Tolupesi 2
2
ŋutu logon ga ’yu koŋon wuju kulya na ’but
1ŋuro lio, ko do a yiŋ kulyaesi kwe,
a ’delakindye saresi kwe konut i töili,
2a pakindye swö kulök i yiŋga na koŋon,
a petakindye töili ilot i kurundyö na kulya,
3iŋkoi, ko do a mulundyö timundya na kulya i ŋarakindya na do a do luŋgi kurundyö na kulya ko riŋit,
4ko do a ga nye gwoso podo a do ga ’yi nye gwoso tukworien na ’dela;
5ko do a kondya sona a do mo kurundye ko kuka na MATAT a nyo,
a do mo ryeji ko dendya na ŋun a nyo.
6Kogwon MATAT nye lo tindu koŋon;
a dendya se ko kurundyö na kulya suluundye kanyit.
7A nye ’delakindye ŋutu logon ko loti lo rigwo yeyeesi nakoŋ,
a nye gwe a ’buku gayet na ŋutu lo gwon ko gwiliŋit na to ’diri.
8Lepeŋ titi kikolin ti ’duŋgo na kulya gwogwo,
a toi ’bura kikolin ti katwoyok kanyit.
9A kirut do mo kuru kurun ko loti lo ’but lo rigwo ko liliet na ’but ko torigwo a nyo,
kweja adi a kikolin liŋ logon tu i gwiliŋit lo ’but.
10A koŋon mo lupöni konut i töili, a kodudwo inot mo lyoŋi lyoŋon ko denesi.
11A totolok mo na toi do, a kurundyö na kulya mo gaji do,
12i lwökundyö na do i kikolin ti ŋutu lorok,
logon jamesi kase totogiŋa.
13Kilo ŋutu a renya kikolin ti torigwo,
a woroni i gwokiot logon tu i mudwe,
14kilo a ŋutu logon lyölyöŋi i kondya na toron,
a nyolani i toron na totogiŋa;
15logon kikolin kase a lukwolorok, a gwiliŋisi kase neneŋeji neneŋeja.
16A totolok mo lwöggi do i be ’ya na ŋuto nagon a kalupe, kode i ŋuto nagon a lwakatyo nagon jambu kulya lulukesi,
17na yandu lalet logon ja yemba lepeŋ i tuko ’disen nanyit,
a iŋge boŋo milye logon nye a milyeju ko ŋun lonyit i komor lo;
18kogwon kiko lo lulurara kak i twan gwon kanyit midi,
a gwokiot kanyit iti i ŋutu lutwatwa.
19ŋutu ’bayin lo tu ko lepeŋ yu logon a yitwe bot, a se tine ryo kikolin logon tu i ru.
20Nyena a do mo woroni i kikolin ti ŋuto lo ’but, i kebbu na gwokiot ti ŋutu ti loti lo rigwo.
21Kogwon ŋutu ti loti lo rigwo mo gwolor i na kak,
a ŋutu logon ’bak kulya mo lo yeŋe kata,
22ama a ŋutu lorok mo gelajine kaŋo i kak ni, a kadumak mo gwunyoni kaŋo kata asut.
Bari Bible © United Bible Societies, 1979.