2 MAKABAYO 14
14
Alikimo yenjilila Yuda itookho
(1 Mak. 7:1-21)
1Olunyuma lwemiyika chitaru, Yuda halala nabelihebe banyoola likhuwa mbu Demeterio, omusiani wa Seleuko, yali niyenjiile Tiripoli, aha tsimeeli tsisinjilanga, nali nende abelihe bamaani halala nende tsimeeli tsinyinji. 2Khandi nibaboolelwa mbu yali niyeerire omuruchi Antioko halala Lisia omulindiwe, ne nakhola lihanga liabwe okhuba hasi woburuchibwe.
3Ne yaliho omundu oulangwa mbu Alikimo. Alikimo oyo yalinji omwisaaliisi omukhulundu. Yali yerusia omwene khulwokhuchamakhwe, okhumenya nende okhulonda amalako ka Abagiriki mutsinyanga tsiali tsiobukhayi. Olwa yamanya mbu shianyala okhukholwa okhuba omwisaaliisi kandi ta, ne mbu yali nali mumatinyu, 4yatsia okhumulola omuruchi Demeterio omuyika kweshikhumi shilala, amakhumi karano namulala (151).#14:4 omuyika 151: nikwo omuyika kweshikhumi shialala, amakhumi kasasaba namulala, Kristo Nashili Okhwibulwa (161). Olwa yatsia okhumulola omuruchi, yamuyilila olusimbi lweitsahaabu, lisaka liomushindu, halala nende amasaka kemitseituni, akahaanungwa shinga eshihaanwa muhekalu okhurula khale. Nebutswa shiyaboolakhwo likhuwa liosi khukayali niyenyanga okhukhola twe. 5Kata kario, olunyumakhwo, yanyoola obwiyangu bwokhukhola akobumayanu kayali narecheeshe. Mana Demeterio nakaasia omukhung'ano nabeebaalibe, nalanga Alikimo mumukhung'a tsana, ne namureeba okhumanyinyilisia mbu ni shiins eshia Abayahudi bali nibarechekhanga okhukhola.
Nolwa Alikimo yakalusia naboola ari, 6“Baliho balala khu Abayahudi, abalangungwa mbu Abahasidi.Nibo abatsuubanga emielo nende abandu okhukhola induli. Kata lihanga shilinyala okhuba nomulembe tawe. 7Elia bakhola libi lili mbu, nibo abachila ndalekha obwisaaliisi obukhulundu, obwa ekhoyeele okhuba, okhulondokhana nolwibulo lwefwe lwobwisaaliisi. Ne bulaano nditsile hano, 8eliambeli muno mbu, ekhuteebanga muno iwe omuruchi. Ne eliakhabili mbu, ebalolelanga abashianje bali hasi woburuchibwo bano tsimbabasi. Okhuba okhurulana neinduli yobusilu ya Yuda Makabayo nabandube, lihanga liefwe liosi lili mumasila. 9Khulweshio, ekhusaaya iwe omuruchi mbu, nochama, orunilisie obulayi amakhuwa ako koosi, mana okholekhwo liosi liosi elionyala, okhulondokhana nobukosia nende omwoyo mulayi kwobetsanga nakwo buli lwosi, kho mbu orusieho obusandibwi bwelianga liefwe nende abandu balio. 10Ne Yuda naba natsiililila okhubaho mwoyo, kho lihanga liefwe shiliakhabeekhwo nomulembe nahatutu tawe.”
Demeterio aruma Nikanori okhuseera Yuda Makabayo
11Olunyuma lwa Alikimo okhuboola amakhuwa ako, balala khubachetsiyi bomuruchi bandi, abali nibamusila Yuda, bachaaka okhutsuuba Demeterio khumakhuwa aka Yuda, nibachila nasinyikha. 12Khulweshio omuruchi Demeterio niyaahula Nikanori, owali omuseesia wabelihe bokhutsinzofutsie, mbu abe omusinjilili wolukongo lwa Yuda. Kho naruma Nikanori okhutsia ebweneyo, 13mbu yeere Yuda Makabayo nende okhusalaasia abelihebe, mana amukhole Alikimo okhuba omwisaaliisi omukhulundu wa Ihekalu yoluyali. 14Nabo abandu bandi bamahanga kandi koosi aka Yuda, abali nibeelukha olwa Yuda yabaseera, bayuyukhana nibeetsa okhuhambaana halala nende abelihe ba Nikanori, nibapaaranga mbu, amatinyu nende amaraba akali nikakwila Abayahudi, kakhabeele akeyinganga khubo.
Nikanori akhola obwitsa nende Yuda Makabayo
15 #
1 Mak. 7:27,28 Olwa Abayahudi bahulila mbu, Nikanori yetsanga nende abandu bamahanga kandi, abali nibeyunjile ninaye okhubaseera, bepuuka olufu khumirwe chiabwe. Nibamuhabila Nyasaye wabwe, owali niyalobola lihanga liabwe mbu libe eliilie inziayo. Khandi niye owabahelesinjia abandube abo obuhuli, khulwokhwilolesia khubo. 16Mana omwimilisi wabwe Yuda nabalachilisia mbu, barule bwangu batsie baseere nende okhulwana nomusuku wabwe mushikwenyi shia Adasa.#14:16 Adasa: amahandiko kandi shinga Mulugiriki kaboola mbu Desau. 17Simoni, omusiani wabwe Yuda, yali nakhupananga nende Nikanori, nebutswa yali nayombelelungwa munjila ya kahala, yetsukhananga omusuku namupwochile obulamanya tawe. 18Kata kario, olwa Nikanori yahulila shinga olwa Yuda halala nende abelihebe bali nibakhupanilanga neitswoni lihanga liabwe, nibareerekhwo omwoyo, yalola mbu nobulayi okhulekha emielo nende okhuyiniaho amatinyu ako munjila yindi. 19Kho naruma Posidonio, Tseodoto nende Matatsia okhutsia okhukhola indakano yomulembe nende Abayahudi.
20Akenyekha khulwa okhutinyisia indakano tsana koosi kenjisibwa mu buli olunyaali. Ne olwa Nikanori yamanyia abelihebe, boosi beyama nibafuchilisania ninaye. 21Olunyuma nibarechekha inyanga yabemilisi okhukhung'ana khulwa okhusanjilana abeene khu beene. Ebifumbi bioluyali biayinibwa okhurula mu buli ikambi nibireerwa, nibialwa. 22Yuda yali narecheeshe abelihebe, nibemanuule mabiswi mutsimbeka tsimanyifu, mbu, abasuku baleshe okhwitsa nibamutsaalishilakhwo. Nebutswa abemilisi babili abo babukaana nibasanjilana obulayi khu komulembe. 23Nikanori yatsiililila okhumenya Yerusalemu tsinyanga tsindutu, olunyuma lwomukhung'ano kwabe, ne abandu bali nibeyunjile ninaye, nabakalusia ewabwe. 24Abemilisi babili abo nibaba abeetsa ba mbuusia ngonia, ne nibakholela amakhuwa kabwe halala buli lwosi. 25Nikanori namutinyisia Yuda mbu ateeshie omukhasi, mana yebule abaana. Kho Yuda nateeshia, ne namenya obulamu bwabuli lwosi, obwokhwihotselesia.
Nikanori akalukhana Yuda
26Olwa Alikimo yalola mbu Yuda nende Nikanori bamenyile mumulembe nende okhurechelesania, yabukula ibarwa ndala yeindakano yomulembe, eya Yuda nende Nikanori bakhola, ne natsia ninayo womuruchi Demeterio. Naboolela omuruchi mbu, Nikanori shiali omwisiikwa khuburuchibwe ta, okhuba yali niyemekha Yuda, omundu weinduli, okhukalukha mushilenjeshie, olwa aba narulile khuburuchi. 27Amakhuwa kobubeeyi ako kasinyisia omuruchi muno. Omuruchi nahandichila Nikanori ibarwa muburima, namumanyia mbu shiachamisiibwe neindakano eyo ta, mana namulachilisia mbu atiile Yuda Makabayo, amureere bwangu Antiokia nali omubohe obulakosiakhwo obwiyangu tawe.
28Olwa ibarwa eyo yamuulila, Nikanori yanyakhana mumwoyokwe muno, nakhaywa eliokhukhola. Okhuba shiyalola nibuli obulayi khuye okhufunaka indakano nende omundu owa yali namanyile obulayi mbu yosinjia akenyekha mundakano eyo tawe. 29Nebutswa khulwokhuba shikaanyalikha mbu okhwikalila lilako liomuruchi ta, yachaaka okhukhaaba shinga olwa anyala okhureka nende okhutiila Yuda. 30Yuda Makabayo naye olwa yalola mbu Nikanori yakhachaaka okhuba omuchesichesi khuye, khandi mbu, buli nibabukaana, naba omululu khuye okhushilakhwo shinga yalinji khale, ne namanya mbu, shiali ninaye obulayi ta. Kho nakhung'asia omukanda omukhongo kwabelihebe, ne nibatsia okhwibisa. 31#1 Mak. 7:29,30Olwa Nikanori yamanya mbu Yuda yakhamukhaya amachesi, yatsia mu Hekalu yoluyali khandi indakatifu khubise biabesaaliisi bamalilangakhwo emisango, nabalachilisia mbu batiile Yuda bamureere bamureerire. 32Nebutswa abeesaaliisi bamwitsubila nibaboola mbu shibamanyilekhwo aha Yuda yebisile tawe. 33Nolwa Nikanori yanyiila omukhonokwe musaatsa nachoomiye muhekalu, niyetsuba naboola ari, “Nimularusia Yuda mwambelesia nali omubohe ta, ndalalikulula nende okhutubula Ihekalu ya Nyasaye yino. Ndalasasia nerusiaho eshimalilo shiemisango shiayo shino, ne mushilenje shiayo ndalombakhaho ihekalu yomunyasaye Dionisio.” 34Olunyuma lwokhuboola ario, yarula natsia, nabo abesaaliisi abo nibachiinguula amakhono kabwe mwikulu, nibamuhaabila Nyasaye, ouli omulindi omwisiikwa welihanga liabwe, nibaboola bari, 35“OMWAMI Nyasaye wabandu boosi, iwe ouli mwene ebindu biosi, walola mbu nobulayi Ihekaluyo yibe hano mana iwe omenyenje mwifwe. 36Khulweshio, iwe ouli Omutakatifu, khandi OMWAMI Nyasaye wobutakatifu bwosi, olinde Ihekalu yino inziayo, yileshe okhufwolwa khandi ta, okhuba yasiiyilwe butswa ahambi hano.”
Razi yeyira omwene khulwa lihangalie
37Mulala khubemilisi ba Yerusalemu, owalangwa mbu Razi yakhobwa khu Nikanori. Kaboolekha mbu, Razi yakhonyanga abandube munjila tsinyinji, ne khandi mbu abandube bamuhelesinjia oluyali nibamulanga mbu, samwana Abayahudi. 38Olwa abandu bali nibashichaaka okhukhola induli, yara obulamubwe mumatinyu khulwa okhuterera idiini eya Abayahudi, ne yali niyenjililwakhwo itookho khulwa amakhuwa ako. 39Nikanori yaruma abelihebe ebikhumi birano (500) okhutsia okhutiila Razi, khulwa okhulolesia habulafu shinga olwa Abayahudi bali nibamusinya. 40Okhuba yapaara mbu namutiila, alafwisia Abayahudi omwoyo muno. 41Abelihe bafunaka eshiliibwa shielwanyi, niberechekha okhutiila omunaara kwa Razi yali niyebisilemwo. Nibalachilisia mbu, omulilo kureerwe mana basambe emiliango. Razi yenyoola nabotokhanwe nabasuku, ne nateema okhwiyira nolukangalwe. 42Yalola mbu nobulayi okhufwa noluyali, okhushila okhukwa mumakhono kabamayanu mana anyoole eshimbwa murwe shilakhoyeele oluyali lwa yebulwa ninalwo. 43Kho olwa abelihe bali nibafindikananga okhwinjila mumunaara okwo, Razi yefumira nolukanga nebutswa shilwamwira ta. Ne naratsukha tsimbilo, naruuka neitswoni lisiisi eliomunaara, mbu akwe mumukanda kwabelihe abo. 44Nebutswa abelihe abo, bekwenya bwangu, ne Razi nakwa hasi. 45Yabuukhaho nashili omulamu, khandi nali noburuma obunji, ne naraatsanga amatsayi amanji. Ne niyelukha nabira hakari wabandu, naniina khulwanda olurambi mana nasinjilakhwo. 46Habwene yaho, nahwele amatsayi mumubili, yakhwesa amalake namakhonake omwene, nasukunila abomukanda abo. Mana nahabila OMWAMI Nyasaye omwene obulamu mbu, amukalusilie amala ako. Nolwa Razi yafwa ario.
Currently Selected:
2 MAKABAYO 14: OLUDC
Highlight
Share
Copy
Want to have your highlights saved across all your devices? Sign up or sign in