Osea 2
2
1Nyena a do mo kulyani ko lupösurök adi, Ta a ŋutu kwe, koti a mo kulyani ko kiosurok adi, Ta aje woŋorikin konyen.
MATAT nyanyar ŋutu kanyit logon a ŋaju lepeŋ
2Ŋuti ’bayin a nakwan nio, a nan tine gwon a lalet lonyit,
ama tiddye ta takiŋdya Leŋeŋ adi ti nye koloki meddya ko komor na towuton,
ko ti nye koloki momoka na kinasi kanyit ti kaluŋe;
3an nan rusun boŋgwat kanyit kaŋo,
a kolokiŋdye Lepeŋ a limu kana gwoso i lor lo yuŋwe ’i nye koju lu,
a koŋdi Lepeŋ gwoso yobu kana, a tiŋdi Lepeŋ i gwon gwoso kak nateyon,
a kolokiŋdye Lepeŋ i twan ko kure.
4Nan mo koti ti won konyen ko ŋwajik kanyit,
kogwon se a ŋwajik lo rye i kiko lo towuton.
5Kogwon ŋote nase a koŋdya towuton;
nye na yupuŋdyö se na a koŋdya arabat ’bak yu na kwe,
kogwon Lepeŋ kulya adi, Nan de tutu ko kanyarak kwe yu,
logon titikin nan kinyo lio se ko pioŋ kwe na mamata,
a tiŋdi nan kupir ti köbilu se ko waratat pisite nagon gweya a boŋgwat kwe,
ko welet nio se ko yawa kwe.
6Nyena nan MATAT mo ririki kiko lonyit ko kikwa,
a nan mo ’duŋge mariŋ nagon teŋgu Lepeŋ, anyen nye gwon ti ryo kikolin kanyit.
7Nye mo kekeporo kanyarak kanyit,
ama a nye mo tine ryo se, nye mo gagalara se,
ama a nye mo tine ŋu se.
A kirut nye mo kulyani adi,
Nan mo yiyitwe i lalet lio lo kokwe,
kogwon koju a na ’but koyo Iwo-lwöŋ na soŋinana na.
8A nye tine den adi ŋilo a nan koju lo tiŋdu nye ’bolot, ko binyo,
se ko welet, a nan iŋge tikin Lepeŋ podo se ko dakaŋ jore parik nagon se kitakiŋdye Bala.
9Nyena nan mo nyonyökörö ’bolot kwe i diŋit nase, ko binyo kwe i diŋit nase;
a nan mo ’dumaddi kupir ti köbilu se ko waratat nio pisite nagon gweya a boŋgwat nagon ködyo muggo to ’buson nan-yit.
10Nyena a nan mo panyakiŋdye towuton nanyit köke i komor na kanyarak kanyit,
a lele ŋuto mo gwe ’bayin logon lwököddu Lepeŋ koyo i konisi.
11A nan mo to ’duddye lyoŋon nanyit liŋ,
kweja adi roriot kanyit, ko diŋitan kanyit ti yaŋa la wilo, ko ti sabatajin kanyit,
se ko roriot kanyit liŋ lo wulwe.
12A nan mo kököröji kaden kanyit ti binyo se ko kaden kanyit ti ki ’bi,
logon nye kulyari adi, Kulo a ropesi kwe logon kanyarak kwe a tikin nan kulo.
Nan MATAT mo kökon se a rudu, a kijakwa ti mu ’diŋ mo nyesi se.
13A nan mo riŋge lepeŋ kogwon perok ti roriot logon konaki Balajin,
i diŋit nagon lepeŋ ’yurakiŋdye se bökur,
a tokweleŋdi mugun ko re ti swo se ko palia ti murut. a galaddi kanyarak kanyit, a boponi nan nu.
Kilo a kulyaesi kwe ti MATAT.
14Nyenagon, mete, nan mo lulu-kun Lepeŋ,
a joŋgi Lepeŋ mu ’diŋ, a jamakiŋdye Lepeŋ kulyaesi lo ’but.
15 #
Yos 7.24-26
Nyu a nan mo nyokokiŋdye Lepeŋ lukobiot kanyit ti kaden ti binyo,
a koŋdi ŋirit na ’dir na luŋu a Sasanyesi anyen wora a kotumit Yenet na kulya na ’but.
Nyu a nye mo ruŋge gwoso i perok ti tuko ’disen nanyit,
na pori nye kaŋo i jur lo Ejipeto nu.
16Nan MATAT lo kulya adi, i ŋilu lor nye mo luluŋ nan adi nan a lalet lonyit,
a nye koti mo tine luŋgu nan adi nan a Balas#2.16 BalaKine a karin ti ŋun lo Kanana nagon nyonyoko adi Matat, ama kine karin koti nyonyoko adi, Lalet lonyit.
17Kogwon nan mo seseyara karin ti Balajin kaŋo kanyit i kutuk, a karin kase mo koti tine ’dinya kwoŋ.
18I ŋilu lor a nan mo tetenakiŋdye ŋutu ti Yisaraele tomoret ko kijakwa ti mu ’diŋ, ko kwen ti ki, se ko ŋo lo gwoŋtu kak; a nan mo ’be ’beleŋgi daŋin, ko baŋdujin, se ko tito moriesi i Jur, a nan mo tiŋdi ta i doto ’bak kujono. 19A nan mo koti yembi do Jur lo Yisaraele a nakwan nio ŋupi, iŋkoi, a nan mo yemuŋdye do ko torigwo, ko lilija na kulya gwogwo, ko nyaŋu nagon ti ’duddyo kwoŋ, se kowon na konyen. 20A nan mo yemuŋdye do a mo tine loruggo; a do mo deŋdi nan MATAT. 21a nan MATAT kulyani adi, I Ŋilu lor nan mo ruruk ŋiyet na ’dikolo, a ’dikolo mo ruddye ruggo kak, 22A kak mo ruddye ruggo ’bolot, ko binyo, se ko welet, a kine ŋo mo ruddye ruggo Yejerele, 23#Rom 9.25; 1 Pet 2.10a nan mo wekiŋdye ŋutu ti Yisaraele i kak nase a nyomot kwe, a nan mo won konyen ko se na luŋu a Paya, a nan mo kulyani ko se lo luŋu a Luŋai adi, Ta a ŋutu kwe, a se mo kulyani adi, Do a Ŋun likaŋ.
Bari Bible © United Bible Societies, 1979.