Omwil. 11

Nisio omundu omukesi akholanga

1Mwata siakhulia siowo khu mechi,

sikila olinyoola bukhala

enyuma we chindaalo chingali.

2Kabila bitonyi babaandu saba, namwe akhaba munaane,

sikila se omanya butinyu siina bunyala bwakwao khu sibala tawe.

3Efula yaba ne eyita,

ekwa namatoa khu sibala,

ne kumurongooro kwaaba ne kukwa lubeka lwe siafubo namwe lwe ebunaswa,

abuundu niio kumurongooro kukwa, abwenao niio kwakama.

4Oyo olindiilila embeo se amiicha tawe,

ne oyo olindiilila kamafuumbi se alikesa tawe.

5Nga nilwo ewe ne okhamanya roho nga ne engilanga mu bikuumba bio mwana munda mwa maawe tawe, nono se onyala wamanya bikholwa bia Wele okholanga buli siindu tawe. 6Miicha bumiicho kumutikhinyi akhaba ne ekolooba. Sikila se omanya bulala siina bulakhula tawe, buno namwe obwo, namwe wakana bwombi alala bucha khuba bulayi.

7Buwaanga buli bulayi, ne lisangaasia khubona buwaanga bwe nyanga. 8Sikila omundu aaba ne amenya kimiiko kimikali lekha akiekhoyele kioosi. Ne kakhali akhoya akhebulile ali chindaalo che sisiilima, chiliba chingali. Koosi kakeecha bukhala mbamo.

Likaambila khu baandu baele

9Yikhoyela buele bwowo ee, musoleeli, ne lekha kumwoyo kwowo kwikhoyele chindaalo che buele bwowo. Khola niko kumwoyo kwowo kwenya ne kwikoomba. Ne kakhali khebulila oli Wele acha khukhukhalakila khulwa buli nisio okhola.

10Rusia liaayaaya mu mwoyo kwowo, yeliinda, okhanyoola buchuuni mu mubili kwowo tawe sikila buele ne sisiakamo sie limenya bili bia busa.

Currently Selected:

Omwil. 11: LUBUKUSU

Highlight

Copy