Números 18

Cürakunata levitakuna yanapananpaq kashqan

1Tsaypitanami Aarónta Tayta Dios kayno nirqan: <<Qampis, tsurikikunapis y Leví trïbu mayikikunapis Sagrädu Tolducho imatapis lutanta rurarqa jutsayuqmi rikakärinkipaq. Cüra rurananpaq kaqkunata imatapis lutanta rurarmi itsanqa qam y tsurikikunala jutsayuq rikakärinkipaq.

2<<Leví trïbu mayikikunata wilanki qamta y tsurikikunata yanapashunaykipaq. Paykunami Pactu Tolducho sirviptiki ima ruraykunatapis yanapashunkipaq. 3Nishqaykita cumplirmi tsay tolduta täpanqa. Itsanqa sagrädu manëjukunaman ama witipäkunqatsu ni patiucho kaykaq altarpa nawpanmanpis ama yaykapäkunqatsu. Yaykurqa o witiparqa paykunapis qamkunapis wanunkipaqmi. 4Levitakunalami Tinkuna Tolducho ima ruraykunatapis ruräshishunki. Qamkuna rurashqaykiman jäpa runakunaqa ama jatikämunqatsu.

5<<Qamkunalami altarcho y tolducho ruraypaq kaqkunata rurapäkunki. Kay nishqäkunata cäsukuptikiqa Israel runakunata manami castigashaqnatsu. 6Israel runakunapita Leví trïbu mayikikunata noqami akrashqä Tinkuna Tolducho ima ruraykunatapis ruräshishunaykipaq. 7Qamta y tsurikikunata sirvimaq cüra kanaykipaq churashqa kaptïmi qamkunala altarcho y Lugar Santïsimucho ruraypaq kaqkunata rurapäkunki. Jäpa runa kaykar pipis tsayman yaykuq kaqmi itsanqa wanunqa>>.

Cürakunapa derëchun ima kashqanpis

8Tsaypitanami Aarónta Tayta Dios kayno nirqan: <<Israel runakuna noqapaq apapäkamushqanta qammi cuidanki. Tsay apamushqan sagrädu kaqkunata qamta y tsurikikunatami qoykushqä. Kay nishqäkunaqa imayyaqpis leymi qamkunapaq kanqa. 9Israel runakuna sacrificiupaq apamur altarcho mana rupatsishqankunaqa qamkunapaqmi kanqa. Tsaykunami kaykan tsaki mikuy ofrenda, purificatsina sacrificiu y consagratsina sacrificiu. Lapanpis tsay sagrädu kaqkuna qampaq y tsurikikunapaqmi kanqa. 10Olqu kaqkunalami tsay sagrädu kaqkunata sagrädu particho mikupäkunki.

11<<Tsaynöpis nawpächo joqarkur wakman kayman kuyutsishqayki ofrendakuna qampaq, olqu tsurikikunapaq y warmi tsurikikunapaqmi kanqa. Tsay ofrendakunataqa püru kaqkunalami mikupäkunqa. Kay nishqäkunaqa imayyaqpis leymi kanqa qamkunapaq y qamkunapita miraqkunapaq.

12<<Tsaynöpis punta poquqta cosechashqanpita alinnin kaq aceitita, vïnuta y trïguta noqapaq primiciata apamushqankuna qampaqmi kanqa. 13Lapan punta poquqkunata noqapaq apamushqankunapis qampaqmi kanqa. Itsanqa tsaykunata mikunqa püru kaq ayluykikunalami. 14Israel runakuna imatapis noqapaq apamushqanqa#Lev. 27.28. lapanpis qampaqmi kanqa.

15<<Israel runakunapa qechpa olqu wamrankuna y manta uywakunapa punta yuriq orqu wawankunapis noqapaq apamushqanqa qampaqmi kanqa. Tsayno kaptinpis qechpa wamranta y impüru uywakunapa punta yuriq wawanta entregashunaykipa trukanqa qellaytami apapäkamunqa. 16Yurishqanpita juk killayuq kaykaptinmi apapäkamunqa pitsqa siclo qellayta. Tsay qellaytaqa pësanqa Tinkunantsi Sagrädu Tolducho kaykaq pësakunawanmi. Tsay pësawan pësaptinqa kanqa juk siclo chunka juk grämu qellaymi.

17<<Wäkapa, uyshapa y cabrapa punta yuriq wawanpa chaninta apamunanpa trukanqa kikin uywata apamunqa. Tsaykuna noqapaq kaptin pishtarkur altar jananman yawarninta jichanki. Wirantapis altar janancho rupatsinki. Tsay rupatsishqaykipa ali asyayninta#18.17 Wakin runakunaqa mushkuyninta nipäkun. mayarmi noqa Tayta Dios kushikushaqpaq. 18Tsay uywakunapa aytsanpis qampaqmi kanqa. Nawpächo joqarkur wakman kayman kuyutsishqayki uywapa alawqa kaq chankan y pëchunpis qampaqmi kanqa. 19Israel runakuna noqapaq lapan apamushqanpis qampaq, olqu tsurikikunapaq y warmi tsurikikunapaqmi kanqa. Kay nishqäkunaqa imayyaqpis leymi kanqa qampaq y qampita miraqkunapaqpis. Qampaq y qampita miraqkunapaqmi imayyaqpis tsayno kananpaq promitiykä>>.

Levitakunapa derëchun ima kashqanpis

20Tsaypitanami Aarónta Tayta Dios kayno nirqan: <<Israel runakuna aywaykashqan nacionman chayaykur chakrata chaskiptin qampis y tsurikikunapis manami chaskipäkunkipaqtsu. Chakrata chaskipäkunaykipa trukanqa noqami qamkunapa herenciayki kashaq. 21Leví trïbu mayikikunapaqnami Israel runakuna apamushqan diezmukuna kanqa. Tsay diezmukuna paykunapaq kanqa Tinkuna Tolducho sirvipäkamaptinmi.#Lev. 27.30-33; Deut. 14.22-29; Mal. 3.8-10.

22<<Leví trïbupita mana kaykar Tinkuna Tolduman pipis witiq kaqqa wanunqami. 23Tsayno kaptinmi levitakunala Tinkuna Tolducho rurananpaq kaqkunata rurapäkunqa. Tsaycho imatapis lutanta rurarqa jutsayuqmi kanqa. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis.

<<Israel nacioncho levitakunapa chakrankuna manami kanqatsu. 24Tsayno mana kanqatsu Israel runakuna noqapaq apamushqan diezmukuna paykunapaq kaptinmi>>.

25Tsaypitanami Moisésta Tayta Dios kayno nirqan: 26<<Levitakunata kayno ninki: <Israel mayikikuna apamushqan diezmuqa qamkunapa herenciaykimi kanqa. Apamushqan diezmupita qamkunapis diezmuta jorqurkur Tayta Diospaq apapäkamunki. 27Tsay diezmutami Tayta Dios chaskinqa Israel mayikikuna trïgunpita o vïnunpita diezmuta apamuptin chaskishqannöla. 28Tsaymi Israel mayikikuna apamushqan diezmuta chaskir qamkunapis tsaypita diezmuta Tayta Diospaq apamur cüra Aarónta entregapäkunki. 29Imata chaskirpis alinnin kaqtaqa imaypis Tayta Diospaq apapäkamunki>.

30<<Levitakunata mastapis kayno ninki: <Alinnin kaqta apamuptikiqa Israel mayikikuna trïgunpita o vïnunpita apamushqanta diezmuta chaskishqannölami Tayta Dios chaskinqa. 31Putsuq kaqtaqa lapan ayluykikunawan maychöpis mikupäkunki. Tsayqa päguyki kanqa Tinkuna Tolducho ruraypaq kaqkunata rurashqaykipitami. 32Alinnin kaqta Tayta Diospaq apamurqa putsuq kaqta mikurpis manami jutsayuqtsu kankipaq. Israel mayikikuna apamushqan diezmukunata lapanta tsarikurkurqa mana sagrädutanömi rikarkaykanki. Tsayno rurarqa Tayta Diospa castïgunwanmi wanupäkunkipaq> >>.

Currently Selected:

Números 18: qvmB

Highlight

Copy

Compare