Bikh. 23

1Paulo aloleelela be kumuse chana mala aloma ali, “Baisiraeli basiaase! Khukhwola endaalo yino, kumwoyo kwase mukari kuli kumukololofu ebweeni wa Wele khuloondekhana ne liimenya liase.” 2Abwene ao Omusaayi Omukhulu Lukali Anania aboolela ba baaba ne bemile embi ne Paulo khumupa e munwa. 3#Mat. 23.27-28 Paulo amuboolela ali, “Ng'ali Wele alakhupa ewe, oli nga lisiisi liliaakhwa luloongo! Wekhaale ao khukhukhalakila khuloondekhana ne Lilaka ne ewe wamwene olikho ofunaka Lilaka chana khulwe khubolela bano bakhupe ese.”

4Babaandu chana ba baaba siimbi khu Paulo bamuboolela bali, “Olikho okhoma Omusaayi Omukhulu Lukali owa Wele!”

5 # Khur. 22.28 Paulo aakobosia ali, “Baisiraeli basiaase, semanyile ndi ali Omusaayi Omukhulu Lukali tawe. Liiandiko liboola lili, ‘Okhaloma kamabi khu mwami owe babaandu bowo tawe.’ ”

6 # Bikh. 26.5; Bafil. 3.5 Nga Paulo abona ali balala mu sipupu omwo baba Basatukayo ne babaandi Bafarisayo, aboolela kumuse ali, “Baisiraeli basiaase! Ese ndi Omufarisayo, omwana owo Mufarisayo. Ndi mu muse kuno sikila lilieyikina nilio ndi nalio ndi bafu balilamukha babe balamu!”

7Nga amala khuloma ario, Bafarisayo ne Basatukayo barakikha khulomana, mala kumuse kwabukhanamo. 8#Mat. 22.23; Mk. 12.18; Lk. 20.27 (Sikila Basatukayo balomanga bali lilamukha se liliio tawe. Lundi balomanga bali mbao malaika namwe siindu bali roho tawe, ne Bafarisayo basuubila mu bioosi bitaru bino.) 9Luyoka Lwabao lukali. Balala khu baandiki ba baaba mu mukaanda kwe Bafarisayo beema bayingania Basatukayo ne baloma bali, “Se khwaboone sisiindu siibi siosi siosi khu mundu yuno tawe! Wakana ng'ali roho namwe malaika aalomaloma naye!”

10Kamayiingamo kareera sisiayuumba sikali siakila naitiriani omukhulu owe kamae aaba ne buuri ali banyala beera Paulo. Nio aboolela banamae bewe khukhwingila mu sipupu siene esio, barusiemo Paulo bamukobosie mu kambi.

11Silo sienesio, Wele aboolela Paulo ali, “Okharia tawe! Waanile buloli bwase mu Yerusalemu muno, ne khukhwola okhole orio mu Rumi mwosi.”

Ekwangwaani eye khukhwira Paulo

12Nga bwasia, Bayaudi balala babusania bakhola ekwangwaani, bechuba bali se balalia namwe banywe sisiindu siosi siosi ne bakherire Paulo tawe. 13Babaandu ba baakhola ekwangwaani yino baaba babira kamakhumi kane. 14Mala bacha khu basaayi bakhulu ne khu bemeelesi baloma bali, “Khwechubile khuli se khulalia sisiindu siosi siosi tawe khukhwola khwire Paulo. 15Khwako enywe ne kumuse khe murume likhuwa khu naitiriani omukhulu owe kamae amurereere Paulo, mufwaane nga mukana khureeberesia khunyoola bung'ali khukhwama khu niye. Ne efwe khulerekekha khumwire khaba ne akhoola ano tawe.”

16Ne omwiwaana owa Paulo omusoleeli aulila ke ekwangwaani eyo mala atimaka mu kambi aboolela Paulo. 17Nio Paulo alaanga mulala khu banamae bakhulu amuboolela ali, “Yila omusoleeli yuno khu naitiriani omukhulu sikila ali ne likhuwa nilio eenya amuboleele.” 18Nio omunamae oyo amubukula, amuyila khu naitiriani, aloma ali, “Omuboe Paulo anangile amboolela khureera omusoleeli yuno khwiwe, ali ne sisiindu nisio enya khukhuboolela.”

19Naitiriani oyo amutiila kumukhono, arekukha naye baba bong'ene mala amureeba ali, “Oli na siina nisio wenyile khu khumboolela?”

20Aloma ali, “Bayaudi bafukiilisiane khu khureeba kumutikhinyi oyile Paulo mu muse, khu khwekhola nga babenya khumanyilisia kamakhuwa kewe lukali. 21Ne okhabarekeeresia tawe. Sikila babaandu baliio angaaki we kamakhumi kane bamwibuulile khungila. Bechubile bali se balalia namwe banywe sisiindu siosi siosi ne bakherire Paulo tawe. Siise sino berekeekhe khukhola bario mala baliindiilile likhalaka liowo.”

22Nio Naitiriani oyo aloma ali, “Okhaboolelakho omundu yesi yesi oli wamboleele kamakhuwa kano tawe.” Abwenao alekhuula omusoleeli chana oyo arekukha.

Paulo ayilwa wo mwami Felikisi

23Nio naitiriani omukhulu owe kamae alaanga babili khu banamae bewe bakhulu aloma ali, “Bukula banamae chimia chibili berekekhe khucha e Kaesarea, alala ne be chifarasi kamakhumi saba, nende be kamafumo chimia chibili, mala mwirekekhe khurekukha luno chisa chitaru che silo. 24Ana chifarasi chindala khu Paulo mumuyile bulayi wo muruki Felikisi.” 25Nio naitiriani oyo aandika ebarwa eboola eli:

26“Ese Kilautio Lisia, khuandikila ewe owe lukoosi, omuruki Felikisi: Nakhukheesiisie! 27Bayaudi baafwakhiile omundu yuno benga khumwiira, nga naboolelwa bali ali omurumi, naacha ne banamae base namureesia. 28Namuyilile mu muse kwabwe mu khwenya khumanya sikila ne benyile khumwiira. 29Nio nanyoola ndi, sesilio nisio akhola sikila bamwire namwe khubowa tawe. Khumusitaka khwabwe khuloondekhana ne kamareeba ke lilaka liabwe. 30Ne nga naboolelwa bali bamukwangwaaniile, ne khangu busa khalaka khumureera khwiwe. Nabooleele bamusitakile, baboole niko bamusitakilekho ebweeni wowo.” 31Khwako banamae abo babukula Paulo nga baba ne balakiilwe bamuyila Andipaturo silo siene esio. 32Nga bwasia banamae be khu bikele bakobola mu kambi ne be chifarasi bacha naye. 33Bola e Kaesarea, mala bakaanisia omuruki Felikisi Paulo alala ne ebarwa eyo. 34Omuruki asoma ebarwa eyo mala areeba Paulo ama mu lukoongo siina, nga ne anyoola ali ama mu Silisia, 35mala aloma ali, “Ndaulila kakowo bakhusitakile ne boolile.” Nio aana kamalaka Paulo aliindwe bulayi mu lichipi lio mwami.

Currently Selected:

Bikh. 23: LUBUKUSU

Highlight

Copy

Compare