Joroma 13

Bedo kede Wor but Apugan

1Poore ngat acelacel wor apugan, pien likame tie akarunikin me apugan moro kalikame owok kibut Rubanga; akarunikin me apugan kame nataman tie go, Rubanga en koketo. 2Pi mano, ngat kame piemo kede akarunikin me apugan udo etie piem kede gikame Rubanga oyero. Jo kame piemo kede nogo kobino ngolo ne gi kop. 3Pien jo kame timo gikame beco likame lworo jopug, do jo kame timo gikame reco en kame lworo gi. Mam imitunu be kur ibedunu kede lworo i kom ngat kame tie kede akarunikin me apugan? Aso timunu gikame ber di en eko bino pwono wu, 4piento en etie ngatic ka Rubanga pi bero wu. Do ka itimunu gikame rac, bedunu kede lworo, pien likame en emako epima me nono; en ngatic kame kelo lilo ka Rubanga i kom jo kame timo gikarac. 5Pi mano, ngat acelacel poore bedo kede wor, likame pi gengo lilo ka Rubanga kenekene, do da pi ngec me cunye.

6 # Matayo 22.21; Marako 12.17; Luka 20.25 Pi kop acel nono en omio i gelunu esolo, pien wegi apugan, jo kame timo tic noni obedo jotic ka Rubanga. 7Culunu gin dedede gikame ipoorenu pi culo ne ngat acelacel; gelunu esolo but jo kame kopoore culo esolo but gi, culunu esolo me jame ne jo kame kopoore culo ne gi, worunu ngat kame poore awora.

Amara but Jo Icegun

8Kur ibedunu kede banya ka ngatamoro, do kenekene marerenu kenu kenu, pien ngat kame maro dano ocelu udo ecobo iswil kakare. 9#Yai 20.13-15, 17; Iswilia 5.17-19, 21; Jolebi 19.18Cik kame waco be, “Kur itimo adote; Kur ineko; Kur ikwalo; Kur ingobelo jame me jo”; kede cik ace apat dedede, oribere i kop kame waco be, “Mar dano wadu bala kite kame imarere kede keni.” 10Amara likame timo ne dano wadu raco; pi mano, amara en kame cobo Iswil kakare.

11Medo i wi mano, wun ingeunu kare kame otienu iye, esawa oromo do me wun cei ki wang nino, pien alako otieko do doko iyapiyapi kede wa lono i kare kame bin ocako kede yei; 12iwor otieko kato sek, iceng otieko tuno. Wek do oucunu tenge tice me colo, di okounu ngapo jame me yi i lero. 13Obedunu kede tim kame kelo wor bala otienu i dier iceng, likame bedo kede yomcuny arac kede amera, likame timo caro arabo mit me lewic, likame lok arabo timo nyeko. 14Do ngapunu Rwot Yesu Kirisito bala egoe, di likame ikounu tamo pi kuo me kom kede pi cobo mit mege.

Currently Selected:

Joroma 13: BILKDC13

Highlight

Copy

Compare