Yuörö 11

Mose a tuggö twatwa na kayujin

1A MATAT kulyani ko Mose adi, Nene tomiet geleŋ Köti kata nagon nan de jajakin Paro, ko i jur lo Ejipeto; a i mukök a nye mo kölöddi ta; a i diŋit na kölöddi nye ta nu, a nye mo riköddi ta asut. 2Taki lore i Ŋutu liŋ anyen se yiyiŋ, taki se adi ti Ŋutu liŋ mora ko wate ŋadi muluŋdye minyojin ti pödö ko ti dakap ko marate lonyit. 3A MATAT tiŋdi Ŋutu ti Ejipeto töilyet lo ’but i rukökiŋdyö na se. Köti lo Mose a duma parik i jur lo Ejipeto, ko i komor na kölipönök ti Paro, ko i komor na Ŋutu.

4A Mose kulyani adi, MATAT lo kulya adi, I tukwaje kiden nan mo tu i kiden na jur lo Ejipeto; 5a kayujin liŋ ti jur lo Ejipeto mo twatwane twatwa, suluja i ŋuro kayu lo Paro, iŋkoi ŋilo Paro lo si ’da i si ’daet na tumatyan lo, ma ’di tojo ko ŋuro kayu lo ’dupiet na gwon i jijö na; se ko kayujin liŋ ti toro ’bo. 6A Ŋutu ti jur lo Ejipeto ’buku-luŋ mo luluje lulujö parik gwoso nagon Ŋutu ’beron a ko yiŋ a mo Köti tine yiŋ. 7Ama i Ŋutu ti Yisaraele, ma ’di ’dioŋ mo ti ŋaju kutuk i Ŋutu kode i toro ’bo; anyen ta böŋö kuruŋdyö adi MATAT lo tiŋdu koret i kiden na Ŋutu ti Ejipeto ko na Ŋutu ti Yisaraele. 8A kilo kölipönök kulök liŋ mo poŋdi köyö ni, a dulakiŋdye ’börik kak köyö i komor kulya adi, Iti kaŋo do se ko Ŋutu liŋ lo kebbu do kilo. A kirut nan mo iti tu. A Mose lupöni kaŋo ko Paro i komor ko woran na pape. 9A MATAT kulyani ko Mose adi, Paro mo ti ’bön yiŋga ta; anyen sörösi kwe böŋö ŋöŋdi i jur lo Ejipeto. 10A Mose ko Arona iŋge koŋdya kine sörösi liŋ ko Paro i komor; kölumbö a MATAT togo ’yi töili lo Paro, a nye tine kölörö Ŋutu ti Yisaraele kaŋo kanyit i jur.

Currently Selected:

Yuörö 11: BBE

Highlight

Copy