Mat. 3
3
Lililwacha lia Yoana Omubatiisi
(Mk. 1.1-8; Lk. 3.1-18; Yn. 1.19-28)
1Siise esio Yoana Omubatiisi echa mu sichiimi sie Buyuda mala arakikha khukhwilwacha ali, 2#Mat. 4.17; Mk. 1.15 “Yekanila, sikila bubwami bwe Mwikulu buli siimbi.” 3#Isa. 40.3 Sikila yuno niye, omung'oosi Isaya aaloma ali,
“Kumumilo kwo mundu kuuliilikha mu sichiimi kuli,
‘Rekekha kumuila kwo Mwami, kololosia chingila chewe.’ ”
4 #
2 Bab. 1.8
Yoana aafwaranga engubo eye bufuumbo bwe ngamia ne kumusiipi kwe lisieelo mu sibuno. Siakhulia siewe siabechanga chisike ne bubuukhi bwe mundaa. 5Mala babaandu be Yerusalemu nede e Buyuda ne lubeka lwe lukoongo luloondekhana khu Yoritani bacha niio ali. 6Nio beyama bubwoni bwabwe mala babatiisibwa mu luuchi lwa Yoritani.
7 #
Mat. 12.34; 23.33 Ne nga abona Bafarisayo bakali ne Basatukayo ne bamwichakho khubatiisibwa, ababoolela ali, “Enywe lisaaye lia nafwo! Naanu owamubooleele khukhwilukha siiukuumo sisiicha? 8Nono khola bikholwa bibiolaana ne liliekanila lienywe. 9#Yn. 8.33 Ne mukhebaasia muli, ‘Efwe khuli babaana ba Paapa Aburahamu, tawe!’ Sikila ese muboolela enywe ndi, Wele anyala akhola kamabaale kano kaaba babaana ba Aburahamu. 10#Mat. 7.19 Akhaba luno luri eaywa yareerwe khu bisina bie kimirongooro, khwako buli murongooro kukhaama kamatuunda kamalayi tawe, kuliremwa ne khumwaatwa mu mulilo. 11Ese mubatiisia enywe ne kameechi sikila liliekanila lienywe, ne oyo olikho owicha enyuma wase ali ne bunyali khukhukhila ese, ese se nolaana khusuta biraaro biewe tawe. Alimubatiisia enywe mu Roho Omutakatifu ne kumulilo. 12Lutelu luli mukhono mwewe, alisenjula luuya lwewe mala abuunge engaanu yewe mu siaki, ne aliosela likhuuchi mu mulilo kukhasima tawe.”
Yesu abatiisibwa
(Mk. 1.9-11; Lk. 3.21-22)
13Siise esio Yesu ama Kalilaya acha Yoritani Yoana amubatiisie. 14Ne kakhali Yoana akhaka khumukaania ne aloma ali, “Ewe wicha khwise oriena mala ewe okhoyele umbatiisie ese?” 15Ne kakhali Yesu amukobosia ali, “Lekha kabe kario siise sino, sikila buli bulayi efwe khutabusie niko Wele enya.” Khwako Yoana afukiilila.
16Yesu nga ne amala khu batiisibwa, arura mu meechi, ne abwene ne abwene, likulu liamwikukhila, abona Roho owa Wele ne ekha nga liuusi mala aamwimakho. 17#Lir. 22.2; Chiny. 2.7; Isa. 42.1; Mat. 12.18; 17.5; Mk. 1.11; Lk. 9.35 Kumumilo kwama mwikulu ne kuloma kuli, “Yuno ali Omwana wase omusiime, ousiimisia lukali.”
Currently Selected:
Mat. 3: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019