LEBITIKOS 13

Ka hukum shaphang ki bapang 'ñiangthohlieh

1Bad U Trai u la kren ha u Moses bad u Aaron, u da ong: 2“U briew haba u don ka jingat ha ka snieh ka doh jong u, lane ka prum, lane ka jingphyrnai, bad haba don ha ka snieh doh jong u kaei kaei kum ka jingpang 'ñiangthohlieh, ka dei ban wallam ïa u ha u Aaron lyngdoh, lane ha uwei na ki khun shynrang jong u, ki lyngdoh: 3uta u lyngdoh te un khmih-ïit ïa kata ka prum kaba ha kata ka snieh ka doh jong u: bad lada u shñiuh ha kata ka prum u la kylla lieh, bad lada ka prum ka imat kham jylliew ïa ka snieh ka doh jong u, ka long ka jingpang 'ñiangthohlieh keiñ: bad uta u lyngdoh un khmih-ïit ïa ka, bad un rai bymkhuid ïa u. 4Hynrei, lada kata ka jingphyrnai ka long lieh ha ka snieh doh jong u, bad ba imat kam kham jylliew ban ïa ka snieh, bad ba u shñiuh jong ka um shym kylla lieh; ynda kumta, u lyngdoh un set kyrpang, hynñiew sngi, ïa uta uba la ngat jingpang. 5Bad ha ka bahynñiew sngi u lyngdoh un khmih ïa u: bad ha khmih, lada ka jingpang ka imat sa khlem da nang kham ïar ha ka snieh doh jong u, ynda kumta, u lyngdoh un set kyrpang pat ïa u, hynñiew sngi. 6Bad u lyngdoh un khmih-ïit ïa u sa shi sien ynda la dap kita ki hynñiew sngi: bad ha khmih, lada ka prum ka la nang kham ïong, khlem da nang kham ïar ha ka snieh, ynda kumta, u lyngdoh un rai u bakhuid ïa u: ka long tang ka prum: hadien kata, un sait ïa la ki jaiñ, bad un long u bakhuid. 7Hynrei, lada kata ka prum ka da nang kham ïar bun ha ka snieh, ynda u lyngdoh u la khmih-ïit ïa u da kaba rai u bakhuid ïa u, ka dei ban pynkhmih sa shi sien ïa u ha u lyngdoh; 8bad lada, haba u lyngdoh u la khmih ïa u, bad ha khmih, ka prum ka la nang kham ïar ha ka snieh, ynda kumta, u lyngdoh un rai ïa u, u bymkhuid: ka long ka bapang 'ñiangthohlieh keiñ.

9“Haba la ngat ha u briew ka jingpang 'ñiangthohlieh, to wallam ïa u ha u lyngdoh; 10bad u lyngdoh un khmih-ïit, te, ha khmih, lada ka don ka jingat balieh ha ka snieh, bad kaba la pynkylla lieh ïa u shñiuh, bad ba don doh saw ba-im ha kata ka jingat, 11kata ka long ka jingpang 'ñiangthohlieh kaba la shong slem ha ka snieh doh jong u, bad u lyngdoh un rai bymkhuid ïa u, un ym set kyrpang ïa u; naba u long bymkhuid lypa. 12Te lada ka jingsa 'ñiangthohlieh ka da kyrsong shibun ha ka snieh, bad lada kata ka jingpang 'thohlieh ka da tap ïa ka snieh baroh jong uta u bapang, naduh khlieh haduh sla'jat jong u, kat shaba u khmih-ïit u lyngdoh, 13ynda kumta, u lyngdoh un khmih-ïit: bad ha khmih, lada ka jingpang 'ñiangthohlieh ka la tap ïa ka doh jong u baroh, un rai u bakhuid ïa u bapang: u la kylla lieh baroh kawei: u long u bakhuid keiñ. 14Hynrei, ha ka sngi ba yn ïohi ha u ka doh saw ba-im, un long bymkhuid. 15Ynda kumta, u lyngdoh un khmih-ïit ïa kata ka doh saw, bad un rai u bymkhuid ïa u: kata ka doh saw kan long bymkhuid: ka long ka jingsa 'ñiangthohlieh keiñ. 16Hynrei, lada kata ka doh saw ka da kylla pat, bad ba ka la kylla lieh, ka dei ba un wan ha u lyngdoh, 17bad u lyngdoh un khmih-ïit ïa u: bad ha khmih, lada ka jingpang ka la kylla lieh, ynda kumta u lyngdoh un rai u bakhuid ïa u bapang: u long u bakhuid.

18“Ka doh ruh haba la mih pyrshen ha ka snieh jong ka, hynrei, kaba la khiah pat, 19bad ha ka dien jong uta u pyrshen lada long ka jingat balieh, lane u pyrshen babyrsaw phyrnai, bad lada pyni ïa kata ha u lyngdoh; 20te haba u lyngdoh u khmih-ïit ïa ka, lada u shem ba ka la ngam kham jylliew ïa ka snieh, bad ba u shñiuh jong ka u la kylla lieh, u lyngdoh un rai bymkhuid ïa u: ka long ka jingpang 'ñiangthohlieh ba la kem na uta u pyrshen. 21Hynrei, lada haba u lyngdoh u la khmih-ïit ïa ka, bad ha khmih, bymdon u shñiuh lieh ha ka, bad u shem ba ym shym la ngam kham jylliew ïa ka snieh, hynrei, ka lamïong; hadien kata, u lyngdoh un set kyrpang ïa uta, hynñiew sngi: 22te lada ka da nang kham ïar shibun ha ka snieh, ynda kumta, u lyngdoh un rai bymkhuid ïa u: ka long ka jingpang sniew keiñ. 23Hynrei, lada kata ka jingphyrnai ka shu sah kumjuh, khlem da nang kham ïar, ka long tang ka jingat sohkhliang u pyrshen; bad u lyngdoh un rai ïa u, u bakhuid.

24“Lada ka doh ka don ka jingsaw khluit ding ha ka snieh, bad kata ka doh saw basat syllang ka don ka jingphyrnai babyrsaw, lane balieh; 25ynda kumta, u lyngdoh un khmih-ïit ïa ka: bad ha khmih, lada u shñiuh ha kata ka jingphyrnai u la kylla lieh, bad haba khmih ba ka la kham jylliew ïa ka snieh; ka long ka jingpang 'ñiangthohlieh kaba mih na kata kaba ing ding: bad u lyngdoh un rai bymkhuid ïa uta: kata ka long ka jingpang 'ñiangthohlieh. 26Hynrei, lada ynda u lyngdoh u la khmih-ïit ïa u, bad ha khmih, bymdon u shñiuh lieh ha kata ka jingphyrnai, bad ba kam long kham jylliew ïa ka snieh, hynrei, ba ka long ba lamïong; te kumta u lyngdoh un set kyrpang ïa uta, hynñiew sngi; 27bad ha ka bahynñiew sngi, u lyngdoh un khmih-ïit ïa u: lada ka da nang kham ïar shibun ha ka snieh, ynda kumta, u lyngdoh un rai bymkhuid ïa u: ka long ka jingpang 'ñiangthohlieh. 28Te lada kata ka jingphyrnai ka shu sah hajuh, khlem da nang kham ïar ha ka snieh, hynrei, pleng ba ka lamïong; ka long tang ka jingat sohkhliang ka jong kaba ing ding, te u lyngdoh un rai u bakhuid ïa u: naba kata ka long ka jingat sohkhliang kata kaba ing ding.

29“Lada u briew lane ka briew ki da don ka jingpang sniew ha ka khlieh lane ha u 'ñiuh tmoh, 30ynda kumta, u lyngdoh un khmih-ïit ïa kata ka jingpang sniew: bad ha khmih ruh, lada yn shem ba ka long kham jylliew ïa ka snieh, bad ba don i shñiuh bastem ha ka, ynda kumta, u lyngdoh un rai bymkhuid ïa u: ka long ka jingpang 'ñiangthohlieh, ka long ka jingpang 'ñiangthohlieh na ka khlieh lane na u 'ñiuh tmoh. 31Te lada u lyngdoh u khmih-ïit ïa kata ka jingpang 'ñiangthohlieh, bad ha khmih, lada kam kham jylliew ïa ka snieh, bakhlem shñiuh ïong ha ka; ynda kumta, u lyngdoh un set kyrpang ïa uta uba don kata ka jingpang 'ñiangthohlieh, hynñiew sngi; 32bad u lyngdoh un khmih-ïit ïa ka jingpang sniew ha ka bahynñiew sngi: bad ha khmih ruh, lada kata ka jingpang 'ñiangthohlieh kam shym la nang ïar, bad lada ym don u shñiuh bastem ha ka, bad kata ka jingpang 'thohlieh kam i long kham jylliew ïa ka snieh, 33ka dei te ban khi ïa u, hynrei, wat khi ïa ka jaka bapang 'ñiangthohlieh; bad u lyngdoh un set kyrpang ïa uta u bapang 'ñiangthohlieh, sa hynñiew sngi pat: 34Te ha ka bahynñiew sngi u lyngdoh un khmih-ïit pat ïa kata ka jingpang 'ñiangthohlieh: bad ha khmih ruh, lada ka jingpang 'ñiangthohlieh kam shym la nang ïar ha ka snieh, bad lada kam shym la ngam kham jylliew ïa ka snieh; ynda kumta, u lyngdoh un rai u bakhuid ïa u: un sait ïa la ki jaiñ ruh, bad un long u bakhuid. 35Hynrei, lada kata ka jingpang 'ñiangthohlieh ka da nang kham ïar shibun ha ka snieh ynda la pynkhuid ïa u; 36ynda kumta, u lyngdoh un khmih-ïit ïa u pat: bad ha khmih ruh, lada kata ka jingpang 'ñiangthohlieh ka la nang ïar ha ka snieh, u lyngdoh un ym wad ïa ita i shñiuh bastem; u long u bymkhuid hi. 37Hynrei, lada kata ka jingpang 'ñiangthohlieh ka imat ïa u ba kam ïar shuh, bad ba u shñiuh ïong u la mih ha ka; ka jingpang 'ñiangthohlieh ka la khiah noh, u long u bakhuid; bad u lyngdoh un rai u bakhuid ïa u.

38“Lada u briew lane ka briew ki don ha ka snieh doh jong ki shibun ki jingthohbria baphyrnai lam lieh; 39ynda kumta, u lyngdoh un khmih-ïit; bad ha khmih ruh, lada don ha ka snieh doh jong u ki jingthohbria ba lamïong phyrnai; kata ka long ka jingthohbria ba long ha ka snieh hi; u long u bakhuid.

40“Bad u briew uba u 'ñiuh khlieh jong u, u la hap, uta u long uba la dkhaw; hynrei, un long u bakhuid. 41Bad lada hap u shñiuh na ka khlieh jong u na kaba dei kham shaphang ka khmat, u long uba shu dkhaw shyllangmat; hynrei u long u bakhuid. 42Te lada don u pyrshen balieh lam saw kyr-ang ha ka jingdkhaw ka khlieh, lane ha kata kaba shaphang kata kaba dkhaw shyllangmat; kata ka long ka jingpang 'ñiangthohlieh kaba mih ha ka jingdkhaw ka khlieh jong u, lane ha ka jingdkhaw ka shyllangmat jong u. 43Te u lyngdoh un khmih-ïit ïa ka: bad ha khmih ruh, lada ka jingkyrsong u pyrshen ka long ka balieh lam saw kyr-ang ha ka jingdkhaw ka khlieh jong u, lane ha kata kaba dkhaw shaphang ka shyllangmat jong u, kum haba ka jingpang 'ñiangthohlieh ka paw ha ka snieh doh; 44une u long u briew u bapang 'ñiangthohlieh, u long bymkhuid keiñ: bad u lyngdoh un rai bymkhuid ïa u naduh haduh; ka jingpang sniew ka don ha ka khlieh jong u.

45“Te uta u bapang 'ñiangthohlieh ha uba don kata ka jingpang sniew, ïa ki jaiñ jong u yn kad noh, bad ka khlieh jong u kan sah lyngkhaw, bad un tap ïa lade haduh ka rmiang shyntur jong u kaba shaneng; hadien kata, un pyrta, ‘U ba-tngit, u ba-tngit.’ 46Kita ki sngi baroh katba sah ha u kata ka jingpang 'ñiangthohlieh yn kheiñ bymkhuid ïa u; u long u bymkhuid keiñ: ka dei ba un shong kyrpang weibriew; bad ka jaka shongneh jong u kan long shabar ka jaka shong dara.

47“Bad lada u 'ñiangthohlieh u don ha ka jaiñ, la ka long ka jaiñ banat, lane ka jaiñ linen, 48la u long ha u ksai lynter, lane ha u ksai pyngkiang; na ka jong ka linen, lane ka banat; la u long ha ka snieh, lane ha kaei kaei ba la thaw da ka snieh; 49lada u pyrshen u long uba lam jyrngam lane uba lam saw ha kata ka jaiñ, lane ha kata ka snieh, lane ha u ksai lynter, lane ha u ksai pyngkiang, lane ha kaei kaei ba la thaw da ka snieh; ka long ka jingpang 'ñiangthohlieh, bad ka dei ban pyni ïa kata ha u lyngdoh. 50Bad u lyngdoh un khmih-ïit ïa ka jingpang sniew, bad un set kyrpang ïa kata kaei kaei kaba la ïabit hynñiew sngi: 51te ha ka bahynñiew sngi u lyngdoh un khmih-ïit pat ïa kata ka jingpang sniew: bad lada kata ka jingpang sniew ka la nang saphriang ha kata ka jaiñ, la ka long ha u ksai lynter, lane ha u ksai pyngkiang, lane ha ka snieh, lane ha kaei kaei ba la thaw na ka snieh ruh; ka long ka bapang 'ñiangthohlieh babam pong; ka long ka bymkhuid. 52Namar kata, to thang ïa kata ka jaiñ, la ka long u ksai lynter, lane u ksai pyngkiang, na u 'ñiuh langbrot, lane na u 'saihon, lane na ka snieh kaba kumno kumno ruh ba don ka jingpang sniew ha ka; naba ka long ka jingpang 'ñiangthohlieh babam pong; to thang ïa ka ha ding.

53“Hynrei lada u lyngdoh u khmih-ïit, bad ha khmih ruh, ka jingpang sniew kam shym la nang saphriang ha ka jaiñ, lymne ha u ksai lynter, lymne ha u ksai pyngkiang, lane ha kaei kaei ka kynja snieh, 54ynda kumta, u lyngdoh un hukum ïa ki ban sait ïa kata ha kaba don kata ka jingpang sniew, bad un set kyrpang ïa ka, sa hynñiew sngi pat. 55Bad u lyngdoh un khmih-ïit ïa kata ka jingpang sniew, ynda la lah sait ïa ka: bad ha khmih ruh, lada kata ka jingbit sniew kam shym kylla la ka rong, bad khlem da nang ïar, ka long bymkhuid; to thang ïa ka ha ka ding: ka long ka babam pong, la ka long ka jingdkhaw ka khlieh lane shaphang ka khmat.

56“Bad lada u lyngdoh u khmih-ïit, bad u ïohi bad kata ka jingbit sniew ka long byrïong ynda la lah sait ïa ka, hadien kata, un kad noh ïa kata na ka jaiñ, lane na ka snieh, lane na u ksai lynter, lane na u ksai pyngkiang; 57te lada ka dang paw ha kata ka jaiñ, ha u ksai lynter, lane ha u ksai pyngkiang, lane ha ka snieh kaba kumno kumno ruh, ka nang saphriang shisha: to thang ha ding ïa kata kaba don ka jingpang sniew ha ka. 58Bad kata ka jaiñ, la u long u ksai lynter, lane u ksai pyngkiang, lane la ka long kaei kaei ka kynja snieh, ïa kaba men sait, lada kata ka jingpang sniew ka la jah noh na ki, ynda kumta, ka dei ban sait ïa ka sa shi sien, bad kan long ka bakhuid.”

59Kane ka long ka hukum shaphang ka bapang 'ñiangthohlieh ha ka jaiñ banat, lane ha ka jaiñ linen, ha u ksai lynter, lane ha u ksai pyngkiang, lane ha ki kynja snieh, ïa ka ban bishar la ki long ki bakhuid, lane bymkhuid.

Currently Selected:

LEBITIKOS 13: KHB

Highlight

Copy

Compare