Mat. 1
1
Sikuuka sia Yesu Kristo
(Lk. 3.23-38)
1Kano niko kamasina ke bakuuka ba Yesu Kristo, omwana owa Daudi, owe lisaaye lia Aburahamu.
2Aburahamu aaba raraawe owa Isaaka ne Isaaka aaba raraawe owa Yakobo ne Yakobo aaba raraawe owa Yuda ne bawandaaye, 3ne Yuda aaba raraawe owa Peresi ne Sera, mawaabwe aba Tamari, ne Peresi aaba raraawe owa Hesironi, Hesironi aaba raraawe owa Ramu, 4Ramu aaba raraawe owa Aminatabu, ne Aminatabu aaba raraawe owa Nashoni, ne Nashoni aaba raraawe owa Salimoni, 5ne Salimoni aaba raraawe owa Boasi, maawe aba Rahabu, ne Boasi aaba raraawe owa Obedi, maawe aba Ruthi, ne Obedi aaba raraawe owa Chesi, 6Chesi aaba raraawe owo mwami Daudi.
Ne Daudi aaba raraawe owa Solomoni, maawe aba mukha Uria, 7Solomoni aaba raraawe owa Rehoboamu, Rehoboamu aaba raraawe owa Abicha ne Abicha aaba raraawe owa Asa, 8ne Asa aaba raraawe owa Yehoshafati, Yehoshafati aaba raraawe owa Yoramu, ne Yoramu aaba raraawe owa Usia, 9Usia aaba raraawe owa Yosamu, ne Yosamu aaba raraawe owa Ahasi, Ahasi aaba raraawe owa Hesekia, 10ne Hesekia aaba raraawe owa Manase, ne Manase aaba raraawe owa Amoni, ne Amoni aaba raraawe owa Yosia, 11#2 Bab. 24.14-15; 2 Ke Ch. 36.10; Yer. 27.20 Yosia aaba raraawe owa Yekoniya ne bawandaaye, mu ndaalo nicho baambilwamo ne bayilwa Babiloni. 12Enyuma we khuyilwa mu mbaambe e Babiloni, Yekoniya aaba raraawe owa Shealitieli, ne Shealitieli aaba raraawe owa Serubabeli. 13Serubabeli aaba raraawe owa Abiuti, ne Abiuti aaba raraawe owa Eliakimu, 14Eliakimu aaba raraawe owa Asori ne Asori aaba raraawe owa Satoki, ne Satoki aba raraawe owa Akimu ne Akimu aaba raraawe owa Eliuti, 15ne Eliuti aaba raraawe owa Eliesa, ne Eliesa aaba raraawe owa Matani, ne Matani aaba raraawe owa Yakobo, 16ne Yakobo aaba raraawe owa Yosefu, omuseecha owa Maria, owasaala Yesu, olaangwa Kristo.
17Khwako chiselukho khukhwama khu Aburahamu khukhwola khu Daudi chaba ekhumi na chine, ne khukhwama khu Daudi khukhwola khu mbaambe eye khuyilwa Babiloni, chiselukho ekhumi na chine, ne khukhwama khu mbaambe eye khuyilwa Babiloni khukhwola khu lisaalwa lia Kristo chili chiselukho ekhumi na chine.
Lisaalwa lia Yesu Kristo
(Lk. 2.1-7)
18 #
Lk. 1.27
Lisaalwa lia Yesu Kristo liaba liri: Maawe Maria, aaba aselelwa ne Yosefu. Ne basiili khuba alala tawe, Maria anyoolekha khuba ne nda khubirira khu Roho Omutakatifu. 19Yosefu omuseecha wewe, sikila aba omuluungi lundi se enya khuchangalaasia Maria tawe, ebaasia khumulekha niye mu bwikisi. 20Ne, nga aba nasibaasia ario, malaika amubonekhela mu marooro naloma ali, “Yosefu mwana owa Daudi, okharia khubukula Maria abe omukhasi wowo tawe, sikila nisio aesiisie sili sia Roho Omutakatifu. 21#Lk. 1.31 Alisaala Omwana omusoleeli, mala omutiuukhe oli Yesu, sikila alionia babaandu bewe khukhwama mu bwoni bwabwe.”
22Kano koosi kakholekha khukhwichusia niko Omwami aloma khubirira mu mung'oosi ali,
23 #
Isa. 7.14
“Lola omukhaana owe yabwana alaesia
mala asaale omwana owe siseecha, ne balimutiuukha bali, Emanueli.” (Liboola lili, “Wele ali nafwe.”)
24Nio nga Yosefu aasiisimukha, aakhola nga malaika wo Mwami aamulaka, aareera Maria engo abe omukhasi wewe. 25#Lk. 2.21 Ne se baba alala tawe, khukhwola nga ne asaala omwana, mala Yosefu aamutiuukha ali Yesu.
Currently Selected:
Mat. 1: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019