Lir. LIMANYISIA
LIMANYISIA
Sifuno sie lisina “Lirakikha” sili khunyoa: Sitabu sino siboola lukano lwe khubaang'ana khwe likulu ne liloba, lirakikha lio mundu, lirakikha lie bumayaanu ne kumunaanio mu sibala, ne lirakikha lie bikholwa bia Wele khu baandu bewe. Sitabu sie lirakikha sino sinyala siakabwamo abili:
(1) Kimiliango kia 1—11 kiboola libaang'ana lie sibala ne lukano lwe khunyoa khwe sikuuka sie babaandu. Kimiliango kino kiboola chingano cha Adamu ne Hawa, Kaini ne Apili, Noa ne kameechi ka kabunia babaandu, ne lukano lwe kamombakho ka Babeli,
(2) Kimiliango kia 12—50 kiboola chingano che bakuuka be khunyoa be Baisiraeli. Owe khunyoa ali Aburahamu, owamanyikhana khuuba ne lisuubila ne buuri khu Wele. Enyuma wewe chiliio chingano cho mwana wewe Isaaka no mwichukhulu wewe Yakobo (owalaangwa Isiraeli). Kimiliango kino kilimo lundi chingano che Babaana ba Yakobo ekhumi ne babili babarakikha chikholo ekhumi na chibili cha Isiraeli.
Lukano lwa Yosefu, mulala khu baana ba Yakobo ne lukano lwe bikholwa bibiakila Yakobo ne babaana bewe babaandi ne babaana baabwe bacha bamenya mu Misiri, chibukula bubweyaangu bubalaayi mu miliango kino.
Sitabu sino siboola chingano khu baandu, ne lukali silomaloma khu bikholwa nibio Wele akhola. Sirakikha ne limanyisia lili Wele abaang'ana likulu ne liloba ne simaliilisia ne lisuubisia sili Wele akhachiililile khuyeeta babaandu bewe. Mu sitabu mwoosi, Wele niye olomekhakho lukali, niye okhalakila ne khuukuuma abo bakhola kamakhiikha. Wele niye orangiriranga ne khuyeeta babaandu bewe, lundi ali niye okholaanga limenya liabwe khuba lilayi.
Sitabu sie kamakhuwa ke khaale sino siaandikwa khukhwekesia chingano che lisuubila lie babaandu mu Wele ne sifuno sie khukhola lisuubila lino lichiililile.
Kaalimo mu bwimbi
Libaang'ana lie likulu, liloba, ne babaandu 1.1—2.25
Lirakikha lie bubwoni ne kumunaanio 3.1-24
khukhwama khu Adamu khukhwola khu Noa 4.1—5.32
Noa ne kameechi ka kaabunia babaandu 6.1—10.32
Kamombakho ka Babeli 11.1-9
Khukhwama khu Shemu khukhwola khu Aburamu 11.10-32
Aburahamu, Isaaka ne Yakobo 12.1—35.29
Lisaaye lia Esau 36.1-43
Yosefu ne bawandaaye 37.1—45.28
Baisiraeli mu Misiri 46.1—50.26
Currently Selected:
Lir. LIMANYISIA: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019