2 SAMUEL 2
2
La thung syiem ïa u Dabid halor ki Judah
1Hadien kane te, u Dabid u la kylli na U Trai, u da ong, “Ngan leit kiew ne em sha kano kano na ki nongbah Judah?” Bad U Trai u la ïathuh ha u, “To leit kiew.” Te u Dabid u la kylli, “Shano ngan leit kiew?” U te U la ïathuh, “Sha Hebron.” 2#1 Sam. 25:42,43.Kumta, u Dabid u la leit kiew shatei, lem bad ki ar ngut ki tnga jong u ruh, ka Ahinoam ka nong Jesril, bad ka Abigail ka nong Karmel, ka tnga u Nabal. 3Bad u Dabid u la ïalam artet ïa la ki rangbah ruh kiba don lem bad u, uwei uwei ruh bad la kiba ha ïing; te ki la shong ha ki shnong Hebron. 4#1 Sam. 31:11-13.Bad ki Judah ki la ïawan, bad ki la pynsleh hangta ïa u Dabid ban long syiem halor ka ïing Judah.
Te ki la ïathuh ha u Dabid, ki ïa-ong, “Dei ki Jabesh-gilead kiba la tep ïa u Saul.” 5Te u Dabid u la phah ki nongkit-ktien sha ki Jabesh-gilead, bad u la ong ha ki, “To long phi ïa kiba la kyrkhu na U Trai, kiba la leh ïa kane ka jingleh isynei ha u kynrad jong phi, u Saul keiñ, bad ba phi la tep ïa u. 6To U Trai te un leh isynei bad ka jingshisha ruh ïa phi: bad ma nga ruh ngan ai nong ïa phi namar kane ka jinglehbha, namar ba phi la leh ïa kane ka jingleh. 7Namar kata te, to pynkhlaiñ ïa la ki kti, bad to long shlur phi: namar u kynrad jong phi u Saul u la ïap noh, ka ïing Judah ruh ki la pynsleh ïa nga ban long syiem halor jong ki.”
U Dabid u ïaleh bad ka ïing u Saul
8Hynrei, u Abner u khun u Ner, u kaptan u paidïapom u Saul, u la lah shim ïa u Ishbosheth u khun u Saul, bad u la ïalam ïa u sha shiliang sha Mahanaim; 9bad u la pynlong syiem ïa u halor ka Gilead, bad halor ki Ashur, bad halor ka Jesril, bad halor ki Ephraim, bad halor ki Benjamin, bad halor ki Israel baroh. 10(U Ishbosheth u khun u Saul u la sawphew snem ka rta haba u la sdang ban synshar halor ki Israel, bad u la synshar ar snem.) Te ka ïing Judah ki la bud ïa u Dabid. 11Te ka por ba u Dabid u la long syiem ha Hebron halor ka ïing Judah ka la long hynñiew snem bad hynriew bnai.
12Te u Abner u khun u Ner, bad ki shakri u Ishbosheth u khun u Saul, ki la ïamih noh na Mahanaim sha Gibeon. 13Bad u Joab u khun ka Seruïah, bad ki shakri u Dabid, ki la ïamih noh, bad ki la ïashem ïa ki hajan ka pung Gibeon; bad ki la ïashong, kine sha kane ka liang ka pung, bad kita sha kawei pat ka liang ka pung. 14Te u Abner u la ong ha u Joab, “To kine ki samla kin ïaïeng mynta, bad kin ïalehkai ha khmat jong ngi.” Bad u Joab u la ong, “To kin ïaïeng.” 15Te kumta ki la ïaïeng bad ki la leit shiliang ha la ka jingkheiñ; khat-ar ngut na ka bynta ki Benjamin, kata, na ka bynta u Ishbosheth u khun u Saul, bad khat-ar ngut ki shakri u Dabid. 16Bad uwei uwei baroh u la kem ïa la u briew na ka khlieh, bad u la dung ïa la ka waitlam na krung u briew jong u; kumta, ki la ïakyllon ryngkat: namar kata, la khot ïa kata ka jaka “Helkath-hassurim”, kaba ha Gibeon. 17Te ka thma ka la jur eh ha kata ka sngi; bad la jop ïa u Abner, bad ïa u paidïapom ki Israel, ha khmat ki shakri u Dabid.
18Bad ki khun ka Seruïah lai ngut ki la don hangta, u Joab, bad u Abishai, bad u Asahel: te u Asahel u la long uba stet ki kjat jong u kat ka skei kaba ha khlaw. 19Te u Asahel u la beh nadien u Abner; bad ha kaba leit um shym phai sha kamon lymne sha kadiang na kaba beh ïa u Abner. 20Te u Abner u la kyrtiang dien, bad u la kylli, “Ma me u Asahel?” U ruh u la ïathuh, “Ma nga keiñ.” 21Te u Abner u la ong ha u, “To phai sha kamon lane sha kadiang, bad to kem ha me ïa uwei na kita ki samla, bad shim ïa ki atiar ïapom jong u.” Hynrei, u Asahel um treh ban phai noh na kaba beh ïa u. 22Bad u Abner u la ong pat ha u Asahel, “To phai noh na kaba beh nadien jong nga: ngan shoh pynkyllon ïa me balei? naba kumno ngan da khmied la ka khmat ha u Joab u hynmen jong me hadien?” 23La kumta ruh um treh ban phai noh: namar kata, u Abner u la sum ïa u da ka tdong u sum na ka kpoh, bad uta u sum u la mih noh na shadien jong u; te u la kyllon hangta, bad u la ïap ha kata hi ka jaka: bad baroh kat kiba wan poi ha kata ka jaka ha kaba u Asahel u la kyllon bad ba u la ïap ki la ïasangeh.
24Hynrei, u Joab bad u Abishai ki la ïabeh nadien u Abner; te hamar ba la sep ka sngi ki la poi sha u lum Ammah, uba ha marpyrshah ka Giah ha ka lynti ka ri khlaw Gibeon. 25Te ki khun u Benjamin ki la ïalum lang hadien u Abner, bad ki la ïawan long uwei u paidbah, bad ki la ïeng halor uwei u lum. 26Ynda kumta, u Abner u la pyrta ha u Joab, bad u la ong, “Ka waitlam kan pynjot noh junom? balei mem tip ba ha ka bakut kan long ka jingkthang? haba kumta te, men slem pat sa katno, ïa ka ban hukum ïa u paidbah ba kin phai noh na kaba beh ïa la ki para?” 27Te u Joab u la ong, “Katba im U Blei, lada mem shym la kren ma me, shisha la mynhynne mynstep u paidbah u la lah leit wan noh na kaba beh uwei uwei ïa la u para.” 28Kumta, u Joab u la put ïa ka ronsing, bad u paidbah baroh u la sangeh noh, bad kim shym la beh shuh ïa ki Israel, bad kim shym la ïaleh thma shuh.
29Te u Abner bad ki rangbah jong u ki la ïaid baroh shi miet halor ka madan: bad ki la leit sha shiliang ka Jordan, bad ki la leit lyngba ïa ka Bithron baroh, bad ki la wan poi ha Mahanaim. 30Bad u Joab u la leit wan noh na kaba beh ïa u Abner: te haba u la lum lang ïa u paidbah baroh, ki la duna na ki shakri u Dabid khatkhyndai ngut ki rangbah bad u Asahel ruh. 31Hynrei, ki shakri u Dabid ki la shoh pynïap na ki Benjamin, bad na ki rangbah u Abner, laispah hynriewphew ngut ki briew. 32Te ki la shim ïa u Asahel, bad ki la tep ïa u ha ka jingtep u kpa jong u, kaba ha Bethlehem. Bad u Joab bad u paidbah jong u ki la ïaid baroh shi miet, bad ki la poi sha Hebron hamar kaba mih ka sngi.
The Bible Society of India