wor, idokunu da ipasoi me ngat kame imiunu wor nono, cengemogo ipasoi me dub, gikame tero wu i to, arabo ipasoi me bedo kede wor, gikame mio wu idokunu jo kopoore. 17Do opwounu Rubanga, pien wun jo kame oudo bin itienu ipasoi me dub, itiekunu doko jo kame lubo kede cunyu dedede gi dedede kame tie i pwony kame bin komio wu. 18Bala kame kotieko gonyo wu kede ki dub, nan itiekunu do doko ipasoi me ekite kopoore. 19Ango atie yamo bala dano adana pi goro wu me ekite me anywali wu. Pien bala kame bin ijalunu kede komu lung i timo caro kede i tim kame iswil dagi, kame meede ameda, aso nan do jalunu komu lung pi bedo ipasoi me ekite kopoore, pi bedo jo kolonyere.

20I kare kame oudo itienu kede ipasoi me dub, oudo igonyerenu kikom kop kame mako poore. 21Do bero nyo kame ikounu udo ki gikame nan lewic mako wu iye nogo? Adwokini me ginogo en to. 22Do bala kame nan kotieko gonyo wu kede ki dub di ikounu doko ipasoi ka Rubanga, gikame ibinunu udo en bedo jo kolonyere, kede adwokini mere en kuo kame bedo nakanaka. 23Pien egelit me dub en to; do giamia ka Rubanga me nono en kuo kame bedo nakanaka i Kirisito Yesu Rwot wa.

Currently Selected:

Joroma 6: BILKDC13

Highlight

Copy

Compare