EKSODOS 25

Ki jingainguh ba ki khun Israel ki dei ban wallam

(Eks. 35:4-9)

1 # Eks. 35:1—40:38. Te U Trai u la kren ha u Moses, u da ong, 2#Eks. 35:4-9.“To kren ha ki khun Israel, ba kin wallam ha nga ïa ka jingainguh: na u briew baroh uba ai sngewbha na la ka dohnud keiñ phin shim ïa kita ki jingainguh jong nga. 3Kane te ka jingainguh ïa kaba phin shim na ki: ïa ka ksiar, ïa ka rupa, bad ïa ka tama; 4bad ïa ka jaiñ babyrïong, bad ïa ka basaw bthuh, bad ïa ka basaw syng-iang, bad ïa ka jaiñ linen bani, bad ïa u shñiuh blang; 5bad ïa ki snieh ki langbrot shynrang ba la suit rong saw, bad ïa ki snieh takash, bad ïa u dieng Shittim; 6ïa ka umphniang ïa ka jingshai, bad ïa ki musla ïa ka umphniang bapynsleh, bad ïa ka jingiwbih thang; 7ïa ki maw Oniks, bad ïa ki maw ban buh ha ka ephod, bad ha ka jingdeng shadem de. 8Bad to kin thaw ïa ka jaka kyntang ïa nga; khnang ba ngan ïoh shongneh hapdeng jong phi. 9Katba kum kita baroh ïa kiba nga la pyni ha me, ïa kata ka dur Ka Tabernakl, bad ki dur ki jingbuh jong ka baroh, kumta keiñ phin thaw ïa ka.

Ka synduk ka jingphla

(Eks. 37:1-9)

10 # Eks. 37:1-9. “Te kin thaw ïa ka synduk da u dieng Shittim: ka lynter jong ka, ar pruh shiteng, bad ka pyngkiang jong ka, shi pruh shiteng, bad ka jingjrong jong ka ruh, shi pruh shiteng. 11Bad men suit ïa ka da ka ksiar banylla, shapoh bad shabar men suit ksiar ïa ka keiñ, bad men thaw halor jong ka, ïa ka pansngiat da ka ksiar baroh sawdong. 12Men thaw ruh ïa ki saw tylli ki kyrwoh da ka ksiar, bad buh ïa ki ha ki saw ki dong jong ka; ha kawei ka liang jong ka, ar tylli ki kyrwoh, bad ha kawei pat ka liang jong ka, ar tylli ki kyrwoh. 13Bad men thaw ïa ki dieng jingbah da u dieng Shittim, bad men da suit ksiar ïa ki ruh. 14Men buh ruh ïa kita ki dieng jingbah ha kita ki kyrwoh ha baroh ar liang kata ka synduk, ïa ka ban bah da ki ïa ka synduk. 15Te kita ki dieng jingbah kin ïaisah ha kita ki kyrwoh kata ka synduk: wat sei shuh ïa ki na ka. 16Bad men thep ha kata ka synduk ïa ka jingphla ïa kaba ngan sa ai ha me. 17Men thaw ruh ïa ka jingtap-isynei da ka ksiar banylla; ka lynter jong ka, ar pruh shiteng, bad ka pyngkiang jong ka ruh, shi pruh shiteng. 18Bad men thaw ar tylli ki Kherub da ka ksiar, da kaba shoh tylli men thaw ïa ki, na ki baroh ar ki tduh jong kata ka jingtap-isynei. 19Ïa uwei u Kherub men thaw na kawei ka tduh, bad ïa uta uwei pat u Kherub na kata kawei pat ka tduh: na kata ka jingtap-isynei hi keiñ phin thaw ïa kita ki Kherub na baroh ar ki tduh jong ka. 20Kita ki Kherub te kin pynïar ïa la ki thapniang sha jrong, ki da kah ïa kata ka jingtap-isynei da la ki thapniang, bad kin ïaphai markhmat; shaphang kata ka jingtap-isynei kita ki Kherub kin ïa-peit. 21Bad men buh ïa kata ka jingtap-isynei halor kata ka synduk; bad men thep ha kata ka synduk ïa kata ka jingphla ïa kaba ngan sa ai ha me. 22Te hangta ngan ïashem bad me, bad nalor kata ka jingtap-isynei, napdeng kita ki ar tylli ki Kherub kiba halor kata ka synduk ka jingphla, ngan ïathuh ha me ïa kiei kiei baroh ïa kiba ngan hukum ïa ki khun Israel.

Ka miej ïa u 'pu pyni

(Eks. 37:10-16)

23 # Eks. 37:10-15. “Men thaw ruh ïa ka miej na u dieng Shittim: ka lynter jong ka, ar pruh, ka pyngkiang jong ka, shi pruh, bad shi pruh shiteng, ka jingjrong jong ka. 24Bad men suit ïa ka da ka ksiar banylla, bad to thaw ïa ka pansngiat ruh ïa ka baroh sawdong da ka ksiar. 25Bad men thaw ka rmiang ïa ka, kaba shi khup baroh sawdong, men thaw ruh ïa ka pansngiat ksiar halor kata ka rmiang jong ka baroh sawdong. 26Bad men thaw ïa ka saw tylli ki kyrwoh da ka ksiar, bad to buh ïa kita ki kyrwoh ha kita ki saw ki dong jong ka kiba ha ki saw ki kjat jong ka. 27Ha marpyrshah kata ka rmiang kin don kita ki kyrwoh, ban long ki jaka ïa ki dieng jingbah ki ban bah ïa kata ka miej. 28Men thaw ruh ïa kita ki dieng jingbah da u dieng Shittim, bad to suit ksiar ïa ki, ïa ka ban bah ïa kata ka miej da ki. 29Bad men thaw ïa ki pliang jong ka, bad ïa ki siang jong ka, bad ïa ki jingtap jong ka ruh, bad ïa ki khuri jong ka ruh, ki ban theh jingtheh da ki; da ka ksiar banylla men thaw ïa ki. 30#Eks. 39:36; 40:23; Leb. 24:5-9.Halor kata ka miej te, men buh ïa u 'pu pyni ha khmat jong nga ha la ka sngi.

Ka dieng pynïeng sharak ksiar

(Eks. 37:17-24)

31 # Eks. 37:17-24. “Men thaw ruh ïa ka dieng pynïeng sharak da ka ksiar banylla: ba la shoh tylli men thaw ïa kata ka dieng pynïeng sharak, ka met jong ka, bad ki tnat jong ka, ki shata sharak jong ka, bad ki shrong jong ka, bad ki syntiew jong ka ruh de, kin long na kata kajuh; 32bad hynriew tylli ki tnat kin ïamih na ki ar liang jong ka; lai tylli ki tnat ka dieng pynïeng sharak na kawei ka liang, bad lai tylli ki tnat jong kata ka dieng pynïeng sharak na kawei pat ka liang; 33lai tylli ki shata sharak ba la thaw kum ki soh Khyllam, bad ka shrong bad u syntiew, ha kawei ka tnat; bad lai tylli ki shata sharak ba la thaw kum ki soh Khyllam ha kata kawei pat ka tnat, bad ka shrong bad u syntiew; kumjuh ha kita ki hynriew tylli ki tnat kiba mih na kata ka dieng pynïeng sharak; 34bad ha kata ka dieng pynïeng sharak kin long saw tylli ki shata sharak ba la thaw kum ki soh Khyllam, lem bad ki shrong bad ki syntiew jong ki: 35bad kawei ka shrong kan long hapoh ar tylli ki tnat jong ka, bad kawei ka shrong kan long hapoh ar tylli ki tnat jong ka, katba kum kita ki hynriew tnat kiba ïamih na kata ka dieng pynïeng sharak. 36Ki shrong jong ki bad ki tnat jong ki kin long na kajuh: baroh keiñ kan long ba la shoh tylli da ka ksiar banylla. 37Men thaw ruh hynñiew tylli ki sharak jong ka, bad men tbeh ïa kita ki sharak jong ka, ba kin ai jingshai ha pyrshah ka khmat jong ka. 38Ki nap lur sharak jong ka, bad ki khuri jong ka ruh, kin long da ka ksiar banylla. 39Kata ka ksiar banylla da kaba men thaw ïa ka, lem bad kine ki pliang baroh, kan long shi talent. 40#Ki Kam. 7:44; Heb. 8:5.Te men sumar ba men thaw ïa ki keiñ ha la ka dur ka dur, ïa kaba la pyni ha me ha uta u lum.

Currently Selected:

EKSODOS 25: KHB

Highlight

Copy

Compare