MATAYO Okhumanyisia akalimwo
Okhumanyisia akalimwo
Injiili shinga olwa yahandikwa nende Matayo yinoosinjia shinga olwa Yesu ali ye omuhonia, owa Nyasaye yasuubisia abandube. Niye owa Nyasaye yahesiliamwo obusuubisiebwe khubandube mu Indakano Ikhulu. Amakhuwa Amalayi kano shikali butswa aka Abayahudi, aba Yesu yebulwamwo khandi namenya mubo bonyene ta, habula nakabandu boosi khushialo.
Matayo yahandika amakhuwa khu Yesu, nakaloosia obulayi. Achaakanga nende okhwibulwa khwa Yesu, niyenoosia akokhubatiisibwa nende okhuteemwakhwe. Mana aloosiakhwo obukholi bwa Yesu bwokhuyaala Injiili, okhwechesia nende okhuhonia abandu mu Galilaya. Olunyuma lwa ako, Matsayo yenoosinjia oluchendo lwa Yesu okhurula Galilaya natsia Yerusalemu nende akekholekha mwichuma liokhumalilikha mubulamu bwa Yesu. Amalilisinjia khulwa okhwinoosia akokhubambwa nende okhulamukha khwa Yesu okhurula mubafu.
Injiili yino yilolesinjia Yesu okhuba omwechesia omukhongo, ouli nende obunyali bwokhwinoosia eshisina shiamalako ka Nyasaye khandi owechesinjia akobwami bwa Nyasaye. Amechesio ka Yesu kano, kanyala okhukabulwamwo ebitonye biraano bino. Mbiebino mbu, (1) Aka Yesu yayaalwa nali khushikulu mbu akebiima ebilayi, akakhoyile okhukholwa, akabandu bakhanyoole nende akobulaame bwobwami bwa Nyasaye, (Omuliango kwa 5-7). (2) Amalachilisio aka Yesu khubeechibe ekhumi nababili khuburume bwabwe (omuliango kwa 10). (3) Tsinjelo khubwami bwa Nyasaye (omuliango kwa 13). (4) Amechesio keshisina shiokhuba omwechi wa Yesu (omuliango kwa 18), nende (5) Amechesio khukeshihesi shiobulamu bwabulano nende khukokhwitsa khwobwami bwa Nyasaye (omuliango kwa 24-25).
Akalimwo mubwimbichiti
Tsinzibulo tsiabakuukanyene Yesu Kristo nende okhwibulwakhwe 1:1–2:23
Obukhalabani bwa Yohana Omubatiisi 3:1-12
Okhubatiisibwa nende okhuteemwa khwa Yesu 3:13–4:11
Obukhalabani bwa Yesu mu Galilaya 4:12–18:35
Oluchendo lwokhurula Galilaya okhuula Yerusalemu 19:1–20:34
Lichuma liokhumalilikha lia Yesu mu Yerusalemu 21:1–27:66
Okhulamukha khwa Yesu okhurula mubafu nende okhulolekhakhwe 28:1-20
Currently Selected:
MATAYO Okhumanyisia akalimwo: OLUPR
Highlight
Share
Copy
Want to have your highlights saved across all your devices? Sign up or sign in