Matayo 24

Eruoro Yesu eger lo inyasunere akai a Akuj

(Mariko 13:1-2; Luka 21:5-6)

1Torotok Yesu alokai a Akuj, ani eringa elosi, pot ngirukitos keng ni ayei ngesi kidodikis ngesi eger lo edukitere akai a Akuj. 2Nakaneni tolim tama, “Iteete esi nugu daang, kori ai? Kalimokinit ngakiro na iteni atamar, emam tani amoru apei kane na idongi edukokina, eukorio ngamoru daang.”

Ngichan ka aboliaro

(Mariko 13:3-13; Luka 21:7-19)

3Na ebooyo Yesu alomoru a ngikito a akimiet, pot ngirukitos keng kingita ngesi anikech make tamasi, “Tolimokinae sua atamar ori esubakinotor nu daang, nabo nyoni esubakin toyenunere atamar anang abongun kon ka esal a akwap.” 4Tatachak Yesu tama, “Tochoikinos! Kuriasi itwaan nyikingal esi! 5Epote ngikaalak iruorosi a ekiro kang ebalasi, ‘Ayong arai Kiristo.’ Ingalaate kesi ngitunga lukaalak. 6Iirarete esi echale a ejie alodiye, nabo iirarete ngakiro a ejie anikalonan. Nakaneni kuriasi nyikibul, kainyo esubakinosi ngakiro na ikote nguna, nakaneni nyidodiunito kesi atamar anang esal. 7Ejikinosi ngitunga a akwap aapei kalu anache, ngitunga a ekapolon a epei eremete ngitunga a ekapolon aloche. Emini eron a akoro ka amaran a akwap lowaitin ngigelagelae. 8#Mat 10:22 Eliwor ngakiro nguna akisiakinet a aboliaro loger a ariaba ana ekingaren ana edolio ikoku akidouno.

9“Dio kirumun esi kitoboliare sodi kitaar. Kiremokinosi esi ngitunga a ngakwapea kadaang kotere ayong. 10Epalikinete ngikaalak anupit Akuj ngirwa ngulu. Elimonorosi ngitunga make sodi toremonokinos make. 11Nabo epote ngikadwarak lukaalak lukaliokok kingalata ngitunga lukaalak. 12Kona ekeikinotor naaronok akwap daang, elilimiyorete lukaalak tapalikis amina. 13Nakaneni ngini enaikini tanang losal, eyuunio. 14#Mat 10:22 Ngakiro Naajokak a Apolou a Akuj nu itatamio anakwapea kadaang toyeneta ngitunga daang, ani erumor tanang esal.

Ekenyasunan loaronon noi

(Mariko 13:14-23; Luka 21:20-24)

15“Ingolikinete ‘Ekenyasunan Loaronon noi’ ewei ani italeunitoe, loger lokolong alimunitor ekadwaran a Akuj Daniel. (Toyen ekesoman atamar nyo eger a ngakiro kanu!) 16Ejoikinit lu eyakasi nakwap a Yudea ematarosi lomoru. 17Itwaan ni edokit kidiama akai keng nyeetiyaun alemar ibore ni eyei kai. 18Itwaan ni eyei mana nyejoikinit ebongori alemun eworu keng. 19Erokearosi noi ngakiro ngirwa ngulu ani a ngaberu ana epotiete ka na itanakete. 20Kilipa Akuj nyimatarosi ngirwa lu akiporo kori akolongit na a Sabato. 21Kainyo erokearosi noi ngichan ngirwa ngulu kidwanga daang lu apean nakwap napei kolong anakisiakinet tanang tokona. Kori nyepete nabo jik ngichan lu ikote ngulu. 22#Dan 9:27; 11:31; 12:11 Nakaneni atub kolong Akuj ngirwa ngulu. Arai kolong nyiikok neni, kemam itwaan epuun. Nakaneni kotere ngitunga keng luseuna, atub kolong Akuj ngirwa ngulu. #Luk 17:31 #Dan 12:1; Tood 7:14

23“Ani kilimok esi itwaan tama, ‘Kingolikisi a! Kiristo lo!’ kori tama: ‘Nye ye’, nyiinupa ngakiro keng. 24Kainyo epote ta Kiristo lukaliokok ka ngikadwarak lukaliokok. Esubete kesi ngakitoodikinet nakailiilok ka nakatalarak esakete akingalare tani ngitunga luseuna a Akuj, erai kepedorete akingalare. 25#Luk 17:23-24 Kiirasi! Kalimok ayong esi nu eringa ngirwa ngulu nyenanga.

26“Kori ani kilimokis esi ngitunga tamasi: ‘Ayoro, eyei ngesi ama nariet’, nyiilot inaa, kori ani ketamasi: ‘Ayoro, edukit kane.’ Kuriasi nyiinupa! 27Kainyo ikoni abunere a Lokookeng a Itwaan eger lo imiliaunea napei alo kide tanang too.

28 # Luk 17:37 “Nicha eyei ibore nikatoan, ngesi ni iudakina ngataruk.

Abunere a Lokookeng a Itwaan

(Mariko 13:24-27; Luka 21:25-28)

29“Atipei na edaunotor ngichan a ngirwa kangulu, eribokini akolong, tojongo elap akicha. Echakunosi ngikanyer anadis, nabo emaranikini agogongu daang nakaninikan eyei kidiama. 30Nakaneni etakanuni akitoodikinet a Lokookeng a Itwaan anadis. Ikalounete ngibukui daang anakwapea na ingolikineta Lokookeng a Itwaan etiyaun eyei lodowon a adis, etiyaun ngesi a agogongu ka apolou naapolon noi. 31#Isa 13:10; 34:4; Ese 32:7; Yoel 2:10,31; 3:15; Tood 6:12-13 Ekutakinio aburuch sodi tomea ngesi ngimalaikae keng lowaitin daang a akwap sodi tochunut ngitunga luseuna a Akuj alowae a epei a akwap tanang lowae loche. #Dan 7:13; Sek 12:10-14; Tood 1:7

Akitatama ngakiro a emeyen

(Mariko 13:28-31; Luka 21:29-33)

32“Kimiekisi ngakiro a emeyen kitatama esi. Na epuseakuuneta ngaten keng tokilikiluut sodi kiniapasi ngakui, iyenunete atamar aapuu akamu. 33Aloger alopei kangolo, na ingolikineta esi ngakiro nu daang toyena atamar aapiki ngesi adolun. 34Kalimokinit ngakiro na iteni dir atamar esubakinosi ngakiro nu daang eringa epewae a ngitunga alu tokona eyarete nyetoaka. 35Edaun adis ka akwap, nakaneni nyedaunosi ngakiro kang jik.

Emam itwaan eyeni akolongit kori esaa

(Mariko 13:32-37; Luka 17:26-30,34-36)

36“Nakaneni emam itwaan eyeni akolongit ngina kori esaa atamar enangi ori, nyeyenete tani ngimalaikae anadis kori nyeyeni Lokookeng a Akuj. Apa bon ngesi eyeni. 37Ikwaanikin abunere a Lokookeng a Itwaan ka ngirwa lu kolong a Noa. 38Kolong eringa nyenanga ngirwa lu aburuchiareta ngakipi akwap, emujete ngitunga, tamaase. Eutanarete ngikiliok nabo epotonorio ngapesur kuutae tanang akolongit na alomarea Noa tooma natubwa. 39Nyeyenuna kesi jik na asubasi tanang epote ngakipi tomunyasi kesi daang. Ikokinete ngakiro neni na ebunio Lokookeng a Itwaan. 40Esaa ngolo, esubete ngitunga ngiarei etich alomana. Elemario ipei kimiekinae niche. 41#Siak 6:5-8 Eriamunio ngaberu ngaarei iriete, elemario apei, kimiekinae nache. #Siak 7:6-24

42“Kiboikinos robo irichuna kainyo nyiyenete esi akolongit na ebunio Ekapolon kus. 43Nakaneni kalimokinit ngakiro na iteni atamar arai toyeni elope a awi akwaar na ebunio ekokolan, kekieny ngesi kiteu ekokolan nyeelom nawi keng. 44#Luk 12:39-40 Kotere nguna, ejoikinit tani esi dang iboikinosi isubakina eriyan, kainyo ebuni Lokookeng a Itwaan esaa lo nyitamitotor esi atamar ebuni ngesi.

Ekasuban etich lo emunoi ka lo nyemunoi

(Luka 12:41-48)

45“Ngae tokona erai ekasuban etich lokooson lo emunoi? Ngesi ngolo alimoki ekapolon keng atamar topolok ngikasubak etich luche, nanak kesi akimuj na enangea esaa. 46Elakar noi ekasuban etich ngolo na ebongunio ekapolon nawi toriam ngesi iwapit nguna! 47Kalimokinit ngakiro na iteni dir atamar, elimokini ekapolon ngolo ekasuban etich ngolo atamar topolok ebari keng daang. 48Nakaneni ani kerai ngesi ekasuban etich loaronon, etamari ngesi kori nyebonguni ekapolon keng atipei. 49Elomakini ngesi akibungare ngikasubak etich luche, nabo kimuja ngesi ka akimat aapei kalu ilewat. 50Ebonguni ekapolon a ekasuban etich kangolo akolongit ache a esaa alo nyeyenea ngesi atamar ebuni. 51Iteli ekapolon ngolo ngesi tapak ngaarei, kikwaanikinos ngesi ka ngikamodeanak. Min ngesi ni igoror sodi tokirich ngikel.

Currently Selected:

Matayo 24: ABIBILIA

Highlight

Copy