Bar. 15

1Efwe khuli be kamaani mu lisuubila khwolaana khuyeete batekhele khulwe khubukula busiro bwabwe. Khukhesiimisia fwabeene tawe. 2Ne kakhali, fweesi khwolaana khusiimisie bawandaayefwe khulwe bulayi bwabwe, babeene nio khwole khubombakha mu lisuubila. 3#Chiny. 69.9 Sikila Kristo se esiimisia omwene tawe. Ne kakhali nga liiandiko liboolanga lili, “Bukhomo nibwo bakhukhoma ewe bwakwa khwise.” 4Buli sisiindu sisiaandikwa mu maandiko siaandikwa khukhwikisia efwe, nio khwolaane khuba ne lilieyikina khubirira mu lifwiilisia ne khuramo kumwoyo nibio kamaandiko kaananga. 5Ne Wele niye, liliefwiilisia ne khuramo kumwoyo biamangakho, amukhole enywe mube ne buambaani khu mwabeene ne mwabeene khulwe khuloonda likhola lia Kristo Yesu, 6nio enywe mweesi alala mwole khufumia Wele lundi Paapa owo Mwami wefwe Yesu Kristo ne kumumilo mulala.

Elomo Endayi khu Be Chikholo

7Nono, yakaanilana mwabeene ne mwabeene, khulwe luyali lwa Wele, nga Kristo amwakaanile enywe. 8Sikila muboolela ndi bulamu bwe bukholi bwa Kristo bwaba khulwe Bayaudi, khukhwekesia khuli Wele ali omusuubilwa, khukhola lisuubisia liewe khu bakuuka babwe libe ng'ali, 9#2 Sam. 22.50; Chiny. 18.49 ne khukhola akhaba Be Chikholo banyale khufumia Wele khulwe siisa siewe. Nga liiandiko liboolanga lili,

“Nono khakhufumie ewe

mu Be Chikholo.”

Ndimba efuma eye lisina liowo. 10#Likh. 32.43 Lundi liiandiko liboola lili, “Yekhoya, Be Chikholo, ne babaandu ba Wele!”

11 # Chiny. 117.1 Lundi “Fumia Omwami Wele, Be Chikholo boosi,

babaandu mwesi mufumie!”

12 # Isa. 11.10 Ne lundi, Isaya aboola ali,

“Owe lisaaye lia Chesi alicha,

alicha khukhwamiia Be Chikholo, mala balimweyikina.”

13Wele niye lilieyikina liakukhakho oole khumwichusia enywe ne kumwikhoyo kwoosi ne kumuleembe khubirira mu lisuubila lienywe mu niye, nio lilieyikina lienywe lichiililile khuchoa khulwe bunyali bwa Roho Omutakatifu.

Sifuno sia Paulo sie khuandika ne bunyindaafu bukali

14Bawandaayase. Ese samwene ne ulila ng'ali ndi enywe muli ne bulayi bukali, ndi muli ne bukesi bwoosi, mala mwabeene munyala khukhwekisiana. 15Ne mu barwa yino nabeele ne bunyindaafu khulwe kamakhuwa nabulebe niko mukhebusie enywe. Nabeele omunyindaafu sikila bubweyaangu nibwo Wele ambelesie 16khulwe khuba omukholi owa Yesu Kristo khukholela Be Chikholo. Khola nga omusaayi mu khwilwacha Elomo Endayi khukhwama khu Wele, nio Be Chikholo boole khuba siianwa sifukiililwa khu Wele, sisiianwa khu niye ne Roho Omutakatifu. 17Nono, mu buambaani ne Yesu Kristo, nyala nesuunia khulwe bukholi bwase khulwa Wele. 18Ndaba Omunyindaafu mala ndomalome khu niko Kristo akholile kong'ene khubirira mwise khukhola Be Chikholo barie Wele. Akholile kano khubirira mu makhuwa ne bikholwa, 19khulwe bunyali bwe kamaya nende ke khuukia, ne khulwe bunyali bwa Roho owa Wele. Nono, khu lukeendo lwoosi khukhwama Yerusalemu khukhwola Iluriko, nelwachile elala Elomo Endayi khu Kristo. 20Silukuluku siase buli lwoosi sibechanga khukhwilwacha Elomo Endayi abuundu niio bakhaulilakho Kristo tawe, nio khakholandio nombakha khu musiingi nikwo omundu okundi ombakha tawe. 21#Isa. 52.15 Nga liiandiko ne liboolanga lili,

“Abo nibo bakhaboolela kakewe

tawe, balibona, ne abo bakhaulila tawe balimanyilisia.”

Khukhwirekekha khwa Paulo khucha e Burumi

22 # Bar. 1.13 Khwako nakhiingililwa biise bikali khumukeniia enywe. 23Ne luno nga ne malile kimilimo kiase mungoongo chino lundi nga nama khwenyanga khulwe kimiiko kimikali niche mubone enywe, 24neyikina khukhola ndio luno. Nenya khumubona enywe nendi khu lukeendo lwe khucha Sipeini, mala nenya munjeete nje eyo, enyuma we khukhwekhoyela khumubona enywe khulwe siise. 25#1 Bakor. 16.1-4 Ne luno luri, ndikho nja Yerusalemu mu bukholi bwe babaandu ba Wele ebweeneyo. 26Sikila mu bulekhuule chikanisa mu Masedonia ne Akaya chabisia khuaana siianwa khuyeeta bataambi mu baandu ba Wele mu Yerusalemu. 27#1 Bakor. 9.11 Libisia elio liaba liliabwe babeene, ne, khulwa ng'ali, bakhoyela babayeeta nibo. Sikila Bayaudi basaanga mu khabi chabwe cha Roho nende Be Chikholo. Be Chikholo bolaana khurumikhira chikhabi che kimiaandu khuyeeta Bayaudi. 28Nga ne khamale kimilimo kino mala mbaelesie chirupia choosi chiaanibwe khu nibo, kharakikhe lukeendo lwe khucha Sipeini ne khamukeniye enywe nendi khu lukeendo lwenolu. 29Nga nekheche khwinywe, manyile ndi kheche ne sikelo sisichufu sie chikhabi cha Kristo.

30Bawandaayase ese muchuuba enywe, khulwo Mwami wefwe Yesu Kristo ne khulwe busiime nibwo Roho aananga. Ambaana ne nase khusabe ne kumwoyo kwoosi khu Wele, sikila ese. 31Saba muli ndindwe bulayi khukhwama khu bakhasuubila tawe, bali mu Buyuda mala bukholi bwase mu Yerusalemu bwoole khufukiililwa ne babaandu ba Wele ebweeneyo. 32Ne kheche khwinywe mu bwichufu bwe kumwikhoyo, liaba ne lili lilienya lia Wele, mala nekhoye khuolela mu bukeni ewenywe. 33Wele, niye kumuleembe kwefwe kwamakho, ole khuba alala ne nanywe mwesi. Amina.

Paulo akheesia bakali mu Rumi

Currently Selected:

Bar. 15: LUBUKUSU

Highlight

Copy

Compare