OBUBALI 4
4
Emilimo echia Abalawi beshilibwa shia Kohatsi.
1OMWAMI Nyasaye naboolela Musa nende Haroni ari, 2“Obale abeshilibwa shia Kohatsi muboluyia lwa Abalawi, mutsinzu tsiabwe nende mubilibwa biabwe. 3Obale okhurula khubemiyika amakhumi kataru okhuula khubemiyika amakhumi karano abanyala okhukhalabana mwiheema lianje litakatifu. 4Chino nichio emilimo chiaboluyia lwa Kohatsi mwiheema litakatifu elo; okhulinda ebindu ebitakatifu muno.” 5Mana OMWAMI Nyasaye nalachilisia Musa ari, “Olwa muba nimuhuyia ikambi, Haroni nabasianibe okhuula benjile mwiheema, mana beeshie hasi ingubo yishinganga lisanduku elo. 6Balifuunishe neshifuunikho shieliseelo linyushe, ne baalakhwo ingubo yobukondo bwa buluu yoosi, mana benjisiemwo ebitiisi biokhuchinga lisanduku elo.
7“Ne khumeesa eya emikaate emitakatifu, baalekhwo ingubo yobukondo bwa buluu, ne barakhwo tsisahani, ebikaye biobubani, tsibakuli nende tsinyungu tsiomusango kweidivai, nakwo omukaate kwa buli inyanga kubetsenjekhwo. 8Mana balalalifwimba liosi pe neingubo inzakhanyu, nende okhufunikha ebindu tsana ebio neliseelo linyushe, mana benjisiemwo eshitalatalilo eshiokhuchinga.
9“Khandi balabukula ingubo yobukondo bwa buluu, ne bachifunikha khushichibi shietsitaha, nende tsitaha tsiashio, netsindambi tsiashio, nebichinjilo biamafura biashio biosi ebiikhonyelungwa okhubiikhamwo amafura. 10Ne balashibohela halala nende ebimanulwa biashio mwiseelo linyushe mana bashire khushitalatalilo eshiokhuchinjilakhwo.
11“Ne khu shimalilo shiemisango shietsahabu balaalakhwo ingubo yobukondo bwa buluu, ne bafunikhakhwo liseelo linyushe elo, mana benjisiemwo tsinyanzo etsiokhuchinga. 12Mana balabukula ebimanulwa biosi ebiabakhalabanilanga habundu hatakatifu, babiboyele mungubo eyobukondo bwa buluu eyo, bafunikhakhwo liseelo linyushe, mana babire khushitalatalilo eshiokhuchinga. 13Mana balarusia likoshe khushimalilo shiemisango, ne balakhwo ingubo yobukondo bweisambarau; 14Ne balara khuyo ebimanulwa biashio biosi ebia bekhoonyelanga nibakhalabana hashimalilo shiemisango. Mbiebinjo mbu, tsinyungu, amakhango, emiikho, olweelo nende ebimanulwa bia hashimalilo shiemisango biosi; ne bashifunikha neliseelo linyushe, mana babire khushitalatalilo shiokhuchinga. 15Ne olwa Haroni nabasianibe balaba nibamalile okhufunikha habundu hatakatifu yaho nende ebimanulwa biaho. Olwa muba nimwenyanga okhuhuyia ikambi, nilwo olwa aboluyia lwa Kohatsi betsa okhuchinga ebindu bino biosi, nebutswa balatilakhwo khubindu ebitakatifu tawe, nibatilakhwo balafwa.” Echio nichio emilimo chiaboluyia olwa Kohatsi buli olwa bahuyia liheema litakatifu.
16“Naye Eliazari omusiani womwisaaliisi Haroni, alasinjilila amafura ketsitaha, nobubane, nomusango kweimele okwa buli lwosi nende amafura kokhutsushililwa. Khandi alasinjilila ebindu biosi ebia lisanduku liamalako nende biosi ebilimwo, ebindu bia habundu hatakatifu nende ebimanulwa biaho.”
17OMWAMI Nyasaye naboolela Musa nende Haroni ari, 18“Shiolalekha abandu beshilibwa shia Kohatsi berwe, 19khulwa okhusita ahambi khubindu ebitakatifu bino tawe. Khulwa okhwikalila kano, Haroni nabasianibe balenjilanga mwiheema nokhuhelesia buli mundu omulimokwe nende eshia akhoyile okhuchinga. 20Nebutswa abeshilibwa shia Kohatsi nibenjila mwiheema mana balola abesaaliisi nibakasinjia ebindu ebitakatifu ebio balafwa.”
Emilimo echia Abalawi bomushilibwa shia Gerishoni
21Mana OMWAMI Nyasaye naboolela Musa ari, 22“Khandi obale aboluyia lwa Gerishoni mutsinzu tsiabwe nende mubiliibwa biabwe. 23Okhurula khubemiyika amakhumi kataru okhuula khubemiyika amakhumi karano, abanyala okhukhalabana mwiheema litakatifu. 24Chino nichio emilimo chiabwe mwiheema elo; 25okhuchinganga tsingubo tsinzeleesia etsiokhwisanduku elia mwiheema litakatifu, eshifunikho shialio, nende eshifunikho shieliseelo linyushe eshili hekulu khulio. Nende tsingubo etsishinganga hamuliango kweliheema, 26tsingubo etsielelanga mulwanyi olwabotokhana lisanduku nende eshimalilo shiemisango, ingubo eyishinganga hamuliango nende emikoye chialio nende ebimanulwa biosi ebikhoonyelungwa mwiheema elo. Abeshilibwa shia Gerishoni balakhola koosi akenyekha okhukholwa okhuloondana nebindu ebio. 27Musa nende Haroni okhuula balole mbu abeshilibwa shia Gerishoni bakholile emilimo chiosi khandi bachinje buli shindu eshia Haroni nende abasianibe babalachilisia. 28Echio nichio emilimo echia abeshilibwa shia Gerishoni batsia okhukhola mwiheema nibemililwe nende Itsamari omusiani wa Haroni.”
Emilimo chia Abalawi beshilibwa shia Merari.
29Khandi OMWAMI Nyasaye naboolela Musa ari, “Obale abeshilibwa shia Merari mubilibwa biabwe nende mutsinzu tsiabwe. 30Obale abasaatsa boosi abali nemiyika amakhumi kataru okhuula amakhumi karano, abanyala okhukhalabana mwiheema litakatifu. 31Emilimo chiabwe mwiheema elo chilaba; okhuchinga tsimbao tsielisanduku liamalako, tsisheti tsialio, ebitiisi bialio nende ebichibi bialio, 32nende khandi tsisiilo tsiolwanyi olwabotokhana liheema, nende ebichibi bialio, nebibambo bialio, nemikoye chialio, nende ebimanulwa bialio biosi, nende ebindi biosi; ne olachilisie buli omundu eshia akhoyeele okhuchinga. 33Echio nichio emilimo echia abeshilibwa shia Merari balakwa okhukhola mwiheema nibemililwe nende Itsamari omusiani womwisaaliisi Haroni.”
Okhubalwa okhwa Abalawi
34Mana Musa nende Haroni nende abemilisi bomukanda nibabala abeshilibwa shia Kohatsi, mubilibwa biabwe nende mutsinzu tsiabwe; 35Abasaatsa abali abemiyika amakhumi kataru okhuula amakhumi karano, abali nibanyala okhukhalabana mwiheema litakatifu, 36nibabalilwe mubilibwa biabwe bali abandu ebikhumila bibili, nebikhumi musafu nende amakhumi karano (2,750) 37Bano boosi nibo abomushilibwa shia Kohatsi abakhalabana mwiheema. Musa nende Haroni bababala nende okhubahandichisia shinga olwa OMWAMI Nyasaye yali niyabalachilisia okhubirira mu Musa.
38Abeshilibwa shia Gerishoni babalwa mubilibwa biabwe nende mutsinzu tsiabwe. 39Abasaatsa boosi abali bemiyika amakhumi kataru okhuula khubemiyika amakhumi karano, abakhalabana mwiheema litakatifu, 40bali ebikhumila bibili nebikhumi bisasaba nende amakhumi kataru (2,630). 41Bano boosi nibo abomushilibwa shia Gerishoni abakhalabana mwiheema. Musa nende Haroni bababala shinga olwa OMWAMI Nyasaye yali niyalachilisia.
42Abeshilibwa shia Merari babalwa mubilibwa biabwe nende mutsinzu tsiabwe. 43Abasaatsa boosi abali abemiyika amakhumi kataru okhuula khubemiyika amakhumi karano, abakhalabana mwiheema litakatifu, 44bali ebikhumila bitaru nebikhumi bibili, (3,200). 45Bano boosi nibo abomushilibwa shia Merari abakhalabana mwiheema. Musa nende Haroni bababala shinga olwa OMWAMI Nyasaye yali niyalachilisia okhubirira khu Musa.
46Kho Musa nende Haroni nende abemilisi ba Abaisiraeli babala Abalawi mutsinzu tsiabwe mubilibwa biabwe; 47Abasaatsa boosi abali abemiyika amakhumi kataru okhuula khubemiyika amakhumi karano abakhalabana nende okhuchinga liheema litakatifu, 48bali ebikhumila munane nebikhumi birano nende amakhumi munane (8,580). 49Buli abeshilibwa bahebwa omulimo kwokhukhola nende eshiokhuchinga shinga olwa OMWAMI Nyasaye yali niyalachilisia okhubirira khu Musa.
Kho babalwa bario shinga olwa OMWAMI Nyasaye yalachilisia Musa.
Currently Selected:
OBUBALI 4: OLUPR
Highlight
Copy
Compare
Share
Want to have your highlights saved across all your devices? Sign up or sign in
