MATHAÏOS 13
13
Ka pharshi u Nongbet
(Mrk. 4:1-9; Luk. 8:4-8)
1 #
Mrk. 4:1-9; Luk. 8:4-8; 5:1-3. Ha kata kajuh ka sngi, U Jisu u la mih noh na ïing, bad u la shong harud duriaw. 2#Luk. 5:1-3.Ki paidbah babun ruh ki la ïawan lang ha u, katba u la kiew halor ka lieng, bad u la shong; uta u paidbah baroh te u dang ïeng harud duriaw. 3Bad U la kren ha ki, bun kiei kiei ruh ha ki pharshi, U da ong: “Ha khmih, u nongbet u la leit noh ban bet. 4Haba u dang bet te, khyndiat ki la hap harud lynti, bad ki sim ki la wan, bad ki la bam ïa ki. 5Kiwei pat de ki la hap halor ki jaka maw ha ka bymdon bun khyndew; kumne kumne ruh ki la mih, naba kam long jylliew ka khyndew: 6haba ka la ïeng ka sngi te, ki la shit tyrkhong eh; bad naba kim don thied, ki la ïap ryngkhiang. 7Kiwei pat te ki la hap hapdeng ki dieng shiah; te kita ki dieng shiah ki la mih, bad ki la ïakjap ïa ki. 8Kiwei pat te ki la hap ha ka khyndew ka babha, bad ki la sei soh, kiba shispah shah, kiba hynriewphew shah, kiba laiphew shah ruh. 9Uba don ki shkor ban sngew, to un sngew.”
Ka jingthmu jong ki pharshi
(Mrk. 4:10-12; Luk. 8:9-10)
10 #
Mrk. 4:10-12; Luk. 8:9-10. Kita ki synran te ki la ïawan ha u, bad ki la ïa-ong ha u, “Balei ba me kren ha ki ha ki pharshi?” 11U da ïathuh te u la ong ha ki: “Naba la ai ha phi ban tip ïa ki maïan ka hima ki bneng, hynrei, ym shym la ai ha ki. 12#Mat. 25:29; Mrk. 4:25; Luk. 8:18; 19:26.Naba uno uno ruh uba don, ha u yn ai, un ïoh kyrhai ruh: te uno uno ruh u bymdon, wat ïa kata kaba u don yn shim noh na u. 13Namar kata ba nga kren ha ki ha ki pharshi: naba haba ki ïohi, kim ïohi; bad haba ki ïohsngew, kim ïohsngew, lymne kim sngewthuh. 14#Isa. 6:9-10; Mrk. 8:18; Ïoan. 12:39-41; Ki Kam. 28:26-27.Kumta, la pyndep ruh ha ki, ïa kata ka jingïathuhlypa u Isaïah, kaba ong:
“ ‘Ïa kaba ïohsngew
phin ïohsngew,
te phin ym sngewthuh shuh:
bad ïa kaba ïohi phin ïohi
te phin ym ishemphang.
15 Naba ka dohnud
kine ki briew ka la rben,
bad ki la sngewkhia
da la ki shkor,
bad ki la khapbrip
ïa la ki khmat;
bad ïoh kin ïohi
da la ki khmat,
bad ba kin ïohsngew
da la ki shkor,
bad ba kin ïoh sngewthuh
da la ka dohnud,
bad ba kin ïoh kylla,
bad ba ngan ïoh pynkhiah
ruh ïa ki.’
16 #
Luk. 10:23-24; Ïoan. 8:56; Heb. 11:13; 1 Pet. 1:10-12. “Hynrei, suk ki khmat jong phi, ba ki ïohi, bad ki shkor jong phi ba ki ïohsngew! 17Naba shisha nga ong ha phi, ba bun ki nongïathuhlypa bad ki riewhok ki la kwah ban ïohi ïa kiei kiei ruh ba phi ïohi, te kim shym la ïohi; bad ban ïohsngew ïa kiei kiei ruh ba phi ïohsngew, te kim shym la ïohsngew.
U Jisu u pynpaw ïa ka pharshi u Nongbet
(Mrk. 4:13-20; Luk. 8:11-15)
18 #
Mrk. 4:13-20; Luk. 8:11-15. “Namar kata, phin sngew ïa ka pharshi u nongbet. 19Haba uno uno ruh u ïohsngew ïa ka ktien ka hima bad um sngewthuh ïa ka, u bymman u wan bad u rong noh ïa kata ïa kaba la bet ha ka dohnud jong u. Une u long uta ïa uba la bet harud lynti. 20Uta ïa uba la bet halor ki jaka maw te, u long uta uba ïohsngew ïa kata ka ktien, bad uba pdiang kumne kumne ruh ïa ka da kaba kmen; 21hynrei, u bymdon thied ha lade, u long te tang shibit; naba haba jia kaba jynjar ne kaba lehbeiñ namar kata ka ktien, kumne kumne ruh u thut. 22#Mat. 19:23; 1 Tim. 6:9-10,17.Uta te ïa uba la bet hapdeng ki dieng shiah, long uta uba ïohsngew ïa kata ka ktien; hynrei, ka jingkhuslai kane ka pyrthei, bad ka jingshukor ka spah, ki ïakjap ïa kata ka ktien, te kam sei soh shuh. 23Hynrei, uta ïa uba la bet ha ka khyndew ka babha, u long uta uba ïohsngew ïa kata ka ktien bad uba da sngewthuh ïa ka; uba sei soh ruh, bad ba pynmih ruh uba shispah shah, uba hynriewphew shah, uba laiphew shah ruh.”
Ka pharshi ki ñiut
24 #
Mrk. 4:26-29. Ïa kawei pat ka pharshi u la buh ha khmat jong ki, u da ong: “Yn tharai ïa ka hima ki bneng kum u briew uba la bet ïa u symbai babha ha ka lyngkha jong u; 25te haba ki dang ïohthiah ki briew, u la wan uba shun ïa u bad u la bet ïa ki ñiut hapdeng u Kew, te u la leit wan noh. 26Hynrei, mynba u la speh uta u Kew, bad ba u la sei soh, mynkata ki la paw kita ki ñiut ruh. 27Te haba ki la ïawan ki shakri jong uta u trai ïing, ki la ïa-ong ha u: ‘Ko kynrad, mem shym la bet ïa u symbai babha ha ka lyngkha jong me? nangno te ka la ïoh ki ñiut?’ 28U te u la ïathuh ha ki, ‘U briew uba shun u la leh ïa kata.’ Ki shakri te ki la ïakylli ïa u, ‘Me mon te ba ngin ïaleit thiew noh ïa ki?’ 29Te u la ong, ‘Em; ba ïoh haba phi thiew noh ïa ki ñiut, phi rat lem bad ki, ïa u Kew ruh. 30Ieh ba baroh ar kin ïamih lem haduh ka aïom ot: te ha kata ka aïom ka jingot ngan ong ha kiba ot, to ïalum shuwa ïa ki ñiut, to tehsong ruh ïa ki, ïa ka ban thang ïa ki: hynrei, ïa u Kew phin ïalum ha ka thiar jong nga.’ ”
Ka pharshi u symbai tyrso
(Mrk. 4:30-32; Luk. 13:18-19)
31 #
Mrk. 4:30-32; Luk. 13:18-19; Mat. 17:20. Ïa kawei pat ka pharshi u la buh ha khmat jong ki, u da ong: “Ka hima ki bneng ka long kum u symbai tyrso, ïa uba u briew u la shim, bad u la bet ha ka lyngkha jong u; 32uba long kham rit shisha ïa ki symbai baroh, hynrei, ynda u la san u long kham khraw ïa ki jhur bad u long dieng, katba ki sim bneng ki wan bad ki shongtngen ha ki tnat jong u.”
Ka pharshi u thiat
(Luk. 13:20-21)
33 #
Luk. 13:20-21; Gal. 5:9; Jen. 18:6. U la kren ïa kawei pat ka pharshi ha ki: “Ka hima ki bneng ka long kum u thiat, ïa uba ka la shim ka kynthei, bad ka la btep ha ki lai pyrha u 'purew, tad ynda u la sieb baroh.”
U Jisu u kren da ki pharshi
(Mrk. 4:33-34)
34 #
Mrk. 4:33-34; Ïoan. 10:6; 16:25. Ïa kita kiei kiei baroh U Jisu u la kren ha kita ki paidbah ha ki pharshi: bad khlem pharshi um shym la kren ei ei ha ki, 35#Salm. 78:2.ba kumta la pyndep ïa kata ba la ong da u nongïathuhlypa, u da ong:
“Ngan ang ïa ka shyntur
jong nga
ha ki pharshi,
ngan pynbna ïa kiei kiei ruh
ba la buhrieh na myndanglong
ka pyrthei.”
U Jisu u pynpaw ïa ka pharshi shaphang ki ñiut
36Ynda kumta, haba U Jisu u la iehnoh ïa ki paidbah, u la leit sha ïing: te ki synran jong u ki la wan ha u, ki da ong, “To batai ïa ngi ïa kata ka pharshi ki ñiut ka lyngkha.” 37U te u la ïathuh bad u la ong ha ki: “Uta uba bet ïa u symbai babha, u long U Khun u briew; 38#Ïoan. 8:44; 1 Ïoan. 3:10.kata ka lyngkha ruh, ka long ka pyrthei; kita ki symbai babha ruh, ki long ki khun ka hima; hynrei, kita ki ñiut, ki long ki khun uta u bymman; 39uta u nongshun uba la bet ruh ïa ki, u long u Soitan; kata ka aïom ot ruh, ka long kaba wai noh ka pyrthei; kita kiba ot ruh, ki long ki angel. 40Namar kata, kumba ïalum ïa kita ki ñiut bad ba thang ïa ki ha ka ding, kumta keiñ, kan long ha kaba wai noh kane ka pyrthei. 41#Mat. 24:31.U Khun u briew un phah noh ïa ki angel jong u, bad kin ïalum na ka hima jong u ïa kiei kiei baroh kiba pynthut, bad ïa kita kiba leh bymman, 42#Mat. 13:50; 8:12; 22:13; 24:51; 25:30; Luk. 13:28.bad kin bred ïa ki ha ka lawar ka ding; hangta keiñ yn long kaba lynñiar bad kum dait bniat. 43Ynda kumta, ki bahok kin ïatyngshaiñ noh kum ka sngi ha ka hima U Kpa jong ki. Uba don ki shkor ban sngew, to un sngew.
Ka pharshi ka jingkynshew ba la buhrieh
44 “Pat, ka hima ki bneng ka long kum ka jingkynshew ïa kaba la buhrieh ha ka lyngkha, ïa kaba u briew u la shem, bad u la buhrieh; te na kaba kmen u leit noh, bad u die noh ïa kiei kiei baroh katba u don, bad u thied ïa kata ka lyngkha.
Ka pharshi u mawlynnai bakordor
45 “Pat, ka hima ki bneng ka long kum u nongkhaïi uba wad ïa ki mawlynnai bakordor; 46bad haba u la shem ïa uwei u mawlynnai u bakordor, u la leit die noh ïa kiei kiei baroh katba u don, bad u la thied ïa uta.
Ka pharshi shaphang ka jar
47 #
Mat. 13:40-42. “Pat, ka hima ki bneng ka long kum ka jar ïa kaba la bred ha ka duriaw, bad kaba ïalum na ki jaid baroh; 48ïa kaba, ynda ka la dap, ki ïaring sha ryngkew; te haba ki la ïashong, ki la ïalum ïa ki babha ha ki jingdiang, ïa ki basniew te ki la ïabred noh. 49Kumta kan long ha kaba wai noh ka pyrthei. Ki angel kin ïamih noh bad kin pynïakhlad noh ïa ki bymman napdeng ki bahok, 50bad kin bred ïa ki ha ka lawar ka ding: hangta keiñ yn long kaba lynñiar bad kum dait bniat.”
Ki jingkynshew ki bathymmai bad ki barim
51U Jisu u la ong ha ki, “Phi la sngewthuh ïa kita kiei kiei baroh?” Ki ruh ki la ong ha u, “Ho-oid, kynrad.” 52U la ong te ha ki, “Namar kata, u nongthoh baroh uba la ïoh hikai ha ka hima ki bneng, u long kum u briew uba u trai ïing, uba sei noh na ka jingkynshew jong u ïa kiei kiei ruh ki bathymmai bad barim.”
La ñiewbeiñ ïa U Jisu ha Nasaret
(Mrk. 6:1-6; Luk. 4:16-30)
53 #
Mat. 7:28; 11:1; 19:1; 26:1. Ka la jia, haba U Jisu u la wai noh ïa kine ki pharshi#13:53 U Jisu u la wai noh ïa kine ki pharshi: U Jisu u la pynkut ïa kine ki pharshi., ba u la leit noh nangta. 54#Mrk. 6:1-6; Luk. 4:16-30.Haba u la wan te ha la ka ri#13:54 ka ri: Ka shnong., u la hikai ïa ki ha ka synagog jong ki, kat ban pynkyndit thred ïa ki, bad ki la kylli, “Nangno une u la ïoh ïa kane ka jingstad, bad kine ki kambah? 55Une um long u khun uta u misteri? ym khot ‘ka Mari’ ïa ka kmie jong u? ‘u Jakob’, bad ‘u Josis’, bad ‘u Simon’, bad ‘u Juda’ ruh, ïa ki para jong u? 56ki para kynthei jong u de, kim don baroh bad ngi? nangno te une u la ïoh ïa kita kiei kiei baroh?” 57#Ïoan. 4:44.Ki la thut ruh ha u. U Jisu te u la ong ha ki, “U nongïathuhlypa um long khlem burom, hynrei, tang ha la ka ri bad ha la ïing ruh.” 58Um shym la leh shibun ki kambah hangta, namar ka jingbymngeit jong ki.
The Bible Society of India