Rut 2
2
Boozpa chakrancho Rut palapakushqan
1Belén markachömi karqan juk rïcu runa Booz jutiyuq. Paymi karqan Noemípa runan Elimelecpa aylun. 2Juk junaqchömi Noemíta Rut kayno nirqan: <<Aywashaq cebäda cosechaqkuna shikwapakushqanta palapakamunäpaq.#Lev. 19.9-10; Deut. 24.19. Chakraman chayaptïqa pilapis kuyapämanqami>>.
Tsayno niptinmi suedranqa kayno nirqan: <<Alichari kanman aywaptikiqa, hïja>>.
3Tsawraqa aywaykashqancho cebädata cosecharkaykaqta rikarmi palapakuq yaykurqan. Tsay chakraqa kanaq suedrun Elimelecpa aylun Boozpami. 4Rut palapakuykaptinmi markapita Booz chayaykur lapan minkayninkunata winchikur kayno nirqan: <<Tayta Dios yanapaykuläshunki>>.
Tsawraqa minkayninkunapis kayno nirqan: <<Qamtapis Tayta Dios yanapaykuläshunki>>.
5Tsaypitanami minkayninkunapa capatazninta Booz kayno tapurqan: <<¿Pipa tsurintaq taqay jipash?>>
6Tsayno tapuptinmi kayno nirqan: <<Payqa Moab nacionpita Noemíwan shamuq jipashmi. 7Chaykamurmi ruwakamashqa palapata palapakunanpaq. Tutapita patsa mana jamaypami palapakuykan. Tsayraqmi jamapaykan>>.
8Tsawraqa Rut kaqman aywaykur Booz kayno nirqan: <<Cosëcha ushakänanyaq kaylaman shakamunki ashmaynï jipashkunawan palapakunaykipaq. Ama aywankitsu juk runapa chakranmanqa. 9Cada tuta kutimushpayki achuykashqan qepalanpa palapakunki. Minkaynï runakunatapis maynami nishqä mana michäshunaykipaq. Yakunarqa puyñucho kaykaq yakuta upunki>>.
10Tsayno niptinmi Rutqa urkunpis pampaman töpashqanyaq qonqurpakuykushpan kayno nirqan: <<Yusulpäki tayta, jäpa warmi kaykaptïpis kuyapämashqaykipita>>.
11Tsawraqa Booz kayno nirqan: <<Musyämi runayki wanushqa kaptinpis suedraykiwan ali kawashqaykita. Tsaynöpis musyämi mamaykita, taytaykita y markaykita kacharir kay jäpa markaman shakamushqaykita. 12Tsaynöpis musyämi noqakuna yärakushqä Tayta Diosman yärakuykashqaykita. Lapanchöpis pay yanapaykuläshunki>>.
13Tsayno niptin Rut kayno nirqan: <<Yusulpalä tayta, ashmayniki mana kaykaptïpis kuyapämashqaykipita>>.
14Tsaypita merenday höranami Rutta Booz kayno nirqan: <<Kaylaman shakamuy poqushqa vïnuman ushmatsipaylapa tantata mikunaykipaq>>.
Tsayno niptinmi Rut jamakurqan minkayninkuna jamakushqan kaqman. Tsaychönami paytapis trïgu kamtsata Booz qararqan. Saksashqanyaq Rut mikurpis putsupakurqanraqmi. 15Nirkurnami minkayninkunata Booz kayno nirqan: <<Rut palapakuptin manöjukunapita shuntakuptinpis ama michankitsu. 16Tsaypa trukanqa apripösu shikwatsinki palapakunanpaq. Imano palapakuptinpis payta ama michankitsu>>.
17Tsay junaq patsa tsakashqanyaqmi qoyayta Rut palapakurqan. Tsay palapakushqanta wirurkur wayraptinmi ishkay arröbano karqan. 18Tsayta apakurkur suedran kaqman chayaykurmi palapakushqan cebädata rikatsirqan. Nirkurnami kishäkushqan mikuyta suedranta qararqan. 19Tsaymi kushikushpan Noemí kayno nirqan: <<¿Maychötaq palapakaykamushqanki kayjinanpa, hïja? ¿Pitaq kuyapäshushqanki tsaytsikata tariykamunaykipaq? Tsay kuyapäshuqniki runataqa Tayta Dios yanapaykulätsun>>.
Tsawraqa Rut kayno nirqan: <<Booz jutiyuq runapa chakranchömi palapakamushqä>>.
20Tsayno niptinmi Noemí kayno nirqan: <<¡Boozqa runäpa aylunmi kaykan! ¡Paymi yanapamänantsipaq kaykan!#Lev. 25.25. ¡Tayta Dios payta yanapaykulätsun! ¡Tayta Diosqa runätapis y wawäkunatapis yanapashqannölami kananpis yanapaykämantsi!>>
21Tsawraqa Rut kayno nirqan: <<Tsaynöpis nimashqa cosëcha ushakänanyaq ashmaynin jipashkunawan palapakamunäpaqmi>>.
22Tsaymi Noemí kayno nirqan: <<Tsawraqa paykunalawan palapakamuy, hïja. Chakran chakran puriptikiqa pipis burlakurpis burlakushunkimanchari>>.
23Tsaymi cebädata y trïguta ërayta ushashqanyaq Boozpa chakrankunalacho Rut palapakurqan. Tsay witsanqa suedranwan juntumi taykarqan.
Currently Selected:
Rut 2: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.