PROBERB 26
26
1Kum ka ïor mynlyiur,
bad kum u slap ha ka aïom ot,
kumta ka burom
kam i dei ïa u babieit.
2Kum u sim ïing
ha la ka jingher sakma,
kum u lyntait ha la ka jingher,
kumta ka jingtim
kaba khlem daw, kam wan.
3Ka jingsympat ïa u kulai,
u lakam ïa ka kadda,
bad u thri ïa ka ingdong
ki babieit.
4Wat phai ktien ïa u babieit
katba kum ka jingbieit jong u,
ïoh ba me ruh
men long syriem ïa u.
5To phai ktien ïa u babieit
katba kum ka jingbieit jong u,
ïoh ba un long u bastad
ha la ka jong ka jingñiew.
6Uta uba phah lam ktien
da u babieit
u ot noh ïa la ki jong ki kjat,
bad u dih ïa ka jingduh.
7Ki kjat jong u ba-dkoh
ki shu sdien tyngjang:
kumta long ka pharshi
ha ka shyntur ki babieit.
8Kum ki mawlynnai shi pla
ha ka kynton maw,
kumta long uba burom
ïa u bieit.
9Kum u shiah
uba ngam sha ka kti
uba buaid,
kumta, long ka pharshi
ha ka shyntur ki babieit.
10Kum u nongsiat khnam
uba pynmynsaw ïa baroh,
kumta, long uba wer nong
ïa u babieit
bad uba wer nong
ïa kita kiba shu wan lap.
11 #
2 Pet. 2:22. Kum u ksew uba leit phai
sha la ka prie,
kumta long u babieit
uba nang leh nang leh
ïa la ka jingbieit.
12Me ïohi ïa u bastad
ha la ka jong ka jingñiew?
kham kyrmen ïa uba bieit
ban kum ïa uta.
13Uba alhia u ong,
“Don u sing ha lynti;
u sing u don
ha ki lynti shnong.”
14Kumba ka jingkhang
ka phai ha ka tnaw,
kumta u alhia u leh
ha la ka jingthiah.
15U alhia u thep ïa la ka kti
ha ka pliang;
u sngewshitom ban rah
ïa ka pat sha la ka shyntur.
16U alhia u kham stad
ha la ka jong ka jingñiew
ban ïa hynñiew ngut
kiba sei nia.
17Uta uba shu ïaid najan,
bad u pynshitom ïa lade
ha ka jingïaleh
ka bymdei ei ei ïa u,
u long kum uba bat ïa u ksew
na ki shkor.
18Kum uba lamwir
uba shat ïa ki dieng tyllaw,
ïa ki khnam, bad ïa ka jingïap;
19kumta, long u briew
uba shukor ïa la u paramarjan,
bad uba ong,
“Nga leh thamula ne em?”
20Ha bymdon dieng shuh
ka lip ka ding:
bad ha ka bymdon uba lorni,
ka duh ka jingïapyneh.
21Kumba long
ka 'dewïong ïa ki rnga barhem,
ki dieng ïa ka ding;
kumta long u briew
uba shait ïakajia
ban pynmeh ïa ka jingïaleh.
22Ki ktien uba lorni
ki long ki khutia babang,
bad ki hiar sha ki bynta
ba kham shapoh jong ka kpoh.
23Ki rmiang shyntur kiba shit
bad ka dohnud bymman
ki long kum u khiew khyndew
ba la suit da ka eit rupa.
24Uta uba shun u leh arsap
da la ki rmiang shyntur,
hynrei, u tyngkai
ïa ka jingshukor
hapoh jong u:
25haba u kren jem,
wat ngeit ïa u;
naba hynñiew ki jingijli
ki don ha ka dohnud jong u:
26la ka jingshun jong u
ka tap ïa lade
da ka jingshukor,
ïa ka jingbymman jong u
yn pynpaw shai
ha khmat ka jingïaseng.
27Jar uba tih ïa ka 'liewlep
un hap ha ka:
bad uta uba pyntyllun
ïa u maw,
un wan phai halor jong u.
28U thylliej uba lamler
u shun ïa kita
kiba u la pynmong;
bad ka shyntur kaba arsap
ka pynlong ka jingpynjot.
The Bible Society of India