EBIKHOLE BIA ABARUME 16
16
Timotseyo atsia nende Paulo nende Sila
1Paulo yatsiililila niyoola Deribe nende Lisitera, ewa omukristo undi owalangwa mbu, Timotseyo yali niyamenya. Nyinamwana owali yesi omukristo yali omuyahudi, nebutswa samwana yali omugiriki. 2Abasuubili boosi abali Lisitera nende Ikonio betsoomia Timotseyo. 3Paulo yenya mbu abukule Timotseyo atsie ninaye, kho namusheba. Yakhola ario shichila Abayahudi boosi abamenya mumbali etsio, bali nibamanya mbu samwana Timotseyo nomugiriki. 4Ne olwa batsiililila khuluchendo olwo babirira mumataala nibahelesia abasuubili amalako akabarume nende abakofu ba Yerusalemu bali nibabisiye nibababoolela mbu, balonde amalako ako. 5Kho abetsikanisa etsio nibatsuubwa okhuba abamaani mubusuubili khandi nibameetekha buli inyanga.
Lilolelo lia Paulo nali Tiroasi
6Batsiililila noluchendo nibabirira mungongo etsia Firigia nende Galatia, ne nibalayaala likhuwa elia Omwami mu Asia ta, shichila Roho Omutakatifu shiyabafuchilila tawe. 7Ne olwa boola khulwakho lwa Misia, bateema okhutsia mulukongo lwa Bitsinia, nebutswa Roho wa Yesu shiyabafuchilila tawe. 8Kho nibatsiilila noluchendo shilunji nibabira mu Misia nibatsia Tiroasi. 9Mana eshilo eshio, Paulo yalola lilolelo, elia yalolamwo omundu owa Makedonia nasinjiile namusaayanga naboola ari, “Yambukha witse Makedonia okhukhoonye!” 10Ne lwangu olwa Paulo yalola lilolelo elo, khwerechekha okhutsia Makedonia lwangu, shichila khwalola mbu, Nyasaye akhulanjile okhuyaalila abandu abo Injiili.
Okhwikalukhasia khwa Ludia
11Kho khwarula Tiroasi nikhutsila mumeeli nikhukhalasia shilunji okhuula Samotserake, ne olwa bwashia nikhuula Neapoli. 12Ne okhurulayo khwatsia mwitookho elia Abafilipi, nilio litookho liambeli mulukongo lwa Makedonia, eliarukungwa nende Abaroma. Khwamenya mulukongo olwo tsinyanga tsinyinji. 13Khunyanga eya Isabato khwarula mwitookho nikhutsia khulukuku lwomwalo, ewa khwapaaranga mbu, habundu hakhabaho aha Abayahudi bakhung'anilanga khulwa okhusaaya. Khwekhala hasi nikhuboola nende abakhasi abali nibakhung'anileho. 14Mulala khubarecheresia kakhwaboola yali omukhasi mbu, Ludia okhurula Tsiatira, owali omukholi wobukhala bwetsingubo tsiesambarau. Yali omukhasi owenamilanga Nyasaye. Naye Omwami yekula omwoyokwe nahulila amakhuwa aka Paulo yali naboolanga. 15Olunyuma, ye nende abeinzuye abali nibabatiisibwe yakhwinjisia ewuwe, naboola ari, “Nimuba nimulutsi mbu, isie endi omusuubili watoto muwami, yitse mumenye munzu mwanje.” Mana nakhusaaya mbu khutsie ewuwe.
Paulo nende Sila bekalilwa mumbohe Filipi
16I nyanga yindi olwa khwali nikhutsitsanga habundu ahokhusaaya, khwabukaanilwa nende omukhaana undi owali neshishieno, eshiamunyalilanga okhulakula aketsa okhwikholekha olunyuma. Omukhaana oyo yareerelanga abakhongobe amapesa amanji khulwa obufumubwe. 17Mana naloonda khu Paulo nalanjilisinjia ari, “Abandu bano nabakhalabani ba Nyasaye Omukhongo Muno! Bamuboolelanga shinga olwa munyala okhuhonibwa!” 18Yatsiililila okhulanjisia ario khulwa tsinyanga tsinyinji, okhuula Paulo namusinyishila muno, nashiukhana naboolela eshishieno eshio ari, “Muliira lia Yesu Kristo, ekhulaka mbu omurulemwo!” Mana eshishieno eshio nishimurulamwo eshise eshio.
19Olwa abakhongobe bamanyilisia mbu, injila yabwe eyokhunyoolelamwo amapesa yihwele, batiila Paulo nende Sila nibabakhwesa nibabayila haluyia imbeli wabemilisi okhuyaasibwa habulafu. 20Ne olwa bali nibabarerile imbeli wabayaasi ba Roma, abandu abo baboola bari, “Abandu bano nabayahudi, ne bakholanga induli mwitookho liefwe lino. 21Bechesinjia emiima echiamalako kefwe kalafuchililanga tawe. Ifwe khuli Abaroma, ne shikhunyala okhufuchilila emiima echio kata okhuchiloonda tawe.” 22Mana abomukanda boosi nibabonga omukhono mukhwinjilila Paulo nende Sila.
Mana abakhalachi beshiina abo nibarandula tsingubo tsia Paulo nende Sila nibalaka mbu, banywekhwe netsisaala. 23Olunyuma lwokhubanywekha obutinyu babekalila mumbohe, mana omulindi weimbohe eyo nalakwa mbu, abekalile obutinyu. 24Shinga lwomulindi oyo yali nalachilwe okhukhola, yabenjisia mushikoro eshiomukari shiene shieimbohe eyo, mana naboha ebilenje biabwe nebitiili ebisiro.
25Ahambi mushilo hakari Paulo nende Sila bali nibasaayanga nende okhwimba tsinyimbo tsiokhwitsoomia Nyasaye, nabo ababohe bandi bali nibabarecheresinjia. 26Mubwangu bwene obwo, betsukhana eshialo nishirenga obutinyu, nishitechesia imbohe eyo okhuula khumuse kwayo. Ne habwene nahabwene emiliango chiosi nichikukha, ne eminyololo chiababohe boosi nichibohololokha. 27Ne lwomulindi weimbohe eyo yabuukha, nalola emiliango chieimbohe chiosi nichikuushe, yapaara mbu, ababohe boosi beluushe. Mana natsomola olukangalwe mbu, yeyiire omwene. 28Nebutswa Paulo yalanjilisia obutinyu ari, “shiolesaalisia tawe! Fwesi pe khuli hano!” 29Omulindi oyo nalanga mbu bareere itaha, mana niyenjilamwo lwangu, nakwa mumakulu aka Paulo nende Sila narenganga. 30Mana nabayila elwanyi nabareeba ari, “Abami, ekhole shiina kho ehonibwe?” .
31Nabo nibamukalusia bari, “Suubila mu Omwami Yesu, ne olahonibwa, iwe nende abeinzuyo boosi.” 32Mana nibamuyaalila likhuwa elia Omwami nende abo boosi abali munzuye. 33Mana mubise bieshilo tsana ebio, omulindi oyo yababukula, niyoosia amakhupache kabwe, ne habwenaho ye nende abeinzuye boosi nibabatiisibwa. 34Mana nabukula Paulo nende Sila nabayila munzumwe, ne nabahelesia eshiokhulia. Ye nende abeinzuye bekhooya muno, shichila bulano bali nibasuubile mu Nyasaye.
35Inyanga yolondakhwo mumabwibwi, abobunyali ba Roma baruma abelihe nelilako nibaboola bari, “Lekhuule abandu abo batsie.”
36Kho omulindi weimbohe naboolela Paulo ari, “Abakhongo barumile lilako mbu, iwe nende Sila mulekhuulwe mutsie. Kho munyala okhutsia bulano, ne mutsie nomulembe.”
37Nebutswa Paulo yaboolela abelihe abo ari, “Shikhunyooleshekhwo nikhuli neshikha shiosi shiosi ta, nebutswa bakhunyweshile habulafu haluyia, ne khuli abebule ba Roma! Bakhwikaliile mumbohe, ne bulano benya okhukhulekhuula khutsie masilisi. Shikanyalikha tawe! Lekha abakhongo ba Roma abeene betse hano mana bakhulekhuule.”
38Abelihe abo nibatsia nibaboolela abakhongo ba Roma amakhuwa ako, ne olwa bahulila mbu, Paulo nende Sila nabebule ba Roma, batiilwa noburi muno. 39Kho abakhongo abo nibatsia okhubasaba obulesheli, mana nibabarusia mumbohe, ne nibababoolela mbu, barule mwitookho elo. 40Mana Paulo nende Sila nibarula mumbohe nibatsia munzu mwa Ludia. Ebweneyo babukaana nende abasuubili, nibababoolela amakhuwa kokhubatinyisia ne nibenyookha.
Currently Selected:
EBIKHOLE BIA ABARUME 16: OLUDC
Highlight
Share
Copy
Want to have your highlights saved across all your devices? Sign up or sign in
