Esetere 7
7
Aman a ko kegga mwön a kölumbö a lepeŋ lo toloni
1A kirut mor ko Aman iti i rorweko mor Esetere yu. 2A i lor tomurek lonyit, nagon se möji binyo nu, a mor nyöggi pija Esetere adi, Do yöŋö nyo pon mor Esetere? Nan de bubulö tiŋdu do. Do ’dek nyo? Nan de bubulö rukökiŋdyö do ma ’di swöt lo tumatyan nio. 3A mor Esetere ruŋge adi, Ko ködyö nan a ryeju ’busan konut i metet pon mor, ko ködyö gwoso i ’deket na mor, böŋö ti ru nio se ko ru na ŋutu kwe ’burukine nan gwoso na yöŋöri nan ko na ’deggi nan na. 4Kogwon nan se ko ŋutu kwe kilo aje tugwöröki i tatua, ko i tukara, ko i toliki asut. Ko nan ködyö a den adi yi lyan ko wate a tugwörö a ’dupi kana, a nan ködyö tine bulö jambu nene ŋo kwöŋ, kogwon ko sona delya nikaŋ ti bulö köŋu kita na mor. 5A kirut mor Akasuwero pipije Esetere adi, Nye ŋona a ŋa, ko lepeŋ liya logon a bu ’ya mugun i koŋdya na ŋo gwoso kine? 6A Esetere nyobbi adi, ŋilo Aman loron lo logon a kapisanit ko a miriku likaŋ! A Aman iŋge rigwökö ko kujönö duma parik ko mor se ko narakwan nanyit i komor. 7A kirut mor ŋine ki ko woran i ŋilu rorwe a luŋöni kaŋo a iti i melesen na mede nanyit na gwon ko köturön na; ama a Aman karaki nyu anyen mamaŋdu ko mor Esetere i rukökiŋdyö na lepeŋ i gwon jörun, kogwon nye aje den adi mor yeyeju konakiŋdya lepeŋ ŋo naron. 8A mor yitwene yitwe i melesen na mede nanyit nagon gwon ko köturön na, a poŋdi i pirit nagon se dika möji binyo na, a ko meddi Aman aje ’doro i nu si ’daet na piriki ’e Esetere nu; a mor kulyani adi, Nye köti de yeyeju lubbö narakwan nio köyö i komor ko köyö i kadi lukata le? A nagon kulyaet a ko nyuŋ ’baka kanyit i kutuk nu, a köliŋönök kanyit muŋge komor na Aman. 9A kirut Karbona logon a kona a ’baŋ ko a köliŋönit lo mor lo kulyani adi, Kölumbö kaden kata lo teten Aman a tolesi ti Mordekai logon kulyaet lonyit a lwöggu mor i twan lo, kilu gwogwo ’dan ko Aman mede, tojolan nase a lokiliŋan merya mukanat. 10a kirut mor kulyani adi, Tole ta lepeŋ nyu. A se to ’yi Aman i kilu kaden logon nye a tetenakin Mordekai kulu. A kirut woran na mor iŋge yukörö.
Bari Bible © United Bible Societies, 1979.