ISAÏAH 2
2
Ka jingbishar U Blei hapdeng ki jaid bynriew
(Mik. 4:1-3)
1Ka ktien kaba u Isaïah u khun u Amos u la ïohi shaphang ka Judah bad ka Jerusalem.
2 #
Mik. 4:1-3. Te kan long
ha ki sngi bakhatduh,
ba yn pynskhem ïa u lum
ka ïing U Trai
ha kliar ki lum bah,
bad yn pynkyntiew
halor ki lum rit;
bad ki jaid bynriew baroh
kin tuid sha ka.
3Shibun ki paidlang ruh
kin leit bad kin ong,
“Ïa, ngin ïakiew
sha u lum U Trai,
sha ka ïing U Blei u Jakob;
te un hikai ïa ngi
shaphang ki lynti jong u,
bad ngin ïaid ha ki lynti ïaid
jong u:”
namar na Seïon
kan mih noh ka hukum,
bad ka ktien U Trai
na Jerusalem.
4 #
Jol. 3:10. Bad un bishar
hapdeng ki jaid bynriew,
bad un sneng
shibun ki kynja bynriew:
te kin shoh phar-lyngkor
ïa la ki waitlam,
bad ki wait tari
ïa la ki sum:
ka jaid bynriew
kan ym rah ka waitlam
ban ïaleh
ïa ka jaid bynriew,
lymne, kin ym hikai
ïaleh thma shuh.
Ka jingbishar U Blei ïa kiba sarong
5Ko ka ïing u Jakob, ale,
to ngin ïaïaid
ha ka jingshai U Trai.
6Naba me la iehnoh
ïa u paidlang jong me,
ka ïing u Jakob,
namar ki la dap
da ki rukom na mihngi,
bad ki long
ki nongkren byrtong
kum ki Philistia,
bad ki ïathab kti bad ki khun
ki nongwei.
7Te ka ri jong ki
ka dap da ka rupa
bad ka ksiar,
bad ym don jingkut
ïa ki jingkynshew
jong ki;
ka ri jong ki, ka dap ruh
da ki kulai,
bad ym don jingkut
ïa ki kali ïapom jong ki.
8Bad ka ri jong ki,
ka dap da ki bleithaw;
ki ïamane ïa ka jingtrei
ki kti jong ki hi,
kaba ki shynriah'ti jong ki,
ki la thaw.
9Bad u riewpoh u dem,
u riewkhraw ruh u leh poh:
namar kata, wat map ïa ki.
10 #
Jpw. 6:15. To leit bsut sha u mawsiang,
bad rieh ha ka 'dewmet,
na khmat ka jingitieng
U Trai,
bad na ka burom ka jingkhraw
jong u.
11Ïa ka jingkhmih basarong
jong u briew yn pynpoh,
bad ïa ka jingmeng ki briew
yn pyndem,
te tang ïa U Trai hi
yn pynkyntiew
ha kata ka sngi.
12Namar kan don ka sngi
ïa U Trai ki paid
halor kaba sarong
bad kaba meng baroh,
bad halor kaba
la pynkyntiew baroh;
te yn pynpoh ïa ka:
13bad halor ki dieng Kedar
u Lebanon,
kiba hajrong
bad kiba la pynkyntiew,
bad halor ki dieng Sning
ka Bashan baroh;
14bad halor ki lum bah
kiba jrong
bad halor ki lum rit
ba la pynkyntiew baroh;
15bad halor ka kut
bajrong baroh,
bad halor ka kynroh
ker baroh;
16bad halor ki lieng bah
ka Tarshish baroh,
bad halor ki dur
ba-itynnad baroh.
17Te ïa ka jingsarong u briew
yn pyndem,
bad ïa ka jingmeng ki briew
yn pynpoh:
bad tang ïa U Trai hi
yn pynkyntiew ha kata
ka sngi.
18Bad ki bleithaw
kin jah noh phar.
19Te ki briew kin rung
sha ki krem ki mawsiang,
bad sha ki thliew
ka khyndew,
na khmat ka jingitieng U Trai,
bad na ka burom ka jingkhraw
jong u,
haba u khih
ban pynkhynñiuh jur
ïa ka khyndew.
20Ha kata ka sngi,
u briew un bred noh
ïa la ki bleithaw rupa,
bad ïa la ki bleithaw ksiar,
kiba ki la thaw ba un mane,
ha ki kyndad#2:20 ki kyndad: Kine ki dei ki 'nai tynjit. Ha kaba ïadei bad ka kyrteng jong ki mrad, ka kyntien kyndad ka ïapher shibun na ka kyntien kynda kaba mut u ne ka mrad ba don tang kawei ka reng.
bad ha ki lymbit;
21ban rung sha ki krem
ki mawsiang,
bad sha ki ar khap mawsiang,
na khmat ka jingitieng U Trai,
bad na ka burom ka jingkhraw
jong u,
haba u khih
ban pynkhynñiuh jur
ïa ka pyrthei.
22To wai noh phi na u briew
uba ka mynsiem jong u
ka don ha ki thliew khmut
jong u:
namar ha kano yn ñiewkor
ïa u?
The Bible Society of India