Números 6
6
Nazareo kar imano kawananpaqpis tantiyatsishqan
1Moiséstami Tayta Dios kayno nirqan: 2<<Israel runakunata kayno niy: <Mayqan runapis o mayqan warmipis nazareo kananpaq Tayta Diosta promitirqa 3manami vïnuta ni ima shinkatsikuqtapis upunqatsu. Tsaynöpis manami upunqatsu üvapita rurashqa vinagrita ni üvapa yakuntapis. Manami üvata ni päsastapis mikunqatsu.#Luc. 1.15. 4Nazareo kananpaq promitishqanta cumplishqanyaq manami imatapis üvapita rurashqataqa mikunqatsu ni upunqatsu. 5Nazareo karqa Tayta Diospaq santumi kanqa. Tsaymi nazareo kananpaq promitishqanta cumplishqanyaq aqtsanta mana rutukunqatsu. 6Nazareo kaykarqa pï wanuptinpis ayaman ama witipätsuntsu. 7Maman wanuptinpis, papänin wanuptinpis, wawqin wanuptinpis ni panin wanuptinpis impüru mana kananpaq ama witipätsuntsu. Tsayno ama witipätsuntsu Tayta Diospaq consagrädu kashqanta cumplir. 8Nazareo kananpaq Tayta Diosta promitishqanta cumplishqanyaqmi olqu karpis o warmi karpis consagrädu kanqa.
9<< <Nawpancho pipis elaqpita wanuptin imaptinqa Tayta Diospaq consagrashqan aqtsan impürumi rikakunqa. Tsaymi qanchis junaq pasarkuptin aqtsanta rutukunqa purificakunanpaq. 10Pusaq junaq kaqchönami ishkay kulkushta karpis ishkay pushapa palumata karpis Tinkuna Toldu patiuman apaykur cürata entreganqa. 11Cüranami rupatsinqa jukta purificatsina sacrificiupaq y jukaqtana rupatsina sacrificiupaq. Tsaynöpami tsay nazareo runa o nazareo warmi püruna rikakunqa. Aqtsanpis Tayta Diospaq yapaymi consagrädu kanqa. 12Tsaynöpis watayuq carnishta consagratsina sacrificiupaq apamur yapay nazareo runa o nazareo warmi kanqa. Itsanqa impüruyashqanpitami nawpata nazareo kashqan tiempupis manakaqlapaqna kanqa. Tsaymi nazareo kayta yapay qalaykur cumplinqa promitishqan tiempu cumplinanyaq.
13<< <Nazareo kananpaq tiempun cumplirkuptin Tinkuna Toldu patiuman shamunqa. 14Tsayman shamurmi juk watayuq carnishta rupatsina sacrificiupaq apamunqa, juk watayuq china uyshata purificatsina sacrificiupaq apamunqa y juk carnita jawka kawakuy sacrificiupaq apamunqa. Tsay uywakunaqa lapanpis sänumi kanqa. 15Tsaynöpis alinnin harinapita levadüraynaq tantata canastawan apamunqa. Tsay tantaqa aceitiwan masarashqami kanqa. Tsay canastamanmi winanqa aceitiwan lushipashqa levadüraynaq lapsha tantata, tsaki mikuy ofrendakunata y vïnutapis.
16<< <Tsaykunata chaskirkurmi purificatsina sacrificiuta Tayta Diospa nawpancho cüra rupatsinqa. Tsaypitanami rupatsina sacrificiutapis rupatsinqa. 17Nirkurnami jawka kawakuy sacrificiupaq chaskishqan carnita y canastacho levadüraynaq tantakunata Tayta Diospaq joqarkur wakman kayman kuyutsinqa. Tsaynöpis apamushqan tsaki mikuyta y vïnuta altarman winapanqa. 18Tsay hörami nazareo runa aqtsanta Tinkuna Toldu patiucho rutukunqa. Tsay consagrädu aqtsatanami jawka kawakuy sacrificiu rupaykashqan ninaman qaykunqa.
19<< <Nirkurnami rutukushqa nazareo runata cüra makyanqa calduypa yanushqa carnipa palitillanta. Tsaynöpis canastapita makyanqa levadüraynaq juk tantata y levadüraynaq lapsha tantatapis. 20Tsaykunata nazareo runapita yapay shuntarkurna Tayta Diospa nawpancho joqarkur wakman kayman kuyutsinqa. Tsaymi sagrädu kar cürapaq kanqa. Tsaynöpis cürapaq kanqa Tayta Diospa nawpancho wakman kayman kuyutsishqan pëchun y alawqa kaq chankan. Tsaypitanami itsanqa nazareo runa vïnuta upunqa.
21<< <Nazareo runa aypäpakurqa ofrendatapis uywatapis masta apamunqa. Nazareo kananpaq Tayta Diosta promitirqa ley nishqannöla lapantapis cumplinqa> >>.#Hech. 21.23-24.
Cürakuna bendicionta qoshpan imata ninanpaq kashqanpis
22Moisésta Tayta Dios kayno nirqan: 23<<Aarónta y tsurinkunata yätsinki Israel runakunata bendicionta qor kayno ninanpaq:
24<< <Tayta Dios bendicionninta qoshushpayki ima peligrupitapis tsapaykuläshunki.
25 Tayta Dios ali rikashushpayki imaypis kuyapaykuläshunki.
26 Tayta Dios imachöpis kuyapäshushpayki ali kawanaykipaq yanapaykuläshunki>.
27<<Tsaynöpami Israel runakunata yanapanäpaq cürakuna jutïcho manakamanqa. Tsayno manakamaptinmi bendicionnïta qoshaq>>.
Currently Selected:
Números 6: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
