Sekaria 3

Yochua lo erai emuron loapolon

1 # Esira 5:2; Tood 12:10 Anakisingolikinet a ache, kedodik ayong Ekapolon Akuj emuron loapolon enyaritae Yochua ewei alongaren emalaikat a Ekapolon Akuj. Aloteten keng, engolik Ekipe ewei esaki akititakin Yochua. 2#Yuda 9 Tolimok emalaikat a Ekapolon Akuj Ekipe ngolo tama, “Iyong Ekipe, nyope kikilakinea Ekapolon Akuj iyong! Ee robo, kikilak iyong Ekapolon Akuj nakolong aseuni Yerusalem. Ikoni itwaan en akitoe na akopunio anakim.”

3Awei Yochua alongaren emalaikat enapit ngiworui lu iunukat. 4Tolimok emalaikat ngirukitos keng tama, “Talachasi ngiworui lu iunukat enapit ngesi lugu.” Ani erumor tolimok ngesi Yochua tama, “Alema ayong akisech kon sodi kainak iyong ngiworui lukiteat tanap.”

5Tolimok ngesi kesi tama, “Tobutokisi ngesi apukot naasegan nakou.” Apot kesi kikokis neni, kitanapa ngesi apukot naasegan ka ngiworui, towei emalaikat a Ekapolon Akuj kaneni.

6Kichikichik emalaikat Yochua tama, 7“Akuj Namerikanyer ebala, ani kiwap iyong ngirotin kang kiira ngakiro nakalimokini ayong, ipolokini iyong awi kang ka ngalaarin. Eirari ayong ngakilipasinei kon, loger lo apupio ngakilipasinei a ngimalaikae alu ewaasi alongaren kang. 8#Yer 23:5; 33:15; Sek 6:12 Topupok robo Yochua, iyong lo irai emuron loapolon a Akuj, topupokisi esi dang ngimurok luche lu irukito ka ngesi, lu iraakasi emachar a ngirwa aluajokak isidiuno. Edodiuni ayong ekasuban etich kang lo enyaritae Ateni! 9Toyena atamar ewaak ayong ngaren Yochua amoru apei na eyakasi ngireetin ngikan-kaarei. Egerokini ayong ngagiran kidiama keng, sodi atolema akisech a akwap kana a akolongit a apei. Ee robo, ayong Akuj Namerikanyer ngesi alimu nguna. 10#Mika 4:4 Akolongit ngina, enyarauni ipei kus daang ekidunyet keng, kiboikinos nikaalimon namanat a ngimusabib ka ngimeyana.”

Currently Selected:

Sekaria 3: ABIBILIA

Highlight

Copy