2 Makabi 1
1
Baluwa but Iyudayan kame tie Misiri
1Iyudayan me Yerusalem kede Yudea bin oko wandiko baluwa but Iyudayan wad gi koudo tie Misiri. Baluwa nono oudo waco kaman:
Amot kede mulem me ateni bed butu.
2Wan okwao be Rubanga tim ne wu bero di eko yutuno isikan mere kame bin en etimo kede Aburaam, Isaka, kede Yakobo, gin jotic mege koudo genere. 3Wan okwao be emi wu ibedunu kede cuny kame mito wore kede timo gikame en emito kede cuny wu lung kede kuo wu lung. 4Wan okwae emi wu cuny kame maro iswil kede cik mege, kede emi wu mulem. 5Okwae ewiny ilega wu, esasiro wu, doko kur ejal wu i kare me peko. 6Wan dedede otie lego piru ki kan.
7“I mwaka me tol acel kede ot kanyape kiwie kanyangon (169),#1.7 Manoni riamo kede mwaka me tol acel kede ot ongwon kiwie adek (143) di pwodi likame konywalo Kirisito. i kare kame Demeterio me are en koudo obedo abaka me Siria, wan oudo owandiko baluwa but wu pi tatamo ne wu kop me itidil kede kuo atek koudo oko poto ne wa i mwakini me jemo ka Yasoni ne apugan me Lobo Kacil. 8Yasoni kede jo mege oudo oko wango irutei me tempulo doko kiko neneko jo kalikame oudo tie kede raco moro. Wan oko lego but Rwot di en eko gamo i lega wa. Wan oko mino giayala me leini, giayala me alos, ocwinyo italan i tempulo, di oko cibo mugati kame komio but Rubanga i wi emesa. 9Pi mano, wan nataman okwao wu pi tedo ebaga kame cal bala Ebaga me Kimere i duwe me Kisileb. Wan owandiko ne wun baluwa noni i mwaka me tol acel kede ot kanyauni kiwie kanyauni (188).”#1.9 Manoni riamo kede mwaka me tol acel kede ot are kiwie ongwon (124) di pwodi likame konywalo Kirisito.
Baluwa but Arisitobulo
To ka Abaka Antiokus
10Iyudayan me Yerusalem kede Yudea da oudo owandiko baluwa sek kame waco kaman:
“Baluwa kowok kibut Iyudayan me Yerusalem kede Yudea, kansulo me Iyudayan, kede Yuda, but Arisitobulo, dano kame yai ki diakal me josaseredoti, ngapwony ka Abaka Potolemi, kede but Iyudayan kame tie Misiri, wan omoto wu doko okwao ne wu yotkom.
11“Wan opwoyo Rubanga piento en elako wan ki twon peko. En ecungo i bad wa kakame oikere kede pi yi kede abaka, 12di eko riamo jokwor tenge ki bomba wa kacil. 13#1 Makabi 6.1-4; 2 Makabi 9.1-10Kakame Abaka Antiokus oudo otuno kede Pasia, isirikalen mege oudo neeno bala likame kotwero bwono, do oko bin ngolongolo gi i adulion i tempulo ka Nanea, rubanga adako; manono bin otimere pi tim me angalo kame josaseredoti ka Nanea oudo oko tic kede. 14Abaka Antiokus oudo oko ot i tempulo kede jo pi mino tam mege mogo kame oudo egeno, tetekeny en amoto enyom rubanga adako nono di en eko udo jamini atot me wel, jamini me tempulo bala giamia me nyom. 15Kakame josaseredoti me tempulo ka Nanea oudo otieko napo kede jamini me wel nogo, Antiokus kede jo mege mogo anonok oko donyo i tempulo pi omo jamini nogo. Josaseredoti ka Nanea oko cego ekeko di kiko gono gi i ot. 16Gin kiko yabo ekeko me mung, kame oudo tie i wi ot, di gin kiko uco kide apek i kom Antiokus kede jo mege, di kiko neneko gi. Di do gin kiko ngolongolo kom jo nogo, kiko ngolongolo wi gi di kiko uco gi ne jo koudo tie ooko. 17Opakunu Rubanga pien eko mino jo areco nogo alola! Opakenu pi jamini dedede!
Mac Owango Giayala ka Nekemia
18“I buto duwe ot are kiwie kany me duwe me Kisileb, wan obino tedo Ebaga me Lonyo tempulo, manoni en komio wan oko tamo be poore okwenyaro wu, tetekeny wuda itedunu Ebaga me Kimere kede me mac kame bin komio kakame Nekemia, ngat kame bin ogero tempulo kede alutari, omio kede giayala. 19I kare kame bin kotie tero kede joakwari wa Pasia pi bedo iye bala mabus, josaseredoti mogo anonok koudo keto cuny gi i edini bin oko kwanyo mac ki alutari, di gin kiko kane i bur me pii kotuo. Gin bin kikano mac nono kan kalikame ngatamoro oko ude kede. 20Di do bin mwakini atot atota otieko kato, i kare kame do Rubanga oudo opwoyo, abaka me Pasia bin oko dwoko Nekemia Yerusalem. Nekemia bin oko waco ne ikwae me josaseredoti nogo pi mono mac kame oudo kokano nono. Gin kiko dwoko kop but wan be gin likame kiudo mac moro, kwanyo kenekene gimoro acal bala mo. Nekemia bin oko waco ne gi be kitwom ginono di kiko tero ne. 21Kakame bin kotieko cibo kede gi dedede koudo mitere me giayala i wi alutari, Nekemia oko waco ne josaseredoti be kiony gikame cal bala mo nono i kom yen kede i kom giayala. 22Kakame oudo kotieko timo kede manono, i ngei isawan mogo, ceng kame oudo idoun oumo oko yabere di eko rieny, oyotoyot di gi dedede koudo tie i wi alutari oko mako mac. Jo dedede oko uro. 23Kakame mac oudo tie wango kede giayala, Jonasan Ngatel me Josaseredoti oko telo ilega, di Nekemia kede jo dedede da oko donyo ilega.
Ilega ka Nekemia
24“Nekemia oudo oko lego kaman: ‘Okwe Rwot Rubanga, ngat kocweo jamini dedede, in ipoore me alwora doko itek, aso di in idwong kede cuny me kisa doko ingolo kop kakare. In keni en ibedo abaka, doko in en imwol; 25in keni en kame imio wan gi dedede kame omito, in keni en kame ingolo kop kakare, in en won twer doko ibedo nakanaka. In en ibedo lako jo Isirael ki peko dedede. In bin iyero joakwari wa pi bedo jo ni amaki. 26Wan okwai iyei gamo giayala noni kame wan nataman otie mini pi jo Isirael dedede, gwok wan jo ni kame iyero di iko mino wa obed jokacil. 27Gony jo wa kame tie ipasun i lobere me obukui di iko coko gi idwok gi paco. Bed kede cuny me kisa but jo wa kame kotie tero kirac di kocao gi, tetekeny jo me atekerin apat dedede ngei be in en Rubanga wan. 28Mi alola but jogero kame tero wa kirac di kiwakere. 29Di iko sipakino jo ni i lobo ni kacil, bala kame Musa bin owaco be ibino timo.’ ”
Abaka me Pasia Owinyo Kop me Mac nono
30“Di do josaseredoti oko donyo wero were me pwoc. 31I ngei giayala wang, Nekemia oko mino cik be ony donge me gi acal bala mo nono i kom kide mogo adongo. 32Kakame oko timo kede kamanono, kide nogo oko liel; do kakame mac me alutari oko liel kede, mac me kide nogo oko to.
33“Rwonge me gi kotimere noni oko winyere kabedere dedede. Abaka me Pasia oko winyo be koudo mo moro kabedo kame josaseredoti oudo okano iye mac me alutari, di oudo pwodi likame kotero gi obukui bala mabus. Jo oko waco ne abaka nono da bobo be, Nekemia kede jowote oudo oko tic kede mo nono me wango giayala i wi alutari. 34Abaka oko ngingico kop nono di eko udo be etie kop me ateni. En eko mino jo oko celo kabedo nono di en eko loke edoko kabedo kacil. 35Kabedo nono oko doko gikame kelo sente ne abaka, di en eko donyo tic kede sente nogo bala giamia but jo kame cunye mito. 36Nekemia kede jowote oko lwongo gikame cal bala mo nono be nepitar kame dwong mere en ‘lonyere,’ do jo atot oudo lwonge be ‘napita.’
Currently Selected:
2 Makabi 1: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.