Bikh. 28

Kakekholekha khu Paulo nali e Malita

1Nga ne khwola khu sikiingi bulayi, khwamanya khuli sibala esio silaangwa bali Malita. 2Basaalwa be sibala esio baba balayi lukali khwifwe. Efula yaba yarakiikhe khukwa, ne bunyifu bwaba bukali, nio babwana kumulilo mala bakhulaanga khwore. 3Paulo abuusia chiikhu ara khu mulilo mala bukhafu bwe kumulilo bwarusia nafwo mu lukhu, mala yeboelela khu mukhono kwewe. 4Basaalwa be mu sibala omwo nga babona endemu ne lelechela khu mukhono kwa Paulo, baboolana bali, “Omundu yuno khukhwola abe omwiiri, ne Bung'ali se bulamulekha amenye tawe akhaba ne aonile khufwila mu nyanja.” 5Ne kakhali Paulo asisakulila endemu chana mumulilo mala khu nyoolakho butinyu bwosi bwosi tawe. 6Balindiilila bamubone na abiimba namwe akwe aasi khangu afwe. Oli baliindilila siise sileeyi khubona sisikholekha khu niye tawe, bakaluukhasia kamebaasio kabwe baloma bali, “Ali wele niye!”

7Simbi busa khukhwama abuundu ao, kiabao kimikuunda kio mwami Pabuliasi, omwami owe sibala esio. Omwami yuno akhwakaanila bulayi, mala khwaba bakeni bewe khu ndaalo chitaru. 8Raraawe owa Pabuliasi aba mu sitanda, alwala kumureengo ne lukhenene. Paulo acha engila niio aba, amusabila ne khumurakho kamakhono, mala amuonia. 9Nga kano ne kekholekha kario, balwale boosi khu sibala esio becha mala baonisibwa. 10Bakhuelesia biianwa bikali, ne nga khwaba ne khururayo, bara mu meeli nibio khwenya khu lukeendo.

Khukhwama e Melita khucha e Rumi

11Enyuma we kimieesi kitaru, khwarakikha lundi lukeendo ne meeli eyama e Alekisanduria mu Misiri, eyaba ne yimiile mu Melita mundaalo che kumunaane sikila chaba chindaalo che mbeo engali. Emeeli eyo yaba yaandikwakho bali, “Wele Bakhwana,” 12Khwola mu lukoba lwa Sirakusi mala khwabamo chindaalo chitaru. 13Khukhwama abwenao khwachiililila khwola mu lukoba lwa Rekiomu. Endaalo eyaloondakho ekhuungu yarakikha khuucha khukhwama siafubo, ne khu ndaalo ekhola khabili khwola mu lukoba lwa Puteoli. 14Khwanyoolamo basuubili mu Yesu, bakhusaaya khumenye nabo lichuuma lilala, Mala enyuma we lichuuma khwarekukha khucha Rumi. 15Basuubili balala ba baaba mu Rumi baulila kamakhuwa kefwe mala becha bakhwakaanila khu soko eya Apiusi nende anju che bakeni chitaru. Nga Paulo ababona afumia Wele mala atinya kumwoyo lukali.

Paulo mu Rumi

16Nga ne khwola Rumi, Paulo afukiililwa khumenya yeng'ene ne omunamae omuliinda.

17Enyuma we chindaalo chitaru Paulo alaanga babemeelesi be Bayaudi mu siikhasio. Nga baba ne bebuusiisie, ababoolela ali, “Baisiraeli basiaase, ese akhaba ne khakhola sisiindu siosi siosi siibi khu baandu befwe namwe kimiima kie bakuuka befwe tawe, bamboa mu Yerusalemu mala naanwa mumakhono ke Barumi. 18Nga Barumi ne banjaala, benya khukhundekhuula sikila se banyoolakho sifuno sikila nirwe tawe. 19#Bikh. 25.11 Ne nga Bayaudi ne baloba kano, liamiina ese esabe khukhweloochela omwami Kaisari, akhaba ne khabakho ne likhuwa liosi liosi likila sitaake babaandu base tawe. 20Niko kakilile nasaba khubonana ne khulomaloma nanywe. Khwako ndi omuboe khu minyololo kino sikila lilieyikina lie babaandu ba Isiraeli.”

21Nio bamuboolela bali, “Khukhanyoolakho ebarwa yosi yosi khukhwama e Buyuda eboola kamakhuwa kowo, namwe yesi yesi khu baandu befwe khukhwama ebweeneyo, akhechakho ne likhuwa liosi liosi liibi khwiwe tawe. 22Ne kakhali khwenya khuulile kamebaasio kowo, sikila khumanyile khuli, buli abuundu osi osi babaandu se balenyanga edini yowo yino tawe.”

23Khwako barekekha siise bakaanane ne Paulo. Endaalo eye khukhwakaanana nga yola, babaandu bakali becha niio Paulo aaba ne amenya. Khukhwama kumutikhinyi khukhwola ekolooba, Paulo abenooselia burume bwe bubwami bwa Wele mu khurumikhira Lilaka lia Musa ne kamaandiko ke bang'oosi, ne akhaka khubayuusia baloonde Yesu. 24Balala khu nibo baafukiilila niko aaloma, ne babaandi khusuubila tawe. 25Nga balekha khufukiilisiana babeene ne babeene, barekukha bacha, nio Paulo aloma ali, “Kali ng'ali lundi kali abwene nga Roho Omutakatifu alomalomela mu mung'oosi Isaya khu bakuuka benywe! 26#Isa. 6.9-10 Sikila aloma ali,

‘Cha, mala oboolele babaandu bano.

Mulirekeeresia lundi murekeeresie,

ne se mulimanyilisia tawe.

Mulilola lundi mulole,

ne se mulibona tawe.

27Sikila kimiooyo kie babaandu bano kimilume,

kamaru kabwe kekala,

lundi bafunikhwa chimoni chabwe.

Bakhola bario, chimoni chabwe chabona,

kamaru kabwe kaulila,

kimiooyo kiabwe kiamanyilisia, mala bangobolele mbaonie.’ ”

28Nio Paulo amaliilisia ali, “Nono, mukhoyeele mumanye muli burume bwe buonia bwa Wele buno, bwarumirwe khu Be Chikholo. Balaburekeeresia!”

[ 29Paulo nga ne amala khuloma kano Bayaudi barekukha ne bayingana burafu babeene ne babeene.]#28.29 Chibibilia chindala se chili ne lunyilili luno tawe.

30Khulwe kimiiko kibili Paulo amenya abuundu niio eruungilanga enju omwene. Ebweeneyo akaanilanga boosi babamukeniianga. 31Elwachanga ke bubwami bwa Wele ne khukhwekisia kamakhuwa ko Mwami Yesu Kristo mu bunyindaafu, ne mu bulekhuule.

Currently Selected:

Bikh. 28: LUBUKUSU

Highlight

Copy

Compare