LEBITIKOS 15

Ka jakhlia na ka met briew

1Bad U Trai u la kren ha u Moses bad u Aaron, u da ong, 2“To kren ha ki khun Israel, bad to ïathuh ha ki; Haba uno uno u briew u don ka jingliat ksuit na ka doh jong u, un long bymkhuid namar kata ka jingliat ksuit jong u. 3Bad kane kan long ka jingbymkhuid ha ka jingliat ksuit jong u: la haba ka doh jong u ka liat ksuit, lane haba ka la jah noh kata ka jingliat ksuit na ka doh jong u, ka long ka jingbymkhuid jong u. 4Kano kano ka jingthiah halor kaba u da thiah uta uba liat ksuit, ka long bymkhuid, bad kaei kaei ruh halor kaba u da shong, kan long bymkhuid ruh de. 5Bad jar uba ktah ïa ka jingthiah jong u, un sait ïa la ki jaiñ, bad un sum ha um, un long bymkhuid haduh la janmiet. 6Bad jar uba shong nalor kaei kaei ruh kaba la shong uba liat ksuit, un sait ïa la ki jaiñ, bad un sum ha um, bad un long bymkhuid haduh la janmiet. 7Bad jar uba ktah ïa ka doh uta uba liat ksuit, un sait ïa la ki jaiñ, bad un sum ha um, bad un long bymkhuid haduh la janmiet. 8Bad lada uta uba don ka jingliat ksuit u da bynthiew halor u bakhuid; uta ruh un sait ïa la ki jaiñ, bad un sum ha um, bad un long bymkhuid haduh la janmiet. 9Kano kano ka jin ruh halor kaba uba liat ksuit u da shong kan long bymkhuid. 10Bad jar uba ktah ïa kaei kaei ruh kaba long hapoh jong u, un long bymkhuid haduh la janmiet: bad uta uba da rah ïa kita kiei kiei un sait ïa la ki jaiñ, bad un sum ha um, bad un long bymkhuid haduh la janmiet. 11Bad uno uno u briew ïa uba u nongliat ksuit u da ktah, khlem da thet ïa la ki kti ha um shuwa, un sait ïa la ki jaiñ, bad un sum ha um, bad un long bymkhuid haduh la janmiet. 12Bad ïa u khiew khyndew, ïa uba uta u nongliat ksuit u da ktah, yn pynpait: hynrei, ïa ka pliang dieng baroh yn sait ha um.

13“Te haba yn pynkhuid ïa uba liat ksuit na ka jingliat ksuit jong u, ynda kumta, un kheiñ haduh hynñiew sngi ïa ka ban pynkhuid ïa u, bad un sait ïa la ki jaiñ; bad un pynkhuid ïa la ka met ha ka um batuid, kumta, un long khuid. 14Ha ka baphra sngi ruh un shim ar tylli ki lyngdkhur, lane ar tylli ki khun paro, ynda kumta, un wan ha khmat U Trai ha ka jingkhang Ka Tabernakl ka jingïaseng, bad un ai ïa ki ha u lyngdoh: 15bad u lyngdoh un kñia ïa ki, kawei ïa ka ban long ka jingkñia namar ka pop, bad kawei pat kum ka jingkñia ainguh thang; bad u lyngdoh un pynlong ka jingpynïasuk na ka bynta jong u ha khmat U Trai namar ka jingliat ksuit jong u.

16“U briew ruh na uba yn hap u symbai, te un pynkhuid ïa la ka met baroh ha um, bad un long bymkhuid haduh la janmiet. 17Bad ka jaiñ baroh, bad ka snieh baroh, halor kaba yn long uta u symbai briew, yn sait ha um, bad kan long bymkhuid haduh la janmiet. 18Bad ka briew bad kaba u briew kum uta un thiah, baroh ar ngut kin ïasum ha um, bad kin long bymkhuid haduh la janmiet.

19“Bad haba ka briew ka don ha la ka jingur met da ka snam ha ka met jong ka, ka dei ba kan shong kyrpang, hynñiew sngi: bad jar uba ktah ïa ka un long bymkhuid haduh la janmiet. 20Bad kaei kaei baroh halor kaba kan thiah, katba ka shong kyrpang, kan long bymkhuid: bad kaei kaei baroh halor kaba kan shong kan long bymkhuid. 21Bad jar uba ktah ïa ka jingthiah jong ka un sait ïa la ki jaiñ, bad un sum ha um, bad un long bymkhuid haduh la janmiet. 22Bad jar uba ktah ïa kaei kaei ruh halor kaba ka la shong, un sait ïa la ki jaiñ, bad un sum ha um, bad un long bymkhuid haduh la janmiet. 23Bad lada ka long halor ka jingthiah, lane halor kaei kaei ruh kaba ka la shong ma ka, haba uta u ktah ïa ka, un long bymkhuid haduh la janmiet keiñ. 24#Leb. 18:19; 20:18.Bad lada u briew u da thiah shisha ryngkat bad ka, katba ka bit ha u ka jingur met jong ka, un long bymkhuid, hynñiew sngi; bad ka jingthiah baroh halor kaba un thiah, kan long bymkhuid.

25“Te lada ka briew kan don la ka jingur met bun sngi nalor ka por ka jingñiun poi bnai jong ka, lane kaba long palat ïa ka por ka jingñiun poi bnai jong ka; kan long bymkhuid katba sah kata ka jingur jong ka, kumba ha ki sngi ka jingshong kyrpang jong ka. 26Ka jingthiah baroh halor kaba ka da thiah ha ki sngi baroh ka jingur met jong ka, kan long ïa ka kum ka jingthiah ka jingshong kyrpang jong ka; bad kaei kaei ka jingbuh halor kaba kan shong kan long bymkhuid, kum ka jingbymkhuid ka jingshong kyrpang jong ka. 27Bad jar uba ktah ïa kine kiei kiei ruh un long bymkhuid, bad un sait ïa la ki jaiñ, bad un sum ha ka um, bad un long bymkhuid haduh la janmiet. 28Hynrei, lada kan sa koit na ka jingur met jong ka, te kan kheiñ na ka bynta ïa lade hynñiew sngi, hadien kata, kan long ka bakhuid. 29Bad ha ka baphra sngi kan shim ha lade ar tylli ki lyngdkhur, lane ar tylli ki khun paro, bad kan wallam ïa ki ha u lyngdoh, ha ka jingkhang Ka Tabernakl ka jingïaseng. 30Bad u lyngdoh un kñia ïa kawei ban long ka jingkñia namar ka pop, bad ïa kawei pat kum ka jingkñia ainguh thang; bad u lyngdoh un pynlong ka jingpynïasuk na ka bynta jong ka ha khmat U Trai namar ka jingur met ka jingbymkhuid jong ka.

31“Kumta hi, phin pynkyrpang ïa ki khun Israel na ki jingbymkhuid jong ki; ba kin ym ïap noh ha ka jingbymkhuid jong ki, da kaba pynlong bymkhuid ïa Ka Tabernakl jong nga kaba hapdeng jong ki.”

32Kane ka long ka hukum shaphang uta uba don ka jingliat ksuit, bad uta na uba hap u symbai briew, bad uba wan long bymkhuid da kaba long kumta; 33bad shaphang ka briew ka bapang poi bnai, bad shaphang baroh ba don ka jingliat ksuit na ka met u shynrang, lane ka kynthei, bad shaphang uta ruh uba thiah ryngkat bad kata kaba long bymkhuid.

Currently Selected:

LEBITIKOS 15: KHB

Highlight

Copy

Compare