Números 5
5
Impüru runakunata qarqunanpaq tantiyatsishqan
1Moisésta Tayta Dios kayno nirqan: 2<<Israel runakunata niy leprawan qeshyaqkunata, purgacionwan qeshyaqkunata y ayata yataqkunatapis campamentupita qarqunanpaq. 3Campamentu impüru mana rikakunanpaq warmi kaptinpis olqu kaptinpis qarqupäkunki. Campamentuchöqa qamkunawanmi noqa taykä>>.
4Moisésta Tayta Dios nishqannölami tsayno kaqkunata Israel runakuna campamentupita qarqapäkurqan.
Runa mayinta perjuiciuta rurashqanpita pägapakunanpaq tantiyatsishqan
5Moisésta Tayta Dios kayno nirqan: 6<<Israel runakunata kayno niy: <Warmipis olqupis Tayta Diosta mana cäsukur runa mayinta perjuiciuta rurarqa jutsatami ruraykan. 7Tsawraqa jutsa rurashqanta reconöcir runa mayinta perjuiciuta rurashqanpita päganqa. Tsay jananmanpis quinta parti masta päganqa. 8Perjuiciädu runa wanushqana kaptin y aylunkuna mana kaptinqa pägananpaq kaqta cürata entreganqa. Tsay entregashqanqa Tayta Diospaq kaptinmi cürapaqna kanqa. Tsaynöpis entreganqa juk carnita altarcho rupatsiptin perdonashqa kananpaq.#Lev. 6.1-7.
9<< <Sagrädu ofrendakunata Israel runakuna Tayta Diospaq apashqankuna cürapaqmi kanqa. 10Lapan chaskishqankuna kikin cürapaqmi kanqa> >>.
Celösu runa imata rurananpaqpis tantiyatsishqan
11Moisésta Tayta Dios kayno nirqan: 12<<Israel runakunata kayno niy: <Aybësis cäsu kanmanmi pï warmipis runanta jarukushqan. 13Runanta tsayno jarukushqanta pipis mana tariykaptin 14runan celösu rikakurqa 15warminta cüraman pushanqa. Tsaynöpis tsaki mikuy ofrendapaq apanqa ishkay kïlu cebäda harinata. Tsay ofrendamanqa ama winanqatsu aceitita ni inciensuta. Tsay ofrendaqa kanqa warmin jarukuykashqanta o mana jarukuykashqantapis musyananpaqmi.
16<< <Cüranami tsay warmita Tayta Diospa nawpanman#5.16 Tayta Diospa nawpanman nirqa Tinkuna Tolducho kaykaq altarpa nawpanmanmi niykan. pushanqa. 17Tsaypitanami sagrädu yakuta mitu väsuman winakur tsay yakuman Sagrädu Tolducho kaykaq alpata shuntarkur winanqa. 18Tsay warmita Tayta Diospa nawpanman pushaykur piltaraykaq aqtsanta paskatsinqa. Tsaychömi celösu kashqanpita runan apamushqan ofrendata cüra aptapanqa. Nirkurmi väsuwan asqaq yakuta aptaranqa tsay warmi jutsayuq kar maldicionashqa kananpaq. 19Nirkurna tsay warmita juratsir kayno ninqa: <<Pï runawanpis runaykita mana jarukushqa kaptikiqa kay asqaq yakuta upuptiki manami maldición pasashunkipaqtsu. 20Runaykita jarukushqa kaptikiqa 21lapan runakuna rikakunanpaqmi Tayta Dios maldicionashunkipaq. Tsaymi mädrinniki jakaptin shuluyla shulunkipaq. 22Tsay maldición pasashunki kay asqaq yakuta upuptikimi>>.
<< <Cüra tsayno niptinmi tsay warmi ishkay kuti kayno ninqa: <<Nishqaykino katsun>>.
23<< <Tsaypitanami maldición pasananpaq nishqanta cüra qelqanqa. Nirkurmi qelqashqanta maylarkur tsay yakuta winanqa väsucho kaykaq asqaq yakuman. 24Tsay asqaq yakutanami warmita cüra makyanqa. Jutsayuq karqa tsay yakuta upurkur pasaypami nakanqa. 25Yakuta chaskirkurmi runan celösu kashqanpita apamushqan tsaki mikuy ofrendata cürata entreganqa. Tsaytami Tayta Diospa nawpancho cüraqa joqarkur wakman kayman kuyurkatsir altarman churanqa. 26Tayta Dios imaypis yarparänanpaqmi tsay ofrendapita juk aptayta jorqurkur altarcho rupatsinqa. Nirkurnami asqaq yakuta warmita uputsinqa. 27Runanta jarukushqa karqa tsay yakuta upurkur pasaypami nakanqa. Tsaymi mädrin jakaptin shuluyla shulunqapaq. Tsayno nakanqa lapan runakuna rikakunanpaqmi. 28Runanta mana jarukushqa kaptinmi itsanqa imapis mana pasanqatsu y chichu rikakurpis shulunqatsu.
29<< <Tsayno rurapäkunki warmin jarukushqanta runa maliciaptin 30jutsayuq kashqanta o jutsaynaq kashqantapis musyananpaq. Tsay warmitami Tayta Diospa nawpanman cüra pushanqa Tayta Dios nishqankunata lapanta rurananpaq. 31Tsayno ruraptinqa runan manami jutsayuqtsu kanqa. Warminmi itsanqa kikinpa jutsanpita penqaypaq shuluyla shulunqa> >>.
Currently Selected:
Números 5: qvmB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
