JINGKHEIÑ 10

Ki ronsing rupa

1Bad U Trai u la kren ha u Moses, U da ong, 2“To thaw ïa lade ar tylli ki ronsing rupa; na kawei ka dkhot tylli men thaw ïa ki: ba kin long ha me ban khot lang ïa uta u paidlang, bad ïa ka ban pynmih noh ïa kita ki paidlang bashong dara. 3Te haba ki ïa-put ïa ki, uta u paidlang baroh un wan ïalang ha me ha ka jingkhang Ka Tabernakl ka jingïaseng. 4Hynrei, haba ki put tang da kawei, te kita ki rangbah, kiba ha khlieh ki hajar Israel, kin ïalum lang ha me. 5Haba phi put ïa ka jingmaham, te kita ki paidbah kiba ïashong dara shaphang mihngi, kin ïaleit mih noh. 6Haba phi put ar sien ïa ka jingmaham, te kita ki paidbah kiba ïashong dara shaphang shathie, kin ïaleit mih noh: ïa ka ban leit mih noh, kin ïa-put ïa ka jingmaham. 7Te ïa ka ban lum lang ïa u paidlang, phin put ïa ki ronsing; hynrei, wat put ïa ka jingmaham. 8Bad ki khun shynrang u Aaron, ki lyngdoh keiñ, kin put da kita ki ronsing: te kin long ka rukom basah ha phi junom ki pateng la pateng jong phi. 9Bad lada phi leit ïaleh thma ha la ka ri pyrshah ïa u nongshun uba banbeiñ ïa phi, te phin put ïa ka jingmaham da kita ki ronsing; te ïa phi yn kynmaw ha khmat U Trai U Blei jong phi, bad yn pynim ruh ïa phi na ki nongshun jong phi. 10Ha kata ka sngi ka jinglehkmen jong phi ruh, bad ha ki sngi Ki Jingkhawai Niam bakyntang jong phi, bad ha ki jingsdang ki bnai jong phi, phin put da kita ki ronsing halor ki jingainguh thang jong phi, bad halor ki jingkñia bapynïasuk jong phi; ba kin ïoh long ka jingpynkynmaw ha phi ha khmat U Blei jong phi: Nga long U Trai U Blei jong phi.”

Ki Israel ki ïakynriah noh na Sinai

11Bad ka la jia ha ka ba-arphew sngi, ha u bnai u ba-ar, ha ka snem ka ba-ar, ba uta u lyoh u la kyntiew nalor Ka Tabernakl ka jingphla. 12Te ki khun Israel ki la leit mih noh na ka ri khlaw Sinai; bad uta u lyoh u la sah ha ka ri khlaw Paran. 13Kumta, ki la leit mih noh nyngkong da ka hukum U Trai da ka kti u Moses. 14Ha shuwa eh te, ka la leit mih noh ka lama u paidbah ki khun u Judah katba shong ki paidïapom jong ki; te halor u paidbah jong u, u la long u Nahshon u khun u Amminadab. 15Bad halor u paidbah ka jaid ki khun u Issakhar, u la long u Nethaniil u khun u Suar. 16Bad halor u paidbah ka jaid ki khun u Sabulon, u la long u Eliab u khun u Helon.

17Te ïa kata Ka Tabernakl la lied noh; bad ki khun shynrang u Gershon, bad ki khun shynrang u Merari, ki la leit mih noh, ki da ïabah ïa Ka Tabernakl. 18Bad ka lama u paidbah jong u Reuben, ka la leit mih noh katba kum ki paidïapom jong ki: te halor u paidbah jong u, u la long u Elisur u khun u Shedeur. 19Bad halor u paidbah ka jaid ki khun u Simeon, u la long u Shelumiel u khun u Surishaddai. 20Bad halor u paidbah ka jaid ki khun u Gad, u la long u Eliasaph u khun u Deuel.

21Te kita ki Kohath ki la leit mih noh, ki da ïabah ïa ka jaka kyntang: bad kita kiwei ki la lah pynïeng ïa Ka Tabernakl hamar ka por ba ki la poi. 22Bad ka lama u paidbah ki khun u Ephraim, ka la leit mih noh katba kum ki paidïapom jong ki: te halor u paidbah jong u, u la long u Elishama u khun u Ammihud. 23Bad halor u paidbah ka jaid ki khun u Manasseh, u la long u Gamaliel u khun u Pedahsur. 24Bad halor u paidbah ka jaid ki khun u Benjamin, u la long u Abidan u khun u Gideoni.

25Bad ka lama u paidbah ki khun u Dan, uba long khatduh eh na kita ki paidbah baroh, ka la leit mih noh katba kum ki paidïapom jong ki: te halor u paidbah jong u, u la long u Ahieser u khun u Ammishaddai. 26Bad halor u paidbah ka jaid ki khun u Asher, u la long u Pagiel u khun u Okran. 27Bad halor u paidbah ka jaid ki khun u Naphtali, u la long u Ahira u khun u Enan. 28Kumta keiñ, ka la long ka rukom ki jingïaid jong ki khun Israel, katba kum ki paidïapom jong ki, haba ki la ïaleit mih noh.

29Te u Moses u la kren ha u Hobab, u khun u Reuel u nong Midian, uba u kthaw kurim jong u Moses, “Ngi ïaleit ha kata ka jaka ba U Trai u la kren shaphang jong ka, ‘Ha phi ngan ai ïa ka’: to wan ma me lem bad ngi, ngi ruh ngin leh bha ïa me; naba U Trai u la kren ïa ka babha shaphang ki Israel.” 30#Eks. 18:27.U te u la ong ha u, “Ngan ym leit; hynrei, ngan leit ha la ka jong ka ri, bad ha la ki kur.” 31Te u la ïathuh, “To wat iehnoh ïa ngi, nga kyrpad ïa me; namar ma me, me tip hangno ngi lah ban ïashong dara ha ka ri khlaw, bad men long kum ki khmat ha ngi. 32Bad kan long, lada men leit lem bad ngi, ho-oid keiñ kan long ruh, ba ïa kaei kaei ka babha ba U Trai un leh ïa ngi, ïa kata kajuh hi ngi ruh ngin leh ïa me.”

33Te ki la leit mih noh na uta u lum jong U Trai, lai sngi lynti; bad ka synduk ka jutang ka jong U Trai, ka la leit ha shuwa jong ki ha kita ki lai sngi lynti, ban wad ïa ka jaka shongthait ïa ki. 34Bad uta u lyoh jong U Trai u la long halor jong ki mynsngi, haba ki la ju leit mih noh na ka jaka shong dara.

35 # Salm. 68:1,2. Bad haba kata ka synduk ka la ju mih noh ruh, u Moses u la ju ong, “To ïeng, Ko Trai, bad to ai ban pynsaphred ïa ki nongshun jong me; to ai ruh ba kita kiba shun ïa me kin ïaphet ïap noh ha khmat jong me.” 36Te haba ka la ju shongthait, u la ju ong, “To phai pat, A Trai, ha ki phew hajar ki Israel.”

Currently Selected:

JINGKHEIÑ 10: KHB

Highlight

Copy

Compare