KI KAM 3

La pynkhiah ïa u briew u ba-dkoh

1Te u Petros bad u Ïoannis ki dang ïaleit kiew sha ka templ ha ka por jingduwai, ha kaba khyndai baje#3:1 kaba khyndai baje: Kane ka dei ka kynta ka bakhyndai. Ha ka jingkheiñ por ha kine ki sngi, kan dei ka por lai baje janmiet.. 2Bad la don uwei u briew u ba-dkoh naduh ka kpoh ka kmie jong u, uba ki la bah, ïa uba ki ju buh ha la ka sngi ha ka khyrdop ka templ kaba ki khot “Ka Baitynnad”, ban pan ka jingai isynei na kita kiba ïaleit rung shapoh kata ka templ; 3uta, haba u la ïohi ïa u Petros bad u Ïoannis ba kin sa leit rung shapoh ka templ, u la pan ban ïoh ka jingai isynei. 4U Petros te, haba u la khmih shaiñ ha u, lem bad u Ïoannis, u la ong, “To khmih ha ngi.” 5Kumta, u la khmih dngong ïa ki, ba u da kyrmen ban ïoh ei ei na ki. 6Hynrei, u Petros u la ong, “Ka rupa bad ka ksiar ngam don, hynrei, ïa kaba nga don, nga ai ïa me. Ha ka kyrteng U Jisu Khrist uba na Nasaret, to ïaid.” 7Bad u la shim ïa u na ka kti kamon, bad u la pynïeng ïa u; te kumne kumne ruh ki kjat bad ki matsohlah jong u ki la khlaiñ. 8Bad haba u la kynrong joit u la ïeng, bad u la sdang ïaid, bad u la leit rung lem bad ki shapoh ka templ, u da ïaid, u da rynsied, bad u da ïaroh ïa U Blei. 9Bad u paidbah baroh u la ïohi ïa u ba u ïaid, bad ba u ïaroh ïa U Blei; 10bad ki la ithuh ïa u, ba u la long uta uba ju shong ban ïoh ka jingai isynei ha kata ka khyrdop “Ka Baitynnad” jong ka templ; te ki la dap da ka jingsngewphylla, bad da ka jingsngewlyngngoh ïa kata ba la jia ha u.

Ka khubor u Petros ha ka templ

11Te katba u dang bat ïa u Petros bad ïa u Ïoannis, uta u paidbah baroh u la ïaphet lang sha ki, sha kata ka baranda kaba ki khot “Ka jong u Solomon”, ba ki da sngewkyndit eh. 12Haba u Petros te u la ïohi, u la ong ha uta u paidbah, “Ko ki rangbah Israel, balei phi sngewphylla ïa kane? lane balei phi ïakhmih shaiñ ïa ngi, kumba da ka bor lane da ka jingriewblei jong ngi hi, ba ngi la pynïaid ïa une u briew? 13#Eks. 3:6; Isa. 52:13.U Blei u Abraham, bad u Isaak, bad u Jakob, U Blei ki kpa jong ngi, u la pyndonburom ïa U Khun jong U, U Jisu, ïa uba phi la aiti noh, bad phi la len ha khmat u Pilat, mynba u la lah thmu ban pyllait noh ïa U. 14#Mat. 27:15-23; Mrk. 15:6-14; Luk. 23:13-23; Ïoan. 19:12-15.Hynrei, phi, phi la len ïa uta U Bakhuid bad U Bahok; bad phi la ïapan ban pyllait ha phi ïa u nongpynïap briew: 15bad ïa U Syiem ka jingim, phi la pynïap noh; ïa uba U Blei u la pynmih pat na ki baïap; shaphang kata, ngi, ngi long ki nongphla. 16Bad da ka jingngeit ha ka kyrteng jong U, ïa une u briew uba phi ïohi bad ba phi ithuh, ka kyrteng jong U, ka la pynkhlaiñ: kata ka jingngeit keiñ kaba da U, ka la ai ha une, ïa kane ka jingkhiah khran ha khmat jong phi baroh.

17“Hynrei mynta, ko para, nga tip ba na ka jingbymtip phi la leh ïa kata, kumjuh kumba ki nongsynshar jong phi ruh ki la leh. 18Hynrei, ïa kita kiei kiei kiba U Blei u la lah pyni lypa da ka shyntur ki nongïathuhlypa baroh, ba un shah U Khrist jong U, U la pyndep kumta. 19Namar kata, to kylla-ka-bamut, to wan phai khmat ruh, ban ïoh pyndam noh ïa ki pop jong phi, ba kumta kin ïoh wan ki aïom shong pyngngad na khmat U Trai, 20bad ba un ïoh phah ïa uta U Khrist, ïa uba la thung khnang ïa phi, U Jisu keiñ, 21ïa uba ka dei ïa ka bneng ban pdiang haduh ki aïom ka jingpynthymmai ïa kiei kiei baroh, ïa kiba U Blei u la kren da ka shyntur ki nongïathuhlypa bakhuid jong U kiba naduh mynbarim. 22#Deu. 18:15,16.U Moses shisha u la ong, ‘U Trai uba U Blei jong phi, un pynmih ïa u nongïathuhlypa ha phi na ki para jong phi, uba kum ma nga; ïa u, phin shahshkor ha kiei kiei baroh katba un kren ha phi. 23#Leb. 23:29; Deu. 18:19.Bad kan jia ruh, ba ïa ka mynsiem baroh ka ban ym shahshkor ïa uta u nongïathuhlypa, yn pynduh noh khoit napdeng u paidlang.’ 24Shisha keiñ ki nongïathuhlypa baroh ruh naduh u Samuel, bad kita kiba bud hadien, kat kiba la kren, ki ruh ki la ïathuh shaphang kine ki sngi. 25#Jen. 22:18.Phi long ki khun kita ki nongïathuhlypa, bad ki jong kata ka jutang ïa kaba U Blei u la pynlong bad ki kpa jong phi, ba U ong ha u Abraham, ‘Ha u symbai jong me yn kyrkhu ïa ki jaid bynriew jong ka pyrthei baroh.’ 26Ha phi nyngkong, U Blei u la pynmih ïa la U Khun, bad U la phah ïa u, ban kyrkhu ïa phi, da kaba pynphai noh ïa uwei pa uwei na phi na ki jingbymhok jong phi.”

Currently Selected:

KI KAM 3: KHB

Highlight

Copy