KI KAM 6

Kaba thung hynñiew ngut ki tymmen basan

1Te ha kita ki sngi, haba la man bun ki synran, la mih ka jingkhñium na ki Jiw Grik ïa ki Hebru, naba la kham leh lyndet ïa ki riewkynthei jong ki ha kaba sam ïa ka jingai isynei kaba ha la ka sngi. 2Te ki khat-ar ngut, haba ki la khot sha ki ïa u paidbah ki synran, ki la ong, “Kam long kaba bit ïa ngi ban iehnoh ïa ka jingïalap ïa ka ktien U Blei, bad ban shakri ïa ki miej. 3Namar kata, ko para, phin ïakhmih hynñiew ngut ki rangbah na phi, kiba don ka nam babha, kiba dap da U Mynsiem bad da ka jingstad, ba ngin thung ïa ki halor kane ka kam. 4Hynrei, ngi ngin ïaineh ha ka jingduwai, bad ha ka jingïalap ïa ka ktien.” 5Te kata ka jingong ka la pynsngewbha ïa uta u paidbah baroh; kumta, ki la ïajied ïa u Stephan, u briew uba dap da ka jingngeit bad da U Mynsiem Bakhuid, bad ïa u Philip, bad ïa u Prokhoros, bad ïa u Nikanor, bad ïa u Timon, bad ïa u Parmena, bad ïa u Nikolas uba la kylla niam, uba na Antiok; 6ïa kiba ki la pynïeng ha khmat ki apostol, bad haba ki la duwai, ki la buh ïa la ki kti ha ki.

7Te ka ktien U Blei ka la roi; bad la man bun shikatdei ki synran ha Jerusalem, bad u paidbah babun na ki lyngdoh, u la kohnguh ha kata ka jingngeit.

Kaba kem ïa u Stephan

8Bad u Stephan, uba dap da ka jingaiei bad ka bor, u la leh ki jingphylla bad ki dak khyllah bakhraw hapdeng u paidbah. 9Hynrei, la mih kiba na ka synagog, ba la khot “ka synagog ki Libertin”, bad na ki nong Kyrini, bad na ki nong Aleksandria, bad na kiba na Kilikia bad Asia, ki da ïasaid bad u Stephan, 10hynrei, kim ju lah ban ïaleh ïa ka jingstad bad ïa U Mynsiem, da kiba u la kren. 11Ynda kumta, ki la pynïeng sakhi lamler, kiba la ong, “Ngi la ïohsngew ïa u ba u kren ki ktien beiñ blei ïa u Moses bad ïa U Blei.” 12Te ki la ïapynkhih ïa uta u paidbah, bad ïa ki tymmen basan, bad ïa ki nongthoh, bad haba ki la lah ïawan buk ha u, ki la kem ïa u, bad ki la ïalam noh sha ka dorbar. 13Bad ki la pynïeng ïa ki sakhi lamler, kiba la ong, “Une u briew, um keiñ noh shuh ban kren ki ktien pyrshah ïa kane ka jaka bakhuid, bad ïa Ka Hukum: 14namar ngi la ïohsngew ïa u ba u ong ba une U Jisu uba na Nasaret un sa pynjot ïa kane ka jaka, bad un sa pynkylla ïa ki niam ki rukom kiba u Moses u la aiti ha ngi.” 15Te baroh kiba la ïashong ha kata ka dorbar, haba ki la khmih shaiñ ha u, ki la ïohi ïa ka khmat jong u kum ka khmat u angel.

Currently Selected:

KI KAM 6: KHB

Highlight

Copy