PROBERB 7
7
Ka buit sianti ka nuti
1Ko khun, to sumar
ïa ki ktien jong nga,
bad to ri khop
ïa ki hukum jong nga bad me.
2To sumar ïa ki hukum jong
nga bad to im;
bad ïa ka aiñ jong nga
kum i briew khmat jong me.
3To teh ïa ki
halor la ki shynriah'ti;
to thoh ïa ki
ha u maw lyngkniap
ka dohnud jong me.
4To ong ïa ka jingstad,
“Pha long ka para jong nga;”
bad to ting ka kur jong me
ïa ka jingshemphang:
5ba kin ïoh sumar ïa me
na kata ka kynthei nongwei,
na kata ka nongwei
kaba kren roh da la ki ktien.
6Naba ha ka jingkhang ïit
ka ïing jong nga,
nga la khmih na ka phrah
jong nga;
7te nga la khmih
hapdeng ki babieit,
nga la ïohi hapdeng ki samla,
ïa u samla uba suda
ka jingshemphang,
8ba u da ïaid
na ka lynti shnong
hajan ka dong jong ka,
bad u la leit lynti
sha ka ïing jong ka;
9haba kem ïongreiñ,
ha ka por premmiet,
ha ka jingïong ka miet
bad ka jingdum.
10Te ha khmih,
la ïashem bad u
ka kynthei kaba la riam
kum ka nuti,
bad kaba sianti ka dohnud.
11Ka long kaba bun ktien jam
bad kaba leh mon;
ki kjat jong ka kim neh
ha ka ïing jong ka:
12Mynta ka don
ha ki lynti shnong,
la shibit ka don
ha ki jaka kylluid,
ka ap thap ha ka dong baroh.
13Kumta, ka la bat ïa u,
bad ka la doh ïa u,
bad ka la pyneh ïa la ka khmat
bad ka la ong ha u:
14“Ki jingkñia
ki jingainguh pynïasuk
ki don bad nga;
ha kane ka sngi
nga la sait ïa la ki kular.
15Namar kata, nga la wan mih
ban ïashem bad me;
ban wad biang biang
ïa ka khmat jong me,
te nga la shem ïa me.
16Nga la siang ïa la ka palong
da ki jaiñ siang ba la mutdur,
da ki jaiñ thoh pynïeng
kiba da u ksai Ijipt.
17Nga la pyniwbih
ïa la ka jingthiah
da ka mirr, ka aloes,
bad ka sisia.
18Ale, to ngin ïapynkdang ïa lade
da kaba ïa-ieit haduh mynstep;
to ngin ïa-pynhun ïa lade
da ki jingïa-ieit.
19Naba u tnga jong nga
um don ha ïing,
u la leit jingleit sha jngai.
20U la rah sbai bad u
shi 'saipan;
un sa wan ha la ïing
ynda pyllun bnai.”
21Da la kaba bun
ka jingkren khroh
ka la pynkohnguh ïa u,
da ka jingarsap
ki rmiang shyntur jong ka,
ka la ring bor ïa u.
22U bud ïa ka shisyndon,
kumba leit u masi dab
sha ka jingpynïap,
lane kum ki nar pyndait
ha ka jingpynshitom
ïa kiba bieit;
23tad ynda u khnam u pynpei
ïa ka dohnud jong u;
kumba u sim u pynkloi
ha ka jingriam,
bad um tip
ba ka long ïa ka jingim
jong u.
24Namar kata te, ko khun,
to shahshkor ïa nga,
bad to sngap ïa ki ktien
ka shyntur jong nga.
25Wat ai ba ka dohnud jong me
kan dem sha ki lynti jong ka,
wat leit sakma sha ki lynti ïaid
jong ka.
26Namar shibun ka la pynkyllon
ba la pynmong ïa ki:
bad baroh kiba la pynïap
jong ka
ki long u paidbah bakhraw.
27Ka ïing jong ka,
ka long ka lynti sha ka jingtep,
kaba leit hiar
sha ki kamra ka jingïap.
The Bible Society of India