Yuörö 24

Tetena na tomoret

1A MATAT kulyani ko Mose adi, Kiyuŋdye ta ki köyö ni, do ko Arona, ko Nadaba, ko Abiu se ko temejik ti Yisaraele merya buryo, ko dulakiŋdye ta ’börik kak pajo. 2Do Mose geleŋ kodyo lo mijun nyona köyö ko MATAT ni; ama a se tine mijun nyona, Köti ti lele ŋuto gwe ti kiyuŋdya ki ko do i pirit na geleŋ.

3A Mose ko poŋdi a nyönyökökiŋdye Ŋutu kulyaesi liŋ ti MATAT se ko saresi liŋ; a Ŋutu liŋ ruŋge ko gworo geleŋ adi, Kulyaesi liŋ logon MATAT a kulyari kilo yi mo kökon se. 4A Mose wuŋe kulyaesi liŋ ti MATAT, a nye ŋine ki ko ’bure ’beron, a gweji pirit ’yuret na rubaŋgajin i mere mukök, a Köti togwi ’dikiŋdye ŋurupö puök wot murek ki gwoso i kötumitön puök wot murek ti Yisaraele kune. 5A nye soŋdi ŋwajik teton ti Ŋutu ti Yisaraele, anyen se wu-kiŋdya rubaŋgajin lo ’yu ’yura ’buluŋ, a ’duŋökiŋdye MATAT dwönin a rubaŋgajin ti taliŋ. 6A Mose ’dumuŋdye kunie rima a tiŋdi i kalabajin, a gwa-gwaddi pirit ’yuret na rubaŋgajin ko kunie rima na pituŋdyö kune. 7A nye ’dumuŋdye buk na tomoret, a keŋdi a Ŋutu kulo gwe i yiŋga; a se kulyani adi, ŋo liŋ nagon MATAT a kulyari kine yi de kökon, a yi de twöni twö. 8#Mat 26.28; Mar 14.24; Luk 22.20; 1 Kor 11.25; Eb 10.29; Eb 9.19, 20 A Mose ’dumuŋdye kine rima a gwagwaddi ko Ŋutu ki kulya adi, Mete ta, kine a rima ti tomoret nagon MATAT a teten ko ta na i kulya ti kilo kulyaesi liŋ.

9A kirut Mose, ko Arona, ko Nadaba, ko Abiu, se ko temejik ti Yisaraele merya buryo kulo kiyaddi ki, 10a se meddi ŋun lo Yisaraele; a i mukök na mokosi kanyit a gwe gwoso kak nagon a liliŋö ko ŋurupö nakwe-kwelen na luŋu a sapira, a gwe a nake gwoso ’diko. 11A MATAT gwe a ko ’bulukin könin lonyit i katökök ti Ŋutu ti Yisaraele; a se meddi ŋun, a se nyesi nyesu a möji möju.

Mose i mere Sinai

12A MATAT kulyani ko Mose adi, Kiyuŋdye köyö ni i mere ko mönuŋdye ni; a nan de tiŋdi do ŋurupö na ’dayatak nagon saresi ko jujuwesi nan a wurökin nyin kune, anyen todiniki lepeŋat. 13A Mose ko Yosua kaparanit lonyit ŋine ki, a Mose kiyaddi ki i mere lo ŋun.

14A nye kulyani ko temejik adi, Möŋdi ta yi ni tojo yi a yitwe kasu ni Köti; mete ta, Arona ko Kur gwon ko ta, ko lele ŋuto gwon ko kulya, a ti lepeŋ poŋdi ko lepeŋat ni.

15A Mose kiyaddi i mere, a luru muŋge mere. 16A minyo lo MATAT gwe i mere Sinai, a luru muŋge lepeŋ ko perok buker, a i lor toburyo lonyit a nye luŋgi Mose i luru lukata. 17A Ŋutu ti Yisaraele meddi minyo lo MATAT i kwe na mere gwoso kimaŋ na ’yu ’yuŋa parik. 18#Nyö 9.9 A Mose lupöni i luru lukata a kiyaddi i mere ki. A Mose iŋge si ’da i mere ko perok merya Iŋwan tuparan ko tukwaje.

Currently Selected:

Yuörö 24: BBE

Highlight

Copy