JINGKHEIÑ 31
31
Ka jingpynhiar kput ïa ki Midian bad ka jingpynkhuid ïa ka jinglute
1Bad U Trai u la kren ha u Moses, u da ong, 2“To pynhiar kput halor ki Midian na ka bynta ki khun Israel: hadien kata, yn ïalum lang ïa me ha ki briew jong me.” 3U Moses te u la kren ha uta u paidbah, u da ong, “To kieng atiar ïa ki rangbah napdeng jong phi ïa ka ban ïaleh thma, te kin mih ïaleh pyrshah ïa ki Midian, ïa ka ban pynhiar kput halor kita ki Midian na ka bynta U Trai. 4Phin phah shi hajar hajar shi jaid, na ki jaid Israel baroh, sha kata ka jaka thma.” 5Kumta, la pynmih noh na ki hajar Israel, shi hajar hajar na shi jaid baroh, khat-ar hajar keiñ kiba la kieng atiar ïa kata ka thma. 6Te u Moses u la phah noh ïa ki sha kata ka thma, shi hajar hajar na shi jaid baroh, ïa ki bad u Phinehas u khun u Eleasar lyngdoh, sha kata ka thma, lem bad ki jingbuh ki bakyntang, bad ki ronsing ban put ha ka kti jong u. 7Te ki la ïaleh thma ïa ki Midian, kumba u la hukum U Trai ïa u Moses; bad ki la pynïap ïa ki shynrang baroh. 8Bad nalor kita kiwei ïa kiba la pynïap, ki la pynïap ruh ïa ki syiem ki Midian: ïa u Ebi, bad ïa u Rekem, bad ïa u Sur, bad ïa u Hur, bad ïa u Reba, san ngut ki syiem ki Midian: ïa u Balaam ruh u khun u Beor, ki la pynïap da ka waitlam. 9Ki khun Israel ki la kem mraw ruh ïa ki kynthei ki Midian, bad ïa ki khun khynnah jong ki; ki la lute ruh ïa ki jingri jong ki baroh, bad ïa ki kynhun jong ki baroh, bad ïa ki spah jong ki baroh. 10Ïa ki nongbah jong ki baroh ruh ha kiba ki la ïashong sah, bad ïa ki kut skhem baroh jong ki, ki la thang da ka ding. 11Hynrei, ki la shim ïa ka jingkurup baroh, bad ïa ka jinglute baroh, kita kiba na ki briew, bad na ki jingri ruh. 12Bad ki la ïawallam ïa kiba la kem mraw, bad ïa kita ki jinglute, bad ïa kata ka jingkurup, ha u Moses, bad ha u Eleasar lyngdoh, bad ha u paidlang ki khun Israel, ha ka jaka shong dara kaba ha ki pyntha ka ri Moab, kiba hajan ka Jordan marpyrshah ka Jerikho.
13Te u Moses, bad u Eleasar lyngdoh, bad ki rangbah baroh jong u paidlang, ki la ïamih noh ban leit tan ïa ki shabar ka jaka shong dara. 14Te u Moses u la sngewbitar eh ïa ki rangbah ki nongïapom, ïa ki rangbah ki hajar, bad ïa ki rangbah ki spah, kiba la ïawan phai na kata ka jingïaleh thma. 15U Moses u la ong ruh ha ki, “Hato phi la ri pynim ïa ki kynthei baroh? 16#Jpw. 2:14.Ha khmih, ki dei kine, da ka buit u Balaam, kiba la pynwan ïa ki khun Israel ïa ka ban leh palat ïa U Trai shaphang u Peor, bad ba la don ka jingïapthem hapdeng u paidlang jong U Trai. 17Mynta te, namar kata, to pynïap noh ïa ki khynnah shynrang baroh, bad to pynïap noh ruh ïa ki kynthei baroh kiba la ïa-ithuh ïa u briew da kaba ki la thiah bad u shynrang. 18Hynrei, ïa ki khynnah kynthei baroh, ki bym shym la ïa-ithuh ïa u briew, phin ri pynim na ka bynta ïa lade. 19Phi te phin ïashong shabar ka jaka shong dara, hynñiew sngi: jar uba la pynïap ïa u briew, bad jar uba la ktah ïa uba la ïap, to phin pynkhuid ïa lade, bad ïa kiba la kem mraw jong phi, ha ka sngi ka balai, bad ha ka sngi ka bahynñiew. 20Ïa ki jaiñ ruh baroh, bad ïa ki jingdiang snieh baroh, bad ïa kiei kiei baroh ïa kiba la thaw da ki 'ñiuh blang, bad ïa ki khiew dieng baroh, to phin pynkhuid keiñ.”
21Bad u Eleasar lyngdoh u la ong de ha kita ki nongïapom, kiba la leit sha kata ka jingïaleh thma, “Kane ka long ka rukom jong kata ka hukum ïa kaba u la hukum U Trai ïa u Moses: 22tang ïa ka ksiar, bad ïa ka rupa, ïa ka rnong, ïa u nar, ïa ka sador, bad ïa ka sisa, 23ïa kaei kaei baroh keiñ kaba lah ban shah ding, phin syaw ha ka ding, te kan long bakhuid; pynban, yn pynkhuid ïa ka da ka um ka jingpynkyntang: te ïa kiei kiei baroh ki bym shah ding, phin pynïaid lyngba ïa ka um. 24Bad phin sait ïa la ki jaiñ ha ka sngi ka bahynñiew, te phin long ba khuid, hadien kata ruh phin ïoh rung hapoh ka jaka shong dara.”
Kaba ïasam ïa ka jinglute
25Te U Trai u la kren ha u Moses, u da ong, 26“To shim ka jingkheiñ jong ki jinglute ba la shim, kita kiba na jong ki briew, bad na jong ki jingri, ma me, bad u Eleasar lyngdoh, bad ki tymmen ki san jong uta u paidlang: 27te phin ïasam marshiteng ïa ka jinglute: hapdeng kita ki nongïapom, kiba la leit ha kata ka thma, bad hapdeng u paidlang baroh: 28bad men shim khrong ïa U Trai na kita ki nongïapom kiba la leit ha kata ka thma: ïa kawei ka mynsiem napdeng sanspah, kata, na kita ki briew, bad na kita ki masi dab, bad na kita ki kadda, bad na kita ki langbrot: 29katta keiñ phin shim na kaba shiteng jong ki, phin ai ruh ïa ka ha u Eleasar lyngdoh, ïa ka ban long ka jingainguh kyntiew ha U Trai. 30Bad na kaba shiteng jong ki khun Israel, phin shim shi bynta na kiba sanphew, na kita ki briew, bad na kita ki masi dab, bad na kita ki kadda, bad na kita ki blang, bad na ki jaid baroh ki jingri, bad phin ai ïa ki ha ki Lebi kiba ap khmih ïa ka jingsumar Ka Tabernakl jong U Trai.” 31Te u Moses, bad u Eleasar lyngdoh, ki la leh kumba u la hukum U Trai ïa u Moses.
32Bad kata ka jinglute, kata kaba dang sah na ka jinglute ïa kaba kita ki nongïapom ki la lah wan kem, ka la long hynriewspah bad hynñiewphew san hajar ki langbrot, 33bad hynñiewphew ar hajar ki masi dab, 34bad hynriewphew wei hajar ki kadda, 35na ki briew ruh, kata, na ki kynthei ki bym shym la ïa-ithuh ïa u briew da kaba thiah lem bad u, laiphew ar hajar ki mynsiem. 36Te kata kaba shiteng, kata ka bynta jong kita kiba la ïaleit sha kata ka thma, ka la don ha ka jingkheiñ, laispah bad laiphew hynñiew hajar sanspah ki langbrot: 37bad ka khrong ka jong U Trai, ka la long na kita ki langbrot, hynriewspah hynñiewphew san. 38Bad kita ki masi dab la don laiphew hynriew hajar; na kita, ka khrong ka jong U Trai ka la long hynñiewphew ar tylli. 39Bad kita ki kadda la don laiphew hajar sanspah; na kita, ka khrong ka jong U Trai ka la long hynriewphew wei. 40Bad kita ki briew la don khathynriew hajar; na kita, ka khrong ka jong U Trai ka la long laiphew ar ngut ki mynsiem. 41Te u Moses u la aiti ïa kata ka khrong, ka jingainguh kyntiew ka jong U Trai, ha u Eleasar lyngdoh, kumba u la hukum U Trai ïa u Moses.
42Te na kata ka shiteng bynta jong ki khun Israel ruh, ïa kaba u Moses, u la pynkyrpang na kita ki nongïapom, 43(te kata ka shiteng kaba la dei ha uta u paidlang na ki langbrot, ki la don laispah laiphew hynñiew hajar sanspah, 44bad na ki masi dab, laiphew hynriew hajar; 45bad na ki kadda, laiphew hajar sanspah, 46bad na ki briew de, khathynriew hajar); 47wat na kata ka shiteng keiñ ka jong ki khun Israel, u Moses u la shim shi bynta na kaba sanphew, kata, na kita ki briew, bad na kita ki jingri, bad u la aiti ïa ki ha ki Lebi, kiba la khmih ïa ka jingsumar Ka Tabernakl U Trai; kumba u la lah hukum U Trai ïa u Moses.
48Te kita ki nongïalam, kiba halor ki hajar kita ki nongïapom, kita ki rangbah ki hajar, bad ki rangbah ki spah, ki la ïawan ha u Moses: 49bad ki la ïa-ong ha u Moses, “Ki shakri jong me ki la shim ïa ka jingkheiñ ïa kita ki nongïapom kiba hapoh ka jingsumar jong ngi, te na ngi, ym don uwei u briew ba la duna. 50Namar kata, ngi la wallam ka jingainguh ha U Trai, uwei uwei kat kiba u la ïoh, na ki jingdeng ksiar, na ki kynjri, ki syngkha, ki sa'ti, ki sohshkor, bad ki 'pieng ksiar, ban pynlong ïa ka jingpynïasuk na ka bynta ki mynsiem jong ngi ha khmat U Trai.” 51Te u Moses, bad u Eleasar lyngdoh, ki la shim na ki ïa ka ksiar, kata, ki jingdeng keiñ ba la thaw baroh. 52Bad kata ka ksiar baroh ka jong ka jingainguh kyntiew, ïa kaba ki la ainguh ha U Trai, na kita ki rangbah ki hajar, bad na kita ki rangbah ki spah, ka la long khathynriew hajar bad hynñiewspah sanphew shekel. 53(Namar kita ki nongïapom ki la lute, uwei uwei baroh na ka bynta ïa lade.) 54Te u Moses bad u Eleasar lyngdoh ki la shim ïa kata ka ksiar jong kita ki rangbah ki hajar, bad ka jong kita ki rangbah ki spah, ki la ïawallam ruh ïa ka ha Ka Tabernakl ka jingïaseng, ïa ka ban long ka jingpynkynmaw na ka bynta ki khun Israel ha khmat U Trai.
Currently Selected:
JINGKHEIÑ 31: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
