Ekimar 21
21
Edwang Ngikanaan
1Na eirarea ekapolon a Ngikanaan lo a Arad, lo alomit Negeb atamar eponito Ngisirael iwapito erot lo a Asarim abu ngesi kitijik kesi sodi torik ngiche. 2Apot Ngisirael kikongo ani a Ekapolon Akuj ebalasi, “Ani kimiek iyong sua atoremo ngitunga lugu, kitiliwori sua kesi ka ngirerea kech ngikon jik, sodi enyasutu ngirerea kech.” 3#Ekim 33:40 Abu Ekapolon Akuj kiira ngakiro kech, sodi kingarak kesi akirem Ngikanaan. Apot Ngisirael tomunyasi kesi nabo kinyasut ngirerea kech, sodi tolimokis akwap ngina ekiro be Orima.#21:3 Orima; eger a akiroit kana a Ngaeburaniae ngesi a atamar “Akinyasun”
Emun lo asubitae a asuat ananyang
4Torotokis Ngisirael alomoru a Hor, kiwapa erot lo elosi napak a Akaba sodi kirimieto akwap a Edom. Apot kibunyakinos analotoru kech, 5sodi kisuburata Akuj ka Musa, ebalasi, “Nyo kolong kipudunio iyong sua alo Misiri atotoanikisi nariet na emam akimuj ka ngakipi naga? Nyikinaikini sua nabo akimuj naaronon naga!” 6Abu Ekapolon Akuj tomeu ngimunio luadwarak lotunga, tokonyakonyaasi Ngisirael lukaalak totoaka. 7Potu ngitunga nia Musa tamasi, “Kisech sua ani kisuburaa Ekapolon Akuj ka iyong. Kilip tokona Ekapolon Akuj tolema ngimunio lugu.” Sodi abu Musa kilipak ngitunga. 8Ani erumor tolimok Ekapolon Akuj Musa atamar tosubak emun a asuat kiwaak napir, sodi itwaan daang ni ekonyi emun, kingolik emun lo a asuat tojoker. 9#Etal 2:1 Abu Musa tosubak emun a asuat ananyang sodi kiwaak napir. Itwaan cha daang ni akonyi emun, abu kingolik emun lo a asuat ananyang, sodi tojoker. #1 Kor 10:9 #2 Kapol 18:4; Yoa 3:14
Napei alomoru a Hor tanang nadipo a Moab
10Torotokis Ngisirael toloma Obos. 11Ani erotokinete kaneni, toloma Abarim anariet ana eyei kide akwap a Moab. 12Ani erumor toloma nadipo a Sered. 13Ani enyounete kaneni, toloto toloma kwap angolol a Arinon, anariet ana enangit nakwap a Ngiamor. (Arai Arinon ekukuor a Ngimoab ka Ngiamor.) 14Ngakiro nguna ngesi igiritere nakitab a ngijiesinei a Ekapolon Akuj atamar,
“Ere a Waeb anakwap a Supa,
ka ngadipoe a Arinon,
15ka ngakokoriyoret a ngadipoe,
na enangito lore a Ari,
tanang lokukuor a Moab.”
16Ani enyounete kaneni toloto ni enyaritae Ngakare, ni alimokinea Ekapolon Akuj Musa tama, “Tochunak ngitunga daang wapei ainak ngakipi.” 17Sodi toeokis Ngisirael eeos logo.
“Ngakare yautu ngakipi kus.
Sodi atoeonokisi sua ngakipi.
18Akar na abokete ngikarikok a ngitunga,
ka ngikajakaanak.
Ebokio a aburo a apolou,
ka ngakito kech.”
Torotokis kesi anariet tananga Matana. 19Ani enyounete kaneni, toloto Naaliel, ani enyounete kaneni toloto Bamos, 20ani enyounete kaneni toloto nadipo a akwap a Ngimoab, kwap aita a emoru a Pisiga, na erounit ariet.
Edwang ngikapolok lu anyaritae Sion ka Ogu
(Akitamunet a Etal 2:26–3:11)
21Ani erumor tomeasi Ngisirael ngitunga nia Sion alo arai ekapolon a Ngiamor tamasi, 22“Kimiekinae sua etoro nakwap kon. Kiwapi sua ka ngaatuk kosi erukudi jik, nyikinachari namanat kus ka namanat a ngimusabib, nabo nyikimasi ngakipi a ngakare kus. Kitori sua lorukudi loapolon#21:22 lorukudi loapolon; kori erukudi a ekapolon. jik tanang kipudori anakwap kon.” 23Nakaneni abu Sion tonger Ngisirael itorete nakwap keng. Abu ngesi tochunak ngasigerea keng toloto Yaasa anariet kitijikis Ngisirael. 24Nakaneni apot Ngisirael taara ngimoe kech lukaalak alojie, sodi todemasi akwap kech napei anangolol a Arinon tanang kwap Yabok, nia Ngiamon, kainyo eyokiyo ekukuor a Ngiamon lokojokon.#21:24 kainyo ... lokojokon; ebalasi ngagiran ngache nangorok tanang Yaser ni arai ekukuor a Ngiamon. 25Apot Ngisirael todemasi Ngiamor ngirerea daang a aapei ka ere a Echibon ka ngadakarin keng daang, sodi toloma neni. 26Echibon arai ere apolon a Sion alo arai ekapolon a Ngiamor, losek etijit ekapolon longorot a Ngimoab, sodi tolema akwap keng daang tanang nangolol a Arinon. 27Ngakiro nguna kesi ebalatar ngikaitak eeosi,
“Potu Echibon,
lore a Sion alo erai ekapolon!
Kisaki engolikisi edukio,
tobong loger longorot.
28Kolong alore alo a Echibon kalo,
anyouniyete ngasigerea a Sion loger a akim.
Kinyasut ere a Ari alo Moab,
kirikasi#21:28 kirikasi; ani a Ngaeburaniae erai ngikapolok a. ngimukur alowae alo alokidiama Arinon.
29 #
Yer 48:45-46 Oitiakoi! Abe etioko nginyas ianyunete esi
ngitunga a Moab!
Esi lu ilipito Chemoch,
Kimunyar esi!
Emiekini kolong akuj kus
ngikiliok edokinete nakwap ache.
Kimiek ngaberu eliwor ngarikon
a ekapolon a Ngiamor.
30Nakaneni amunyar tokona ngalesea kech.
Napei alo Echibon tanang Dibon.
Napei alo Nachim tanang Nopa, diyete Medeba.”
31Sodi apot Ngisirael toloma nakwap a Ngiamor. 32Tomea Musa ngitunga akireb Yaser. Tolemasi Ngisirael ere ngolo ka ngadakarin keng, sodi kitwarakis Ngiamor lu alomito neni.
33Ani erumor toreas Ngisirael kiwapakis erot lo elosi Bachan. Abu Ogu lo arai ekapolon a Bachan potu ka ngasigerea keng akitijikin Ngisirael alo Edirei. 34Tolimok Ekapolon Akuj Musa tama, “Nyiem ngesi. Kainakini ayong iyong agogongu na idwangea ngesi, ka ngitunga keng daang, ta akwap keng. Tosubakinea ngesi ngakiro nakolong isubakinea iyong Sion, lo arai ekapolon a Ngiamor lo apolokinit ere a Echibon.” 35Sodi apot Ngisirael taara Ogu, ka talokookeng, ta ngitunga keng daang. Emam tani ipei ni abu topuun toyar. Ani erumor toloma kesi nakwap a Ogu.
Currently Selected:
Ekimar 21: ABIBILIA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA (c) 1999
