2 MAKABAYO 11
11
Yuda Makabayo yahula Omulindi womuruchi Lisia
(1 Mak. 4:26-35)
1Olunyuma lwetsinyanga tsindiiti Timotseyo namalile okhuhulwa, Lisia owali omulindi womuruchi Antioko Ewupatori, khandi elubeka omusiani wabwe, yali nali omukhongo muburuchi obwo. Olwa yahulila amakhuwa kali nikekholeeshe, yasinyikha muno, 2ne nakhung'aasia halala mana abelihe bokhuchenda hasi khubilenje abahela hambi ebikhumila amakhumi munane (80,000) nende boosi abokhwilushila khutsifarasi, natsia okhuseera Abayahudi. Yali nende lichoomo liokhukhola litookho lia Yerusalemu okhuba eshimenyo eshia Abagiriki, 3nende okhurunjia Ihekalu ya Yerusalemu obushuru shinga olwa yarunjinjia habundu undi hosi hosi aha abandu bamahanga kandi bakhung'aanilanga khulwa okhwinamila ebifwanani. Khandi obwisaaliisi obukhongo bukhalilungwe amapesa buli mwaka. 4Lisia shiyatebakhwo eshindu shiosi shiosi khubunyali bwa Nyasaye ta bebutswa yeyitsialila butswa obukhumi bwebikhumila biabelihebe bokhubilenje, ebikhumila bia abokhutsifarasibe, nende tsinzofutsie amakhumi munane. 5Kho naseera litookho lia Yuda nende okhusanjilila olukoba lwa Bethzuri, olwali tsikilomita tsihela amakhumi kataru emulambo welitookho lia Yerusalemu.
6Olwa Yuda Makabayo nabandube bahulila mbu Lisia aseeranga tsingoba tsiabwe, balila nibekhuula obutinyu halala nende abandu boosi pe. Nibamuhabila OMWAMI Nyasaye mbu abarumile omumalaika omulayi okhubahonokosia. 7Yuda Makabayo niye owaranjilila okhwimanula, mana natsuuba abashie mbu boongaane ninaye, beyinie obulamu bwabwe okhukhonyelela Abayahudi bashiabwe. Kho nibarula ninaye halala nibeshiele muno nende tsiyemi tsinyinji. 8Nebutswa olwa bali nibashili okhutsia ehale okhurula Yerusalemu, betsukhana okhunyoola mbu bali nibemililungwa nende owelihe owali naniinile khufarasi. Yali niyefwalile tsingubo tsindafu khandi niyemanuule ebimanulwa bieitsahabu. 9Mana boosi halala nibamukalusilia Nyasaye orio, khulwa tsimbabasitsie. Okhuba yali nabahelesiye itswoni yokhubanyalila okhuseera abandu halala nende tsisolo nabulimo tsimbalaba nende okhulikulula amasiisi akakaasibwa okhurula khushibia. 10Kho barula nibatsia imbeli nibeerecheeshe khulwa lihe, nibemiliilwe nende omukhoonyi owali narulile mwikulu oyo, okhuba OMWANI Nyasaye yali nababeleele tsimbabasi. 11Baseera abasuku babwe shinga tsitalanyi, ne nibeera abelihe ebikhumila ekhumi nashilala (11,000) abokhubilenje, eshikhumila shilala nende ebikhumi bisasaba (1,600) abokhutsifarasi, nende okhubakhola abandi boosi okhwilukha khulwa okhuhonokosia obulamu bwabwe. 12Abanji khubandu beelukha abo bali nibasalisiibwe, khandi nibakosiiye ebimanulwa biabwe. Kata Lisia mwene yesi yeelukha nafwimbiibwe omurwe.
Lisia akaasia omulembe nende Abayahudi
(1 Mak. 6:56-61)
13Ne okhuba Lisia yali omuchesi, yayililisia khukokhuhulwakhwe mwihe, mana namanyilisia mbu OMWAMI Nyasaye niye owanyalilanga Abayahudi okhuhula. Khulweshio, yabarumila likhuwa, 14nabahombelesia mbu bachame bafuchilisanie okhukaasia omulembe munjila ya habwene. Naye nalaka mbu alaboola nomuruchi afuchilile okhuba omwitsa wabwe. 15Okhuba kano kali khulwa obulayi obwa Abayahudi, Yuda Makabayo yafuchilila koosi aka Lisia yali namureebile, okhuba khandi omuruchi yali namalile okhufuchilila nende okhwinjisia aka Yuda yali namureebile okhubirira mubarwa ya Lisia yali nahandiiche.
Ibarwa ya Lisia khu Abayahudi
16Lisia yahandichila Abayahudi nabola ari, “Amashiesio kanje koole khwinywe abandu belihanga lia Abayahudi. 17Abarume benywe Yohana nende Abusalomu, bayambelesiye ibarua yamwabaruma okhundeerira, ne, benyile mbu efuchilile akahandikwa mubarwa eyo. 18Ndamumanyiye omuruchi koosi aka mwenya mbu amanyibwe, naye yafuchilila okhukhola koosi kanyala. 19Nimuba nimulatsiililila okhuba abeesikwa khuburuchi bwefwe, ndalakhola koosi aka enyala mutsinyanga etsitsanga khulwa obulayi bwelihanga lienywe. 20Endachilisiiye abarume benywe Yohana nende Abusalomu, halala nende abasinjilili banje mbu babukaane ninenywe mana musanjilane amakhuwa ako koosi. 21Emwikombela mbu amakhuwa kenywe koosi kabe amalayi, mulindwe. Ibarua yino ihandiikwe omwesi nikuli amakhumi kabili nakhane, okwa Diosikorinzio, omuyika kweshikhumi namakhumi kane namunane (148)#11:21 omuyika 148: nikwo omuyika kweshikhumi namakhumi kasasaba nende khane (164) Kristo Nashili Okhwibulwa. okwa muburuchi bweshialo shia Siria.”
Ibarwa yomuruchi Antioko yahandichila Lisia
22Omuruchi yahandichila Lisia naboola ari, “Eyirula khu Antioko, yule khumusiani wefwe Lisia. Nyoola amashesio. 23Okhuba papa wanje yamalile okhufwa, ndenya mbu abandu boosi abali hasi woburuchi bwanje bekholele amakhuwa kabwe abeene nibalenjililwa nomundu yesi yesi tawe. 24Emanyile mbu Abayahudi shibenyanga mbu bamenye okhulondana nemilukha echia Abagiriki, shinga olwa papa wanje yekombanga tawe. Habula bekombanga mbu bamenye okhulondana nende emilukha chiabwe abeene. 25Ne okhuba ndikomba mbu bamenye nibalali nokhuhenda emioyo ta shinga olwa amahanga kandi koosi akomuburuchi bwanje kamenyanga, endachilisia mbu bakalusilibwe Ihekalu yabwe, khandi babe abalekhuule okhumenya okhulondana nende emilukha chiabakuuka babwe. 26Kho bulaba obulayi nobamanyia amakhuwa ako, mana khandi obasubisie mbu ndalaba omwitsa wabwe, kho mbu banyale okhukhola amakhuwa kabwe abeene mumulembe nibalalikhwo nende liosi liosi elibahendia omwoyo tawe.”
27Omuruchi yahandichila abandu belihanga elia Abayahudi naboola ari, “Eyirula khumuruchi Antioko, yuule khubemilisi aba Abayahudi nende Abayahudi bandi boosi. Munyoole amashesio. 28Esuubila mbu mutsilililanga obulayi shinga olwa ndikombanga mbu kabe kario. Isie endi omulamu. 29Menelao yaamboleele akokhwikomba khwenye okhukalukha ewenywe, kho mbu munyale okhukhola amakhuwa kenywe abeene. 30Khulweshio, ebasuubisia abanababe nibakaluushe ewabwe omwesi kwa Kisantsiko nikuli amakhumi kataru mbu, balariakhwo eshindu shiosi shiosi tawe. 31Munyala okhutsiililila okhulonda amalako kenywe kebiakhulia nende akandi koosi shinga olwa mwali nimwanala okhukhola. Khandu abulaho Omuyahudi oulasandibwa khulwa likhuwa lia yakhola mukhukorwa tawe. 32Ebarumilanga Menelao okhubatinyisia emioyo. 33Mulindwe. Ibarwa yino ihandiikwe omwesi kwa Kanziko nikuli ekhumi nakharano, omuyika kweshikhumi shilala amakhumi kane namunane (148).” #11:33 omuyika 148: nikwo omuyika kweshikhumi shilala amakhumi kasasaba nakhane (164) Kristo Nashili Okhwibulwa.
Ibarwa eya Abaroma bahandichila Abayahudi
34Abaroma bosi khandi bahandichila Abayahudi ibarwa nibaboola bari, “Eyirula khu Kwinto Memio nende Tito Manio, abasinjilili aba Abaroma, yule khu Abayahudi. Munyoole amashiesio. 35Ifwe khufuchilisania nende koosi aka mwahebwa nende Lisia, omusiani wabwe omuruchi. 36Bulano buri khuli khunjila okhutsia Antiokia. Khulweshio, henjelesie obulayi koosi aka Lisia yasaba omuruchi, mana mukhurumile amakalusio mubwangu, kho mbu khunyale okhubareebela aka mwenya okhurula khumuruchi. Mukhole murio bwangu shinga olwa munyala, 37ne mulashinde ta, kho mbu khumanye mbu mwenyile murie. 38Mulindwe. Ibarwa yino ihandiikwe omwesi nikuli ekhumi nakharano okwa Kisantsiko, omuyika kweshikhumi shilala amakhumi kane namunane (148).”#11:38 omuyika 148: nikwo omuyika kweshikhumi shilala amakhumi kasasaba nakhane (164) Kristo Nashili Okhwibulwa.
Currently Selected:
2 MAKABAYO 11: OLUDC
Highlight
Share
Copy
Want to have your highlights saved across all your devices? Sign up or sign in