LEBITIKOS 2
2
Ka jingainguh bam
1“Haba u briew u ainguh ha U Trai ïa ka jingainguh bam, ka dei ba kata ka jingainguh jong u kan long da u 'purew bani; bad un theh umphniang halor jong u, bad un buh ïa ka jingiwbih ruh halor jong u, 2bad un wallam ïa ka ha ki khun shynrang u Aaron ki lyngdoh: bad un shim nangta shi kham jong u na u 'purew bani jong ka, bad na ka umphniang jong ka, bad ïa ka jingiwbih jong ka baroh; bad u lyngdoh un thang ïa ka jingpynkynmaw jong ka halor ka duwan, ïa ka ban long ka jingainguh da ka ding, ka jingiw baiwbih keiñ ïa U Trai. 3Te kaba dang sah na kata ka jingainguh bam kan long ka jong u Aaron bad ka jong ki khun shynrang jong u: ka long kaba la kyntang tam eh na ki jingainguh jong U Trai kaba da ka ding.
4“Bad haba me ainguh da ka jingainguh bam ba la shet ha dpei, te kan long keiñ da ki kpu bakhlem thiat kiba da u 'purew bani, ba la khleh da ka umphniang, lane ki 'pu stang bakhlem thiat ba la suit umphniang ïa ki. 5Bad lada ka jingainguh jong me kan long ka jingainguh bam ha ka nar sdieh, to kan long da u 'purew bani ba la khleh bad ka umphniang, bakhlem thiat; 6to men ot dkhot ïa ka, bad to theh umphniang halor jong ka: ka long ka jingainguh bam. 7Bad lada ka jingainguh jong me kan long ka jingainguh ban bam halor ka karai, to ai ban thaw ïa ka da u 'purew bani bad ka umphniang. 8Bad to wallam ha U Trai ïa kata ka jingainguh bam ba la thaw da kine kiei kiei: bad ynda la lah wallam ïa ka ha u lyngdoh, u ruh un wallam ïa ka sha ka duwan. 9Bad uta u lyngdoh un kyntiew noh na kata ka jingainguh bam ïa ka jingpynkynmaw jong ka, bad un thang ïa ka halor ka duwan: ka long ka jingainguh da ka ding, ka jingiw baiwbih keiñ ha U Trai. 10Te kata kaba dang sah na ka jingainguh bam, kan long ïa u Aaron bad ïa ki khun shynrang jong u: ka long kaba la kyntang tam eh jong ki jingainguh ïa U Trai da ka ding.
11“Ïa ka jingainguh bam baroh ba phin wallam ha U Trai, yn ym thaw ïa ka da u thiat: naba phin ym thang ïa u thiat, lymne ïa ka ngap, ha kano kano ruh ka jingainguh ïa U Trai kaba da ka ding. 12Ïa ka jingainguh ki soh nyngkong phi lah ban ainguh ïa ki ha U Trai: hynrei, yn ym thang ïa ki halor ka duwan kum ka jingainguh ka jingiw baiwbih. 13Ïa ka jingainguh bam jong me baroh ruh, men ber da ka mluh; bad ka mluh ka jutang jong U Blei jong me kan ym duh da lei lei na ka jingainguh bam jong me: ha ki jingkñia ainguh jong me baroh to kñia da ka mluh.
14“Bad lada men ainguh ha U Trai ïa ka jingainguh bam ki soh nyngkong jong me, da ki soh Kew ba dang im ba la thang pyrthiew ha ding, ïa u Kew ba la shoh na ka kop kaba dap keiñ, men ainguh ban long ka jingainguh bam ki soh nyngkong jong me. 15Bad men theh ka umphniang halor jong ka, bad men buh ka jingiw baiwbih halor jong ka: ka long ka jingainguh bam keiñ. 16Bad u lyngdoh un thang ïa ka jingpynkynmaw jong ka, na u Kew jong kaba la shoh, bad na ka umphniang jong ka, lem bad ka jingiwbih jong ka baroh: ka long ka jingainguh da ka ding ha U Trai.
Currently Selected:
LEBITIKOS 2: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
