Lir. 4
4
Kaini ne Apili
1Adamu aaba no mukhasi wewe Hawa, Hawa aesia mala asaala, mala aloma ali, “Nasaalile omwana omusoleeli khulwe buyeeti bwa Wele Omunyali Owa Bioosi.” Amutiuukha ali Kaini.#4.1 Kaini: lisina lino liiuliilikha nga lisina lie Lueburania liboola lili “khunyoola.” 2Enyuma wako lundi, Hawa asaala Apili wandaaye owa Kaini. Apili aaba omwaayi owe kamakheese, ne Kaini aaba omulimi. 3Enyuma we biise, Kaini areera siaanwa sie likesa lie bibiaamo khu Wele Omunyali Owa Bioosi. 4#Baeb. 11.4 Apili areera limeeme libele lie likheese lilala lie kumunyele kwewe, eera mala aana khu Wele bitonyi binefu. Wele Omunyali Owa Bioosi asiimisibwa ne Apili lundi asiimisibwa ne siaanwa siewe, 5ne kakhali Wele Omunyali Owa Bioosi se aasiimisibwa ne Kaini ne siaanwa siewe tawe. Nio Kaini akhalala lukali, anyiisia mumoni. 6Wele Omunyali Owa Bioosi areeba Kaini ali, “Siina sikila ne okhalaale, lundi siina sikila ne onyisiisie? 7Waaba ne okhola bulayi, se olafukiililwa ta ku? Ne waaba ne okhakhola bulayi tawe bubwoni bwakhwibuliile amuliango bwikoomba bukhukuure, ne kakhali wenyekhana obuule.” 8#Mat. 23.35; Lk. 11.51; 1 Yn. 3.12 Kaini Aboolela Apili wandaaye ali, “Khuche khukeende mu mukuunda.”#4.8 khuche khukeende mu mukuunda: Lueburania seluli ne kamakhuwa kano tawe. Oli bali mu mukuunda Kaini ebwaakala Apili, wandaaye, mala amwiira.
9Wele Omunyali Owa Bioosi areeba Kaini ali, “Apili wandaayo ali wae?” Kaini akobosia ali, “Ese, semanya tawe. Ese niye omuliindi wewe?”
10 #
Baeb. 12.24
Mala Wele Omunyali Owa Bioosi amureeba ali, “Okholile siina sino? Kamafuki ka wandaayo kalikho kandilila khukhwama mwiloba. 11Ne ewe luno walaamilwe khukhilakho liloba liliakaaniile kamafuki ko mwana wenywe niko ewe ochukhile. 12Ne olima kamaloba, se kacha khwaama khuloondekhana ne kamaani kaako tawe, olaba omula lundi omuuyauuyi khu liloba.”
13Kaini aboolela Wele Omunyali Owa Bioosi ali, “Siiukuumo siase sili sikali lukali khwise khusinyala. 14Wamboonile ndure mu maloba lundi ndure mu mumoni mwowo, ne ndaba omula, omuuyauuyi khu liloba mala omundu yesi yesi ounyoola alinjira.”
15Nio Wele Omunyali Owa Bioosi amuboolela ali, “Se kali kario tawe. Omundu yesi yesi ne eera Kaini aliyachwa khukhwola saba.” Wele Omunyali Owa Bioosi ara simanyisio khu Kaini khukaania omundu yesi yesi omwakaanana akhakhola ario amwiira tawe. 16Mala Kaini arura ebweeni wa Wele Omunyali Owa Bioosi acha amenya mu sibala silaangwa bali Noti, e bukwe wa Edeni.
Lisaaye lia Kaini
17Kaini akona no mukhasi wewe aesia mala asaala Enoka. Kaini ombakha lukoba mala alutiuukha ali Enoka, lisina lio mwana wewe. 18Enoka asaala Irati, Irati aaba raraawe owa Meuyaeli, ne Meuyaeli aaba raraawe owa Metusiaeli, ne Metusiaeli aaba raraawe owa Lameki. 19Mala Lameki aareera bakhasi babili. Lisina lio omukhulu bali Ada ne omuro bali Silai. 20Ada asaala Yabali, oyo niye owaba raraawe owe babayi be chikhaafu babamenyanga mu maeema. 21Lisina lia wandaaye liaba bali Yubali. Lisaaye lia Yubali baaba babaandu babapaanga kamatuungu ne kimilele. 22Silai asaala Tubali-kaini owabasa #4.22 owabasa: likaluukhasia lilala lie khaale liboola lili kuuka owe baabasi be bibiindu bie bibia. bibiindu bie kimikasa nende bie bichuuma. Omukooko owa Tubali-kaini aaba bali Nahama.
23Lameki aboolela bakhasi bewe ali,
“Ada ne Silai ndekeeresie,
enywe bakhasi base,
ulila lilomaloma liase.
Nerire omundu sikila ambunile,
Nerire omuele sikila ambumiisie ese.
24Kaaba bali khukhwira Kaini khwenya liliyacha saba,
ese aba ndenyekha liliyacha sabini na saba,
kaaba bali omundu yesi yesi anjira.”
Seti ne Enosi
25Adamu akona no mukhasi wewe lundi, aesia mala asaala omwana owe sisoleeli amutiuukha ali Seti#4.25 Seti: lifwaanana ne lisina lie Lueburania liliekesia lili, “Aanile.”, sikila Hawa aloma ali, “Wele ambeele omwana okundi mu bweyaangu bwa Apili, niye Kaini eera.” 26Seti naye asaala omwana amutiuukha ali Enosi. Mu siise esio babaandu barakikha khukhwisaaya Wele Omunyali Owa Bioosi.
Currently Selected:
Lir. 4: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019