NONGBISHAR 1
1
Ki Judah bad ki Simeon ki kem bad ki pynhiar kput ïa u Adoni-besek
1Te hadien ka jingïap u Joshua, ki Israel ki la ïakylli ïa U Trai, ki da ong, “Uei un leit kiew nyngkong na ka bynta jong ngi pyrshah ïa ki Kanaan, ban ïaleh ïa ki?” 2Te U Trai u la ong, “U Judah un leit kiew: ha khmih, nga la ai noh ïa kata ka ri ha ka kti jong u.” 3Bad u Judah u la ong ha u Simeon u para jong u, “To ïawan kiew lem bad nga sha ka bynta jong nga, ba ngin ïaleh ïa ki Kanaan; nga ruh kumjuh ngan leit bad me sha ka bynta jong me.” Kumta, u Simeon u la leit lem bad u. 4Bad u Judah u la leit kiew; bad U Trai u la aiti ïa ki Kanaan bad ïa ki Peris ha ka kti jong ki: bad ki la pynïap na ki ha Besek shiphew hajar ki rangbah. 5Te ki la shem ïa u Adoni-besek ha Besek: bad ki la ïaleh ïa u bad ki la pynïap ïa ki Kanaan bad ïa ki Peris. 6Hynrei u Adoni-besek u la phet ïap; ki te ki la beh ïa u, bad ki la kem ïa u, bad ki la ot noh ïa ki 'ti kmie bad ïa ki 'jat kmie jong u. 7U Adoni-besek te u la ong, “Hynñiewphew ki syiem, ba la ot noh ïa ki 'ti kmie bad ïa ki 'jat kmie jong ki, ki la ju khar ïa la ka jingbam hapoh ka miej jong nga: kumba nga la leh, kumta U Blei u la leh kylliang ïa nga.” Te ki la wallam ïa u sha Jerusalem, bad hangta u la ïap.
Ki Judah ki jop ïa ka Jerusalem bad ïa ka Hebron
8Te ki khun u Judah ki la ïaleh ïa ka Jerusalem, bad ki la jop ïa ka, bad ki la pom ïa ka da ka syrti waitlam, bad ki la wiang ding ïa ka shnong. 9Te hadien kata, ki khun u Judah ki la leit hiar ïaleh thma ïa ki Kanaan kiba la shong ha ka ri lum, bad ha kaba shathie, bad ha ka ri them. 10#Jos. 15:13-19.Bad u Judah u la leit ïaleh ïa ki Kanaan kiba shong ha Hebron: (te ka kyrteng ka Hebron mynshuwa ka la long “ka Kiriath-arba”): bad ki la pynïap ïa u Sheshai, bad u Ahiman, bad u Talmai.
U Othniel u jop ïa ka Debir bad u ïoh kurim ïa ka Akhsah
(Jos. 15:15-19)
11Te nangta u la leit ïaleh ïa ki nong Debir: (te ka kyrteng ka Debir mynshuwa ka la long “ka Kiriath-sepher”). 12Bad u Kaleb u la ong, “Jar uba ïaleh ïa ka Kiriath-sepher, bad uba jop ïa ka, ïa u ngan pynbuh kurim bad ka Akhsah ka khun jong nga.” 13Bad u Othniel u khun u Kenas, u hynbew jong u Kaleb, u la jop ïa ka: te u la pynbuh kurim bad u ïa ka Akhsah ka khun jong u. 14Te ynda ka la wan ha u, ka la kyntu ïa u ban pan na u kpa jong ka, ïa kawei ka khyndew: bad ka la hiar noh nalor la ka kadda; u Kaleb te u la ong ha ka, “Pha kwah aïu?” 15Ka te ka la ong ha u, “To ai jingkyrkhu ïa nga; naba me la ai ha nga ka ri shathie, to ai ruh ha nga ki umpohliew:” bad u Kaleb u la ai ha ka, ïa kita ki umpohliew kiba haneng bad kita ki umpohliew kiba harum.
Ki pud ka jingjop ki Judah bad ki Benjamin
16Bad ki khun u Ken, u kthaw kurim jong u Moses, ki la ïaleit kiew na ka nongbah ki dieng Tlai, lem bad ki khun u Judah sha ka ri khlaw Judah, kaba shaphang shathie jong ka Arad; bad ki la ïaleit shong ruh bad kita ki briew. 17Bad u Judah u la leit bad u Simeon u para jong u, bad ki la ïa-pynïap ïa ki Kanaan kiba shong ha Sephath, bad ki la pynduh khoit ïa ka. Bad ïa ka kyrteng kata ka shnong la khot “ka Hormah”. 18Ki Judah ruh ki la jop ïa ka Gasa bad ïa ki phang jong ka, bad ka Ashkelon bad ki phang jong ka, bad ka Ekron bad ki phang jong ka. 19U Trai te u la don bad ki Judah; bad ki la jop ïa ki riewlum; naba kim lah ban beh noh ïa kiba shong ha ka ri them, namar ki la don ki kali nar. 20#Jos. 15:14.Te ki la ai ïa ka Hebron ha u Kaleb, kumba u Moses u la kren: bad u la beh noh nangta ïa ki lai ngut ki khun u Anak. 21#Jos. 15:63; 2 Sam. 5:6; 1 Khrn. 11:4.Bad ki khun u Benjamin kim shym la beh noh ïa ki Jebus kiba shong ha Jerusalem: hynrei, ki Jebus ki la shong lem bad ki khun u Benjamin ha Jerusalem haduh kane ka sngi.
Ka ïing u Joseph ka jop ïa ka Bethel
22Ka ïing u Joseph de, ki ruh ki la kiew ban ïaleh ïa ka Bethel: bad U Trai u la long lem bad ki. 23Bad ka ïing u Joseph ka la phah syntiat ïa ka Bethel. (Te ka kyrteng kata ka shnong mynshuwa ka la long “ka Lus”). 24Te kita ki nongsyntiat ki la ïohi ïa u briew ba u mih noh na kata ka shnong, bad ki la ong ha u, “Pyni ïa ngi, ngi kyrpad ïa me, ïa ka lynti ban rung sha shnong, bad ngi ruh ngin leh sbun ïa me.” 25Te ynda u la pyni ïa ki, ïa ka lynti sha shnong, ki la pom ïa kata ka shnong da ka syrti waitlam; hynrei, ki la pyllait ïa uta u briew bad ka ïing jong u baroh. 26Uta u briew te u la leit sha ka ri ki Hit, bad u la thaw kawei ka shnong, bad u la khot ïa ka kyrteng jong ka, “ka Lus”: kaba long ka kyrteng jong ka, haduh kane ka sngi.
Ki pud jong ki Manasseh bad ki Ephraim
27 #
Jos. 17:11-13. Ki Manasseh ruh kim shym la beh noh ïa ki nong Beth-shean bad ïa ki shnong jong ka, lymne ïa ki nong Taanakh bad ki shnong jong ka, lymne ïa ki nong Dor bad ki shnong jong ka, lymne ïa ki nong Ibleam bad ki shnong jong ka, lymne ki nong Megiddo bad ki shnong jong ka: hynrei, ki Kanaan ki shu shong ha kata ka ri. 28Hynrei, ynda ki Israel ki la kham khraw bor, ki pyntrei shitom ïa ki Kanaan, te kim shym la beh noh khoit ïa ki.
29 #
Jos. 16:10. Ki Ephraim ruh kim shym la beh noh ïa ki Kanaan kiba shong ha Geser; hynrei, ki Kanaan ki la shong ha Geser hapdeng jong ki.
Ki pud jong ki Sabulon, ki Asher, ki Naphtali bad ki Dan
30Ki Sabulon kim shym la beh noh ïa ki nong Kitron, lymne ïa ki nong Nahalol; hynrei, ki Kanaan ki shong hapdeng jong ki, bad ki la siew khajna.
31Ki Asher ruh kim shym la beh noh ïa ki nong Akko, lymne ïa ki nong Sidon, lymne ïa ki nong Ahlab, lymne ïa ki nong Akhsib, lymne ïa ki nong Helbah, lymne ïa ki nong Aphik, lymne ïa ki nong Rehob: 32hynrei, ki Asher ki la shong hapdeng ki Kanaan, ki trai kata ka ri: namar kim shym la beh noh ïa ki.
33Ki Naphtali kim shym beh noh ïa ki nong Beth-shemesh, lymne ki nong Beth-anath; hynrei, ki la shong hapdeng ki Kanaan, ki trai kata ka ri: pynban, ki nong Beth-shemesh bad ki nong Beth-anath ki la siew khajna ha ki.
34Ki Amor te ki la beh ïa ki khun u Dan sha ri lum: naba kim shah ïa ki ban wan hiar sha ka ri them: 35hynrei, ki Amor ki shu shong ha u lum Heres, ha Aijalon, bad ha Shaalbim, pynban, ka kti ka ïing u Joseph ka la lah, bad kumta ki la siew khajna. 36Bad ka pud ki Amor ka la long naduh ka thiep Akrabbim, naduh uta u mawsiang, bad shaneng.
Currently Selected:
NONGBISHAR 1: KHB
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
