Romanos 2

Tayta Dios juzgananpaq nishqan

1Israel runa, qampis jutsayuq kaykar ¿imanirtaq runa mayikita juzgaykanki? Tsayno juzgaptikiqa pï kaptikipis Tayta Dios juzgashushpaykimi castigashunkipaq.#Mat. 7.1; Luc. 6.37.

2Musyantsimi pitapis jutsa ruraq kaqtaqa jutsata rurashqanman tupu Tayta Dios castigananpaq kashqanta. 3Tsayno kaykaptinqa ¿Tayta Diospa castïgunpita qeshpinkitsuraq? 4Tayta Dios jukla mana castigashuptiki ama yarpapäkuytsu mana castigashunaykipaq kashqanta. Payqa kuyapäkuq, pacienciakuq y perdonakuq karmi jutsa ruraykunata kacharinaykita shuyaraykan. 5Tsayno kaptinpis chukru shonqu karmi jutsa ruraykunata mana kacharinkitsu. Tsaymi juzganan junaq Tayta Dios fiyupa rabyar castigashunkipaq.

6Tsay junaqqa imanöpis kawashqanman tupumi lapan runakunata juzganqa.#Prov. 24.12; Jer. 17.10; Eze. 18.30; 33.20; Mat. 16.27. 7Tayta Diospa nawpancho kawayta munar alilata ruraqkunataqa imayyaqpis kawananpaqmi gloriaman pushanqapaq. 8Tayta Diosta mana cäsukur jutsata ruraqkunatami itsanqa rabyashpan mana kuyapaypa castiganqa.

9Fiyupa castigaptinmi lapanpis jutsa ruraqkunaqa nakar lakikärinqa. Puntata Israel runakunami nakapäkunqa y tsaypitanami mana Israel runakuna. 10Alilata ruraqkunami itsanqa Diospa nawpancho ali kawayta chaskipäkunqa. Puntata Israel runakunami chaskipäkunqa y tsaypitanami mana Israel runakuna.

11Runakunata Tayta Dios tsayno juzganqa pipapis favornin mana sharkuylapami.#Deut. 10.17. 12Tsaymi leyninkunata musyaqkunatapis y mana musyaqkunatapis jutsata rurashqanpita Tayta Dios ushakätsinqa. Leyninkunata musyaqkunataqa tsay leykuna nishqanman tupumi juzganqa. 13Manami leyninkunata musyashqalanpitatsu Tayta Dios pitapis salvanqa, sinöqa leyninkunata cäsukushqanpitami.

14Mana Israel runakuna Diospa leyninkunata mana musyarpis alita rurarqa tsay leykunata musyaqnömi kaykan. 15Jutsata rurar lakikuptin y alita rurar kushikuptinmi musyantsi runakunapa shonquncho Diospa leyninkuna qelqaraykashqanta. 16Tsaymi pakaylapa jutsata rurashqanpita juzganan junaq Tayta Dios pïmaytapis juzganqa. Tsayno juzgananpaqmi Jesucristuta Tayta Dios churashqa. Tsayno kananpaq kaqtami ali wilakuyta wilakur pitapis tantiyatsï.

Diospa leyninkunata Israel runakuna mana cäsushqan

17Israel runakuna, tantiyakäriy. Qamkuna yarpanki Diospa leyninkunata yachashqaykipita mana juzgashunaykipaq kashqantami. Tsaynöpis kushikurkaykanki Tayta Dios akrashushqaykipitami. 18Tayta Diospa leyninkunata yacharmi pay munashqanno kawanaykipaqpis musyapäkunki. Tsaymi ali kashqanta y mana ali kashqantapis tantiyapäkunki. 19Qaprano kaqkunata pusharaqno y tsakaychöno kawaqkunata atskipaqno kashqaykitami yarpapäkunki. 20Mana yachaqkunata y wamrakunata ali yachatsiq kashqaykitami yarpapäkunki. Tsayno yarpapäkunki Diospa leyninkunata yachakushqa karmi.

21Wakin runakunata tsayno yachaykätsirqa ¿imanirtaq kikikikuna mana cäsukärinkitsu? Mana suwakunanpaq yachaykätsirqa ¿imanirtaq kikikikuna suwakärinki? 22Majanta mana jarukunanpaq yachaykätsirqa ¿imanirtaq kikikikuna majaykita jarukärinki? Ïdulukunata rikaytapis mana munaykarqa ¿imanirtaq ïdulukunapa adornunkunata suwakurkaykanki? 23Diospa leyninkunata yachashqaykipita alabakuykarqa ¿imanirtaq tsay leykunata mana cumplir Tayta Diosta manakaqman churarkaykanki? 24Tsayno kawaptikichari Tayta Diospa palabrancho kayno qelqaraykan: <<Qamkuna lutanta rurar kawaptikimi mana criyiq runakuna Tayta Diosta manakaqman churapäkun>>.#Isa. 52.5; Eze. 36.22.

Señalakuypita yachatsishqan

25Tayta Diospa leyninkunata cumpliptikiqa señalakushqaykipis alimi kaykan. Leyninkunata mana cumpliptikimi itsanqa señalakushqaykipis manakaqlapaq kaykan. 26Mana señalakushqa runakunapis Diospa leyninkunata cumpliptinqa ¿manatsuraq señalakushqatano Tayta Dios chaskinqa? 27Tsaymi mana señalakushqa karpis Diospa leyninkunata cumpliqkuna juiciu finalcho kayno nipäkushunki: <<Señalakushqa kaykarqa y Diospa leyninkunata shumaq yachaykarqa ¿imanirtaq Tayta Diosta mana cäsukurqaykitsu?>>

28Manami maman o taytan Israel runa kashqalanpitatsu pipis rasunpa Israel runa kaykan. Tsaynöpis manami señalashqa kashqalanpitatsu rasunpa señalashqa kaykan. 29Tsaypa trukanqa rasunpa señalashqa kaykan shonqunta Espíritu Santu señalaptinmi.#2.29 Cuerpunta señalar chiwlakunanpa punta qaranta kutsurir jorqushqannömi shonqunta señalar jutsa rurayta kacharinanpaq tantiyatsin.#Deut. 10.16; 30.6; Jer. 4.4. Paykunataqa runakuna chikiptinpis Tayta Dios kuyanmi.

Currently Selected:

Romanos 2: qvmB

Highlight

Copy

Compare