Roma 16
16
Paulo a roman ko ŋutu ka ’de ka ’de
1Nan ŋilo nyönyökökiŋdyö ta kulya ti Poibe kiaser nikaŋ, nagon parakiŋdya i kanisa na gwon Kenkuria nu. 2Wuni ta lepeŋ ’bura i karin ti Matat, gwoso nagon ŋutu ti Ŋun ködyö kokoŋdi na, paraki ta lepeŋ i no liŋ nagon nye ’de ’deggi kune, kogwon lepeŋ a parakiŋdya ŋutu jore ju nan köti.
3 #
Kon 18.2
Rombi ta Pirisika se ko Akwila logon a kita ko nan i pirit na geleŋ ko Kristo Yesu i mugun kilo; 4lepeŋat a pakiŋdya ru nase kogwon kulya kwe. Nan a lyöŋön ko se parik, ti gwon a nan ka ’de lo lyöŋön, ama kanisajin liŋ ti ŋutu ti jurön köti a lyöŋön ko se.
5Köti rombi ta ŋutu logon momora kase kadi i kwakwaddu a kanisa kilo. Rombi ta Epaineto ju liŋ lo nyanyara logon a lo kokwe i yubbö na Kristo i Asia yu lo. 6Rombi ta Maria nagon a kitakiŋdya ta parik ŋina. 7Rombi ta Aŋöaroniko se ko Yunia logon a ŋutu kwe ti jur, logon yi köju a gwon ko se i kadi rereket kulo, lepeŋat a kwön i kiden na luyökie, a iŋge wuju Kristo köyö ŋerot.
8Rombi ta Ampuliato ju liŋ lo nyanyara ko Matat i mugun ŋilo.
9Rombi ta Urbano lo kita koyi i pirit na geleŋ ko Kristo i mugun, se ko Seta-kusa ju liŋ lo nyanyara lo. 10Rombi ta Apele logon a kurwe a lo ’but i kitakiŋdya na Kristo. Rombi ta ŋutu lo gwon ko Aristobulo midi kilo. 11Rombi ta Erodiona ŋuto likaŋ lo jur ŋilo. Rombi ta ŋutu ti Matat lo gwon ko Narkiso midi kilo. 12Rombi ta Turupaina se ko Turuposa nagon kitakiŋdya Matat kine. Rombi ta Persi ju nio na nyanyara nagon a kitakiŋdya Matat parik ŋina. 13#Mar 15.21Rombi ta Rupo ŋuto lo ’but bia parik lo Matat, se ko ŋöte nagon nan köti luŋ a yaŋgo ŋina.
14Rombi ta Asunkrito, ko Peleŋon, ko Erme, ko Patroba, ko Erma, se ko luŋasirik kayupök lo gwon ko se kilo.
15Rombi ta Pilolŋgo, ko Yulia, ko Nereo se ko kiaser nanyit, ko Olumpa se ko ŋutu liŋ ti Ŋun lo gwon ko se kilo.
16Rome ta ko ’börik ko ’bi ’biyet nake. Ŋutu liŋ ti Kristo logon a momora a kanisajin kulo roman ko ta.
17Nan mo ’yu ta luŋasirik, meddi ta ’bura i kulya ti ŋutu logon tiŋdu ŋutu i kökoroja, a tulyaŋgi ŋutu, a todiŋdye todinesi na gwon ka ’de ti gwon gwoso nagon ta a wu kine. Gwe ta pajo ko lepeŋat, 18kogwon ŋutu gwoso kilo ’bayin kitakiŋdya Kristo Matat likaŋ, ama lepeŋat kita pelela kase. A lepeŋat mumuluŋge töilyet ti ŋutu logon ’bak kulya kulo ko jamesi lo paleleŋ se ko kulyaesi ’bu ’busesi. 19Twöju nasu na Kristo aje kuörö i ŋutu liŋ, nyena ko ŋina kwe nan a lyöŋön ko ta. Ama nan ködyö ’de ’dekan adi ti ta gwe gwoso ŋutu lokoŋ i deŋdya na ŋo na ’but, ama ti ta gwe gwoso lupudiet logon ti den kulya narok kilo. 20A i diŋit a na ’dit a Ŋun logon taliŋ gwon ko lepeŋ lo mo tiŋdi ta i ryokakiŋdya na Satani kak. Ti ’busan na Yesu Kristo Matat likaŋ gwe ko ta.
21 #
Kon 16.1
Timoteo logon yi kita i pirit na geleŋ lo roman ko ta. Köti ŋutu kwe ti jur logon a ko Lukio, ko Yasona se ko Sosipater roman ko ta. 22Nan Tertio lo wuŋö ŋina leta lo roman ko ta ko Matat i mugun. 23#Kon 19.29; 1 Kor 1.14; 2 Tim 4.20Gayo logon a wuju nan a kömutöt, ko köti a wuju ŋutu liŋ lo momora a kanisa kulo lepeŋ a roman ko ta. Erasito ka ’delanit lo gurut ti köji se ko luŋaser likaŋ Kwarto roman ko ta. [ 24Ti ’busan na Yesu Kristo Matat likaŋ gwe ko ta liŋ. Amin.]
Pupuresi ti ’dutet
25Nyena ti bulet gwe ko Ŋun logon bubulö tiŋdu ta i gwo ’dan go i Loŋe Lo ’but logon nan a jakin ta lo, iŋkoi, anyen gwo ’dan go i todinesi nagon nan a tokukin ta i kulya ti Yesu Kristo kine. Ŋilo Loŋe Lo ’but a ŋo nagon a lwön logon köju a ’beron ’dela adi mit,
26ama soŋinana aje kweye köke, ko a tiki i dena ko jurön liŋ, anyen tiŋdu ŋutu liŋ i yubbö ko i twöju. Kine kulya Ŋun lo yeŋ nyin lo sarakiŋdya, a nebijin köti iŋge wuŋö se. 27Ŋun geleŋ logon a lokoŋ lo, ti bulet gwe ko lepeŋ kogwon Yesu Kristo ŋupi ŋupi! Amin.
Bari Bible © United Bible Societies, 1979.